ഓണ നിലാവിന് തിരി തെളിഞ്ഞു

നവകേരളം പടുത്തുയർത്താൻ ഓരോ മലയാളിക്കും ഊർജമാകണം ഈ ഓണം : മുഖ്യമന്ത്രി

മഹാപ്രളയത്തിൽനിന്ന് ഉയിർത്തെഴുന്നേൽക്കുന്ന കേരളത്തിന് നവകേരളം സൃഷ്ടിക്കാനുള്ള ഊർജമാകണം ഇത്തവണത്തെ ഓണാഘോഷമെന്നു മുഖ്യമന്ത്രി പിണറായി വിജയൻ. നല്ല നാളെ എന്ന സങ്കൽപ്പം മലയാളി മനസിൽ മുൻപെന്നെത്തേക്കാളുമേറെ ഉയർന്നുവരുന്ന കാഴ്ചയാണ് അതിജീവനത്തിന്റെ നാളുകളിൽ കേരളം കണ്ടതെന്നും മുഖ്യമന്ത്രി പറഞ്ഞു. ഈ വർഷത്തെ ഓണാഘോഷത്തിന്റെ സംസ്ഥാനതല ഉദ്ഘാടനം നിശാഗന്ധി ഓഡിറ്റോറിയത്തിൽ നിർവഹിച്ചു സംസാരിക്കുകയായിരുന്നു അദ്ദേഹം.

നാടിനെ പുനർനിർമിക്കുന്നതിനും നവകേരളം സൃഷ്ടിക്കുന്നതിനും ജാതി-വർഗ-മത ഭേദമില്ലാതെ നാം കൈകോർത്ത കാഴ്ച ലോകത്തിനുതന്നെ മാതൃകയായതിൽ അഭിമാനിക്കാം. നല്ല നാളെകൾക്കായി നാടിനെ പുനർനിർമിക്കണമെന്ന് ഓരോ മലയാളിയും ആഗ്രഹിക്കുന്നു. ഒരുമയും ഐക്യവും നിലനിർത്തി ഒരേ മനസോടെ നീങ്ങിയാൽ ഈ സ്വപ്‌നം യാഥാർഥ്യമാകുകതന്നെ ചെയ്യും. ഇല്ലായ്മകൾ പലതും നമുക്കുണ്ടാകാം. അവ പരിഹരിക്കാൻ ആവശ്യമായ ഇടപെടലുകൾ നടത്തുകയാണുവേണ്ടത്.

ഇന്ത്യയെന്ന വലിയ രാജ്യത്തെ ചെറിയ സംസ്ഥാനമാണെങ്കിലും ജീവിത നിലവാരം ഏറെ മെച്ചപ്പെട്ടു നിൽക്കുന്ന പ്രദേശമാണു കേരളം. എന്നാൽ ഈ നിലവാരത്തിനൊത്തു ജീവിക്കാൻ കഴിയാത്ത ചില വിഭാഗങ്ങളും പ്രദേശങ്ങളും ഇന്നും നമുക്കിടയിലുണ്ട്. ഇതിനു മാറ്റംവരണം. ഈ ലക്ഷ്യത്തിനായാണ് നാലു മിഷനുകൾ മുന്നിൽവച്ച് കേരളത്തിന്റെ വികസനപ്രക്രിയ സർക്കാർ മുന്നോട്ടുകൊണ്ടുപോകുന്നത്.

വികസനം സാമൂഹ്യനീതിയിലധിഷ്ഠിതമാകണമെന്നുതന്നെയാണ് സർക്കാരിന്റെ നിലപാട്. ഇന്നത്തെ സാഹചര്യത്തിൽ അതിന് ഏറെ പ്രാധാന്യവുമുണ്ട്. സർവതലസ്പർശിയായ വികസന പ്രക്രിയയാണ് സർക്കാർ ആഗ്രഹിക്കുന്നത്. ഏറ്റക്കുറച്ചിലുകളില്ലാതെ വികസനത്തിന്റെ സ്വാദ് നുകരാൻ എല്ലാ മലയാളികൾക്കും കഴിയണം. ഈ ലക്ഷ്യം മുൻനിർത്തിയാണ് ലൈഫ്, ആർദ്രം, ഹരിതകേരളം, പൊതുവിദ്യാഭ്യാസ സംരക്ഷണ യജ്ഞം എന്നീ മിഷനുകൾ ഏറെ ജനോപകാരപ്രദമായി നടത്തിവരുന്നതെന്നും മുഖ്യമന്ത്രി പറഞ്ഞു.

കനകക്കുന്ന് നിശാഗന്ധി ഓഡിറ്റോറിയത്തിലെ പ്രൗഢഗംഭീര സദസിനെ സാക്ഷിനിർത്തിയാണ് ഈ വർഷത്തെ ഓണാഘോഷ പരിപാടികൾക്കു മുഖ്യമന്ത്രി തിരിതെളിച്ചത്. ചടങ്ങിനു മുന്നോടിയായി കലാമണ്ഡലം ശിവദാസും സംഘവും നേതൃത്വം നൽകിയ ഇലഞ്ഞിത്തറ പാണ്ടിമേളം അരങ്ങേറി. ടൂറിസം വകുപ്പിന്റെ നേതൃത്വത്തിൽ തിരുവനന്തപുരത്തെ 29 ഓളം വേദികളിലാണ് സംസ്ഥാനതല പരിപാടികൾ നടക്കുന്നത്. ഓഗസ്റ്റ് 16നാണ് സമാപനം. സംസ്ഥാനത്തെ മറ്റു ജില്ലാ കേന്ദ്രങ്ങളിലും ടൂറിസം വകുപ്പിന്റെ നേതൃത്വത്തിൽ ആഘോഷ പരിപാടികൾ സംഘടിപ്പിച്ചിട്ടുണ്ട്.

കെ. എസ്. ചിത്രയും സംഘവും അവതരിപ്പിച്ച ഗാനമേള

നിശാഗന്ധി ഓഡിറ്റോറിയത്തിൽ നടന്ന സംസ്ഥാനതല ഉദ്ഘാടന ചടങ്ങിൽ ടൂറിസം മന്ത്രി കടകംപള്ളി സുരേന്ദ്രൻ അധ്യക്ഷതവഹിച്ചു. നിയമസഭാ സ്പീക്കർ പി. ശ്രീരാമകൃഷ്ണൻ, തുറമുഖം – പുരാവസ്തു – പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി, നടൻ ടൊവിനോ തോമസ്, ദേശീയ ചലച്ചിത്ര പുരസ്‌കാര ജേതാവ് കീർത്തി സുരേഷ്, മേയർ വി.കെ. പ്രശാന്ത്, എം.എൽ.എമാരായ സി. ദിവാകരൻ, ഐ.ബി. സതീഷ്, വി.എസ്. ശിവകുമാർ, ജില്ലാ പഞ്ചായത്ത് പ്രസിഡന്റ് വി.കെ. മധു, കെ.ടി.ഡി.സി. ചെയർമാൻ എം. വിജയകുമാർ, കൗൺസിലർ പാളയം രാജൻ, ടൂറിസം വകുപ്പ് സെക്രട്ടറി റാണി ജോർജ്, ഡയറക്ടർ പി. ബാലകിരൺ എന്നിവരും ചടങ്ങിൽ പങ്കെടുത്തു. തുടർന്ന് നിശാഗന്ധിയിലെ മുഖ്യ വേദിയിൽ കേരളത്തിന്റെ വാനമ്പാടി കെ.എസ്. ചിത്രയുടെ നേതൃത്വത്തിൽ സംഗീത വിരുന്നും അരങ്ങേറി.

കലാമണ്ഡലം ശിവദാസും സംഘവും നേതൃത്വം നൽകിയ ഇലഞ്ഞിത്തറ പാണ്ടിമേളം

പ്രളയത്തിൽ സർവവും നഷ്ടപ്പെട്ട 8000 കുടുംബങ്ങൾ
ഈ വർഷത്തെ ഓണമുണ്ണുന്നതു പുതിയ വീട്ടിൽ

കഴിഞ്ഞ വർഷമുണ്ടായ പ്രളയക്കെടുതിയിൽ എല്ലാം നഷ്ടപ്പെട്ട എണ്ണായിരത്തോളം കുടുംബങ്ങൾ ഈ വർഷത്തെ ഓണമുണ്ണുന്നത് പുതിയ വീട്ടിൽ. അപ്രതീക്ഷിതമായുണ്ടായ വൻ ദുരന്തത്തിൽനിന്ന് ഒരു ജനത ഇത്രവേഗം ഉയിർത്തെഴുന്നേൽക്കുന്നത് ലോകത്തിനുതന്നെ മാതൃകയാണെന്നു മുഖ്യമന്ത്രി പിണറായി വിജയൻ പറഞ്ഞു. ഓണം വാരാഘോഷത്തിന്റെ സംസ്ഥാനതല ഉദ്ഘാടന വേദിയിലാണ് മഹാപ്രളയം വിതച്ച നാശത്തിൽനിന്ന് ഉയിർത്തെഴുന്നേൽക്കാൻ കേരളം കാണിച്ച നിശ്ചയദാർഢ്യത്തെ മുഖ്യമന്ത്രി വരച്ചുകാട്ടിയത്.

കഴിഞ്ഞ പ്രളയകാലത്തു പൂർണമായി തകർന്ന 16,088 വീടുകളിൽ 7,555 വീടുകളുടെ നിർമാണം പൂർത്തിയായതായി മുഖ്യമന്ത്രി പറഞ്ഞു. 5355 വീടുകളുടെ നിർമാണം പുരോഗതിയിലാണ്. ഭാഗീയമായി തകർന്ന 284557 വീടുകൾ 1557 കോടി മുടക്കി പുനർ നിർമാണ പ്രവർത്തനം നടത്താൻ കഴിഞ്ഞു. സഹകരണ സ്ഥാപനങ്ങളുടേതടക്കമുള്ള പങ്കാളിത്തത്തോടെയാണ് അതിവേഗം ഈ പ്രവർത്തനങ്ങൾ പൂർത്തിയാക്കാൻ കഴിഞ്ഞത്. പ്രളയം തകർത്ത കാർഷിക, ചെറുകിട വ്യവസായ മേഖലകളിലും വലിയ ഉയിർത്തെഴുന്നേൽപ്പിനാണ് സർക്കാർ കൈത്താങ്ങായത്.

ഈ വർഷമുണ്ടായ കാലവർഷക്കെടുതിയിൽ ദുരിതമനുഭവിക്കുന്നവർക്കും ഏറെ സഹായം നൽകാൻ സർക്കാരിനായെന്നു മുഖ്യമന്ത്രി ചൂണ്ടിക്കാട്ടി. കഴിഞ്ഞമാസമുണ്ടായ പേമാരിയിലും വെള്ളപ്പൊക്കത്തിലും ദുരിതാശ്വാസ ക്യാംപിൽ കഴിഞ്ഞ 54,000 പേർക്ക് അടിയന്തര സഹായമായി 10,000 രൂപ വിതരണം ചെയ്തു. ഈ ഇനത്തിൽ 54 കോടി രൂപയാണ് സഹായമായി നൽകാൻ കഴിഞ്ഞത്. ഇതിൽത്തന്നെ ദുരിതം ഏറെയുണ്ടായ കോഴിക്കോട് 16,226 പേർക്ക് സഹായം നൽകാൻ കഴിഞ്ഞു. നിലമ്പൂരിൽ മാത്രം 1500 കുടുംബങ്ങൾക്കും സഹായം നൽകിയതായി മുഖ്യമന്ത്രി പറഞ്ഞു.

ഓണക്കാലത്ത് ക്ഷേമ പെൻഷൻ ഇനത്തിൽ 1971 കോടി രൂപ വിതരണം ചെയ്യാൻ കഴിഞ്ഞതും സർക്കാരിന്റെ വലിയ നേട്ടമാണ്. ഈ സർക്കാർ അധികാരത്തിൽവരുമ്പോൾ 1477.92 കോടി രൂപ ക്ഷേമ പെൻഷൻ കുടിശിക നൽകാനുണ്ടായിരുന്നു. അതു പൂർണമായി കൊടുത്തുതീർത്തു. കഴിഞ്ഞ മൂന്നു വർഷംകൊണ്ട് 18,171 കോടി രൂപയാണ് വിവിധ ക്ഷേമ പെൻഷനുകളായി നൽകിയത്. ഖജനാവ് നിറഞ്ഞുകവിഞ്ഞ് ഒഴുകിയതുകൊണ്ടല്ല മറിച്ച് പാവപ്പെട്ടവർക്ക് അർഹതപ്പെട്ട പണം അവരുടെ അവകാശമാണെന്നതുകൊണ്ടാണ് ഇക്കാര്യത്തിൽ സർക്കാർ ജാഗ്രത പുലർത്തുന്നതെന്നും മുഖ്യമന്ത്രി പറഞ്ഞു.

Leave a Reply

Your email address will not be published. Required fields are marked *