തിരുവനന്തപുരം കോര്‍പ്പറേഷനും ജില്ലാ പഞ്ചായത്തിനും പുതിയ ഭരണസമിതി

അംഗങ്ങള്‍ അധികാരമേറ്റു
ചടങ്ങ് കര്‍ശന കോവിഡ് പ്രോട്ടോക്കോള്‍ പാലിച്ച്

ജില്ലാ പഞ്ചായത്തിലേക്കും തിരുവനന്തപുരം കോര്‍പ്പറേഷനിലേക്കും തെരഞ്ഞെടുക്കപ്പെട്ട ജനപ്രതിനിധികള്‍ പ്രതിജ്ഞ ചൊല്ലി അധികാരമേറ്റു. ജില്ലാ പഞ്ചായത്തിലെ ഏറ്റവും മുതിര്‍ന്ന അംഗമായ വെള്ളനാട് ഡിവിഷനില്‍ നിന്നും വിജയിച്ച യു.ഡി.എഫ് അംഗം ശശിധരന്‍ നായര്‍ക്ക് വരണാധികാരി കൂടിയായ ജില്ലാ കളക്ടര്‍ ഡോ. നവജ്യോത് ഖോസ ആദ്യം സത്യവാചകം ചൊല്ലിക്കൊടുത്തു. തുടര്‍ന്ന് അദ്ദേഹം മറ്റുള്ള 25 അംഗങ്ങളെക്കൊണ്ട് സത്യവാചകം ചൊല്ലിച്ചു. ശേഷം ആദ്യ കൗണ്‍സില്‍ യോഗം അദ്ദേഹത്തിന്റെ അധ്യക്ഷതയില്‍ ചേര്‍ന്നു. ജില്ലാ പഞ്ചായത്ത് പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പിനുള്ള ജില്ലാ കളക്ടറുടെ നോട്ടീസ് എല്ലാ അംഗങ്ങള്‍ക്കും നല്‍കി.

തിരുവനന്തപുരം കോര്‍പ്പറേഷനിലെ ഏറ്റവും മുതിര്‍ന്ന അംഗമായ പാല്‍കുളങ്ങര വാര്‍ഡില്‍ നിന്നും വിജയിച്ച എന്‍.ഡി.എ സ്ഥാനാര്‍ത്ഥി പി. അശോക് കുമാറിന് ജില്ലാ കളക്ടര്‍ ഡോ. നവജ്യോത് ഖോസ സത്യവാചകം ചൊല്ലിക്കൊടുത്തു. തുടര്‍ന്ന് മറ്റുള്ള 99 അംഗങ്ങള്‍ക്കും അദ്ദേഹം സത്യവാചകം ചൊല്ലിക്കൊടുത്തു. കോവിഡ് ബാധിതനായതിനാല്‍ കുടപ്പനക്കുന്ന് വാര്‍ഡ് കൗണ്‍സിലര്‍ എസ് ജയചന്ദ്രന്‍ മറ്റെല്ലാ അംഗങ്ങളും സത്യപ്രതിജ്ഞ ചെയ്ത ശേഷമാണ് സത്യപ്രതിജ്ഞയ്‌ക്കെത്തിയത്. പി.പി.ഇ കിറ്റ് ഉള്‍പ്പടെയുള്ള കോവിഡ് മാനദണ്ഡങ്ങളെല്ലാം കര്‍ശനമായി പാലിച്ചാണ് അദ്ദേഹം എത്തിയത്. സത്യപ്രതിജ്ഞയ്ക്കു ശേഷം മുതിര്‍ന്ന അംഗമായ പി. അശോക് കുമാറിന്റെ അധ്യക്ഷതയില്‍ ആദ്യ യോഗം ചേര്‍ന്ന് മേയര്‍, ഡെപ്യൂട്ടി മേയര്‍ തെരഞ്ഞെടുപ്പിനുള്ള നടപടിക്രമങ്ങള്‍ ചര്‍ച്ച ചെയ്തു.

തദ്ദേശ തെരഞ്ഞെടുപ്പ് സമാധാനപരമായും കൃത്യമായും നടത്താന്‍ സഹകരിച്ച എല്ലാ അംഗങ്ങളെയും മറ്റു ബന്ധപ്പെട്ടവരെയും ജില്ലാ കളക്ടര്‍ അഭിനന്ദിച്ചു. തിരുവനന്തപുരം നഗരത്തിന്റെ വികസനത്തിന് കൂടുതല്‍ കരുത്തേകാന്‍ കോര്‍പ്പറേഷന്റെ പുതിയ ഭരണസമിതിക്ക് കഴിയട്ടെയെന്ന് കളക്ടര്‍ ആശംസിച്ചു. കോവിഡ് പ്രോട്ടോക്കോള്‍ പാലിച്ചായിരുന്നു ചടങ്ങുകള്‍ സംഘടിപ്പിച്ചത്. ജില്ലാ പഞ്ചായത്തില്‍ നടന്ന ചടങ്ങില്‍ ഉപ വരണാധികാരി കൂടിയായ എ.ഡി.എം വി.ആര്‍ വിനോദും കോര്‍പ്പറേഷനില്‍ നടന്ന ചടങ്ങില്‍ സബ് കളക്ടര്‍ എം.എസ് മാധവിക്കുട്ടിയും സംബന്ധിച്ചു.

മേയര്‍ തെരഞ്ഞെടുപ്പ് 28ന്

തിരുവനന്തപുരം കോര്‍പ്പറേഷനിലേക്കുള്ള മേയര്‍, ഡെപ്യൂട്ടി മേയര്‍ തെരഞ്ഞെടുപ്പ് ഡിസംബര്‍ 28ന്. രാവിലെ 11 മണിക്ക് മേയര്‍ തെരഞ്ഞെടുപ്പും ഉച്ചതിരിഞ്ഞ് രണ്ടുമണിക്ക് ഡെപ്യൂട്ടി മേയര്‍ തെരഞ്ഞെടുപ്പും നടക്കും. ഡിസംബര്‍ 30ന് രാവിലെ 11 മണിക്കാണ് ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പ്. വൈസ് പ്രസിഡന്റ് തെരഞ്ഞെടുപ്പ് ഉച്ചതിരിഞ്ഞ് രണ്ടിനും നടക്കും.

മുന്‍സിപ്പാലിറ്റികളിലും ജനപ്രതിനിധികള്‍ അധികാരത്തിലേറി

ജില്ലയിലെ നാലു മുന്‍സിപ്പാലിറ്റികളിലും തെരഞ്ഞെടുക്കപ്പെട്ട ജനപ്രതിനിധികള്‍ പ്രതിജ്ഞ ചൊല്ലി അധികാരമേറ്റു. കര്‍ശന കോവിഡ് മാനദണ്ഡങ്ങള്‍ പാലിച്ചായിരുന്നു ചടങ്ങുകള്‍ സംഘടിപ്പിച്ചത്. ഓരോ നഗരസഭയിലെയും തെരഞ്ഞെടുക്കപ്പെട്ട അംഗങ്ങളില്‍ ഏറ്റവും പ്രായംകൂടിയ അംഗത്തിന് വരണാധികാരികള്‍ പ്രതിജ്ഞ ചൊല്ലിക്കൊടുത്തു. തുടര്‍ന്ന് ഈ അംഗം മറ്റ് അംഗങ്ങള്‍ക്കു പ്രതിജ്ഞാ വാചകം ചൊല്ലിക്കൊടുത്തു.

വര്‍ക്കല നഗരസഭാ അങ്കണത്തില്‍നടന്ന ചടങ്ങില്‍ 33 അംഗങ്ങള്‍ പ്രതിജ്ഞ ചെയ്തു അധികാരമേറ്റു. വരണാധികാരിയായ റവന്യു റിക്കവറി വിഭാഗം ഡെപ്യൂട്ടി കളക്ടര്‍ കെ.മോഹനകുമാര്‍ മുതിര്‍ന്ന അംഗമായ എന്‍.അശോകന് സത്യവാചകം ചൊല്ലികൊടുത്തു. ആറ്റിങ്ങല്‍ നഗരസഭയില്‍ 31 അംഗങ്ങളാണ് അധികാരമേറ്റത്. നഗരസഭാ കാര്യാലയത്തില്‍ നടന്ന ചടങ്ങില്‍ വരണാധികാരിയായ ജില്ലാ വ്യവസായ കേന്ദ്രം ജനറല്‍ മാനേജര്‍ ജി.രാജീവ് മുതിര്‍ന്ന അംഗമായ ജി.തുളസിധരന്‍ പിള്ളയ്ക്ക് പ്രതിജ്ഞാവാചകം ചൊല്ലിക്കൊടുത്തു.

നെടുമങ്ങാട് നഗരസഭാ അങ്കണത്തില്‍ നടന്ന ചടങ്ങില്‍ 39 അംഗങ്ങള്‍ അധികാരമേറ്റു. മുതിര്‍ന്ന അംഗമായ പരിയാരം. എസ്. രവീന്ദ്രന് വരണാധികാരിയായ ഫിഷറീസ് ഡെപ്യൂട്ടി ഡയറക്ടര്‍ പി.ബീന സുകുമാര്‍ സത്യവാചകം ചൊല്ലിക്കൊടുത്തു. നെയ്യാറ്റിന്‍കര നഗരസഭയില്‍ 44 ജനപ്രതിനിധികളാണ് പ്രതിജ്ഞ ചൊല്ലി അധികാരമേറ്റത്. ടൗണ്‍ഹാളില്‍ നടന്ന ചടങ്ങില്‍ വരണാധികാരി നെയ്യാറ്റിന്‍കര റീസര്‍വേ അസിസ്റ്റന്റ് ഡയറക്ടര്‍ വി.പ്രകാശ് മുതിര്‍ന്ന അംഗമായ മൂന്നുകല്ലിന്‍മൂട് വാര്‍ഡ് ജനപ്രതിനിധി പി.കെ.രാജമോഹനന് പ്രതിജ്ഞാവാചകം ചൊല്ലിക്കൊടുത്തു. ചടങ്ങിനു ശേഷം തെരഞ്ഞെടുക്കപ്പെട്ട എല്ലാ അംഗങ്ങളുടേയും ആദ്യ യോഗം ആദ്യം പ്രതിജ്ഞ ചെയ്ത അംഗത്തിന്റെ അധ്യക്ഷതയില്‍ ചേര്‍ന്നു.

ബ്ലോക്ക് പഞ്ചായത്തുകളില്‍ ചുമതലയേറ്റു

ജില്ലയിലെ പതിനൊന്നു ബ്ലോക്ക് പഞ്ചായത്തുകളിലും തെരഞ്ഞെടുക്കപ്പെട്ട ജനപ്രതിനിധികള്‍ പ്രതിജ്ഞാവാചകം ചൊല്ലി അധികാരമേറ്റു. അതത് വരണാധികാരികളാണ് ഓരോ ബ്ലോക്ക് പഞ്ചായത്തിലെയും മുതിര്‍ന്ന അംഗത്തിന് പ്രതിജ്ഞാവാചകം ചൊല്ലികൊടുത്തത്. കര്‍ശന കോവിഡ് മാനദണ്ഡങ്ങള്‍ പാലിച്ചായിരുന്നു ചടങ്ങുകള്‍ സംഘടിപ്പിച്ചത്.

വര്‍ക്കല ബ്ലോക്ക് പഞ്ചായത്ത് ഓഫീസില്‍ നടന്ന ചടങ്ങില്‍ 13 അംഗങ്ങളാണ് അധികാരമേറ്റത്. വരണാധികാരി ലാന്‍ഡ് ആന്റ് ഭൂ സര്‍വ്വേ സീനിയര്‍ സൂപ്രണ്ട് ബി. എസ്. സുരേഷ് കുമാര്‍ കവലയൂര്‍ ബ്ലോക്ക് ഡിവിഷനില്‍ നിന്നും തെരഞ്ഞെടുക്കപ്പെട്ട മുതിര്‍ന്ന അംഗമായ എസ്. അക്ബറിനു പ്രതിജ്ഞാവാചകം ചൊല്ലിക്കൊടുത്തു.

ചിറയിന്‍കീഴ് ബ്ലോക്ക് പഞ്ചായത്തിലേക്ക് 13 അംഗങ്ങളാണ് തെരഞ്ഞെടുക്കപ്പെട്ടത്. വരണാധികാരിയായ ലാന്‍ഡ് ആന്റ് റവന്യൂ ഓഫീസ് അസിസ്റ്റന്റ് കമ്മീഷണര്‍ ദേവപ്രസാദ് ചിറയിന്‍കീഴ് ഡിവിഷനില്‍ നിന്നും തെരഞ്ഞെടുക്കപ്പെട്ട മുതിര്‍ന്ന അംഗമായ കെ. മോഹനന് സത്യവാചകം ചൊല്ലിക്കൊടുത്തു.

പോത്തന്‍കോട് ബ്ലോക്ക് പഞ്ചായത്തില്‍ തിരഞ്ഞെടുക്കപ്പെട്ട 13 അംഗങ്ങളാണ് പ്രതിജ്ഞ ചെയ്തത്. ബ്ലോക്ക് ഓഫീസില്‍ നടന്ന ചടങ്ങില്‍ വരണാധികാരിയായ പഞ്ചായത്ത് അസിസ്റ്റന്റ് ഡയറക്ടര്‍ പ്രശാന്ത് കുമാര്‍ മുതിര്‍ന്ന അംഗമായ ഫ്രാന്‍സിസ് ജഫേഴ്‌സന് പ്രതിജ്ഞാവാചകം ചൊല്ലിക്കൊടുത്തു.

കിളിമാനൂര്‍ ബ്ലോക്ക് പഞ്ചായത്ത് ഓഫീസില്‍ നടന്ന ചടങ്ങില്‍ തിരഞ്ഞെടുക്കപ്പെട്ട 15 അംഗങ്ങളാണ് സത്യവാചകം ചൊല്ലി അധികാരമേറ്റത്. മുതിര്‍ന്ന അംഗമായ ബി.പി.മുരളിക്ക് വരണാധികാരിയായ ജില്ലാ സാമൂഹ്യ നീതി ഓഫീസര്‍ ഏലിയാസ് തോമസാണ് പ്രതിജ്ഞാവാചകം ചൊല്ലികൊടുത്തത്.

വാമനപുരം ബ്ലോക്ക് പഞ്ചായത്തില്‍ തെരഞ്ഞെടുക്കപ്പെട്ട 15 അംഗങ്ങളാണ് അധികാരമേറ്റത്. നന്ദിയോട് ഡിവിഷനില്‍ നിന്നും തെരഞ്ഞെടുക്കപ്പെട്ട മുതിര്‍ന്ന അംഗമായ രാധ ജയപ്രകാശിന് വരണാധികാരിയായ എ.ഡി.സി ജനറല്‍ ജി.സുധാകരന്‍ സത്യവാചകം ചൊല്ലി കൊടുത്തു.

നെടുമങ്ങാട് ബ്ലോക്കില്‍ 13 ജനപ്രതിനിധികള്‍ അധികാരമേറ്റു. വരണാധികാരിയായ ലാന്റ് അക്വസിഷന്‍ ഡെപ്യൂട്ടി കളക്ടര്‍ സി.ജി.ഹരികുമാര്‍ ചെറിയകൊണ്ണി ഡിവിഷനില്‍ നിന്നും തെരഞ്ഞെടുക്കപ്പെട്ട മുതിര്‍ന്ന അംഗമായ വി.വിജയന്‍ നായര്‍ക്ക് പ്രതിജ്ഞാവാചകം ചൊല്ലികൊടുത്തു.

വെള്ളനാട് ബ്ലോക്ക് പഞ്ചായത്തില്‍ 16 ജനപ്രതിനിധികളാണ് അധികാരമേറ്റത്. ബ്ലോക്ക് കാര്യാലയത്തില്‍ നടന്ന ചടങ്ങില്‍ മുതിര്‍ന്ന അംഗമായ ആമച്ചല്‍ ഡിവിഷനില്‍ നിന്നും തെരഞ്ഞെടുക്കപ്പെട്ട സരള ടീച്ചര്‍ക്ക് വരണാധികാരിയായ വിജിലന്‍സ്( റവന്യൂ) ഡെപ്യൂട്ടി കളക്ടര്‍ സുനില്‍.എസ്.നായരാണ് പ്രതിജ്ഞാവാചകം ചൊല്ലികൊടുത്തത്.

പെരുങ്കടവിള ബ്ലോക്ക് ഓഫീസില്‍ നടന്ന ചടങ്ങില്‍ 14 ജനപ്രതിനിധികള്‍ അധികാരമേറ്റു. മുതിര്‍ന്ന അംഗമായ വി. താണുപിള്ളയ്ക്ക് വരണാധികാരിയായ ഡി.ആര്‍.ഡി.എ ജില്ലാ കോര്‍ഡിനേറ്റര്‍ വൈ.വിജയകുമാറാണ് പ്രതിജ്ഞാവാചകം ചൊല്ലികൊടുത്തത്.

പാറശ്ശാല ബ്ലോക്ക് പഞ്ചായത്തില്‍ 14 ജനപ്രതിനിധികള്‍ അധികാരമേറ്റു. വരണാധികാരിയായ ഡിവിഷണല്‍ ഫോറസ്റ്റ് ഓഫീസര്‍ കെ.ഐ.പ്രദീപ് കുമാര്‍, അരുമാനൂര്‍ ഡിവിഷനില്‍ നിന്നും വിജയിച്ച മുതിര്‍ന്ന അംഗമായ എസ്.ആര്യദേവന് പ്രതിജ്ഞാവാചകം ചൊല്ലിക്കൊടുത്തു. ബ്ലോക്ക് പഞ്ചായത്ത് ഹാളിലാണ് ചടങ്ങ് സംഘടിപ്പിച്ചത്.

അതിയന്നൂര്‍ ബ്ലോക്ക് പഞ്ചായത്തില്‍ 13 അംഗങ്ങളാണ് പ്രതിജ്ഞ ചൊല്ലി അധികാരമേറ്റത്. മുതിര്‍ന്ന അംഗമായ മുട്ടയ്ക്കാട് ഡിവിഷനില്‍ നിന്നും വിജയിച്ച കെ.എസ്. സാജന് വരണാധികാരിയായ ജില്ലാ രജിസ്ട്രാര്‍ പി. നൈനാന്‍ പ്രതിജ്ഞാവാചകം ചൊല്ലിക്കൊടുത്തു.

നേമം ബ്ലോക്കില്‍ തെരഞ്ഞെടുക്കപ്പെട്ട 16 പേരാണ് അധികാരമേറ്റത്. വരണാധികാരിയായ ഇക്കണോമിക്‌സ് ആന്‍ഡ് സ്റ്റാറ്റിസ്റ്റിക്‌സ് ഡെപ്യൂട്ടി ഡയറക്ടര്‍ ബി. അനീഷ് കുമാര്‍ മാറനല്ലൂര്‍ ബ്ലോക്ക് ഡിവിഷനില്‍ നിന്നും വിജയിച്ച മുതിര്‍ന്ന അംഗമായ ശാന്ത പ്രഭാകരന് പ്രതിജ്ഞാവാചകം ചൊല്ലിക്കൊടുത്തു.

പ്രതിജ്ഞാ ചടങ്ങിനു ശേഷം തെരഞ്ഞെടുക്കപ്പെട്ട അംഗങ്ങളുടെ ആദ്യ യോഗം അതത് ബ്ലോക്ക് പഞ്ചായത്തുകളിലെ മുതിര്‍ന്ന അംഗങ്ങളുടെ അധ്യക്ഷതയില്‍ ചേര്‍ന്നു.