കഴക്കൂട്ടം സൈനിക് സ്‌കൂളില്‍ അപൂർവമായ പൂർവ്വ വിദ്യാർത്ഥി സംഗമം

കഴക്കൂട്ടം സൈനിക സ്‌കൂളിൽ ഇന്ന് (22 ജൂലൈ 2023) സംഘടിപ്പിച്ച പൂർവ്വ വിദ്യാർത്ഥി സംഗമം അസാധാരണമായ ഒരു ഒത്തുചേരലിന് സാക്ഷ്യം വഹിച്ചു.

ഇന്ത്യയിലെ വിവിധ സൈനിക വിഭാഗങ്ങളിൽ ഉന്നത പദവികൾ വഹിക്കുന്ന മലയാളികളും, സ്കൂളിലെ പൂർവ്വ വിദ്യാർത്ഥികളുമായ അഞ്ച് ഉദ്യോഗസ്ഥർ ഈ സംഗമത്തിൽ പങ്കെടുത്തു. സ്‌കൂളിലെ പൂർവവിദ്യാർഥി കൂട്ടായ്മയായ ഓൾഡ് ബോയ്‌സ് അസോസിയേഷന്റെ 1996 ബാച്ച് നടത്തിയ 54-ാമത് സംഗമത്തിന്റെ സ്മരണാർത്ഥം സായുധസേനയിലെ പ്രധാന സ്ഥാനങ്ങൾ വഹിക്കുന്ന അഞ്ച് ഉദ്യോഗസ്ഥരുടെ സംഗമം കേഡറ്റുകൾക്കും സ്‌കൂളിലെ മുഴുവൻ ജീവനക്കാർക്കും പ്രചോദനമായി മാറി.

നാഷണൽ സൈബർ സെക്യൂരിറ്റി കോർഡിനേറ്റർ ലഫ്റ്റനന്റ് ജനറൽ എം ഉണ്ണികൃഷ്ണൻ നായർ, വ്യോമസേനാ ട്രെയിനിംഗ് കമാൻഡ് മേധാവി എയർ മാർഷൽ ആർ.രധീഷ്, ഇൻ്റഗ്രേറ്റഡ് ഡിഫൻസ് സ്റ്റാഫ് മേധാവി ലെഫ്റ്റനന്റ് ജനറൽ ജോൺസൺ പി മാത്യു, ആൻഡമാൻ ആൻഡ് നിക്കോബാർ കമാൻഡ് മേധാവി എയർ മാർഷൽ സാജു ബാലകൃഷ്ണൻ, ദക്ഷിണ വ്യോമസേനാ മേധാവി
എയർ മാർഷൽ ബി മണികണ്ഠൻ എന്നീ അഞ്ച് ഉദ്യോഗസ്ഥർമാർ കേരളത്തിൽ നിന്നുള്ളവരും 1980 ബാച്ചുകളിൽ നിന്നുള്ളവരുമാണ്.

സ്‌കൂൾ ഗാർഡ് സ്‌ക്വയറിൽ ആചാരപരമായ പുഷ്പ ചക്രം അർപ്പിച്ചതിനു ശേഷം, സൈനിക സ്‌കൂൾ കഴക്കൂട്ടം പ്രിൻസിപ്പൽ കേണൽ ധീരേന്ദ്ര കുമാർ സ്കൂളിൻ്റെ പ്രവർത്തനങ്ങൾ വിശദീകരിച്ചു. സ്‌കൂൾ ഓഡിറ്റോറിയത്തിൽ സംഘടിപ്പിച്ച ‘ഗുരുവന്ദനം’ എന്ന പരിപാടിയിലൂടെ
വിരമിച്ച അധ്യാപകരെ ആദരിക്കുകയും, മികച്ച വിജയം നേടിയ കേഡറ്റുകൾക്ക് ഉപഹാരങ്ങൾ നൽകുകയും ചെയ്തു. ഒബിഎ പ്രസിഡന്റ് കേണൽ സജാദ്, സ്കൂൾ പ്രിൻസിപ്പൽ, ഡിഫൻസ് പിആർഒ എന്നിവർക്കൊപ്പം അഞ്ച് ഉദ്യോഗസ്ഥരും സ്കൂൾ യുദ്ധസ്മാരകത്തിന് മുന്നിൽ മാധ്യമങ്ങളെ അഭിസംബോധന ചെയ്തു. സൈനിക് സ്‌കൂളിൽ നിന്നുള്ള തങ്ങളുടെ ജീവിതത്തെയും അനുഭവങ്ങളെയും കുറിച്ച് ഉദ്യോഗസ്ഥർ സംസാരിച്ചു. കൂടാതെ, ലോകത്തിന്റെ നാനാ ഭാഗത്തുമുള്ള സഹപാഠികളുമായി ഇന്നും നിലനിർത്തുന്ന ഊഷ്മളമായ ബന്ധത്തെ കുറിച്ചും അവർ പറഞ്ഞു.