തിരുവനന്തപുരം: കേരള ക്രിക്കറ്റ് ലീഗിൽ ട്രിവാൻഡ്രം റോയൽസിന്റെ ബാറ്റിംഗ് നിരയെ തകർത്തത് വിനിൽ ടി.എസിന്റെ കൃത്യതയാർന്ന ബൗളിംഗാണ്. നാല് ഓവറിൽ ഒരു മെയ്ഡൻ ഉൾപ്പെടെ 19 റൺസ് മാത്രം വഴങ്ങി താരം മൂന്ന് വിക്കറ്റ് നേടി.
മികച്ച ലൈനും ലെങ്തും പാലിച്ച വിനിലിന്റെ പന്തുകൾക്കെതിരെ റോയൽസ് ബാറ്റർമാർക്ക് റൺ കണ്ടെത്താൻ ഏറെ ബുദ്ധിമുട്ടി. വിഷ്ണു വിനോദിനെ എൽബിഡബ്ല്യുവിൽ പുറത്താക്കിയായിരുന്നു വിനിലിന്റെ വിക്കറ്റ് വേട്ടയുടെ തുടക്കം.
അതേ ഓവറിൽ തന്നെ അഭിഷേക് പി. നായരെയും വിനിൽ പുറത്താക്കി. നാലാം ഓവറിൽ റോയൽസിന്റെ ബാറ്റിംഗ് പ്രതീക്ഷയായ ഗോവിന്ദ് ദേവ് പൈയുടെ വിക്കറ്റ് കൂടി നേടിയതോടെ ടീമിന്റെ മുൻനിര തകർന്നു.
പ്രധാന ബാറ്റർമാരെ തുടർച്ചയായി പുറത്താക്കിയ വിനിലിന്റെ സ്പെൽ മത്സരത്തിൽ ടീമിന് മേൽക്കൈ നേടിക്കൊടുത്തു. അദ്ദേഹത്തിന്റെ ബൗളിംഗ് പ്രകടനം റോയൽസിന്റെ വലിയ സ്കോർ പ്രതീക്ഷകൾക്ക് തിരിച്ചടിയായി.