2024 ലെ എഞ്ചിനീയറിംഗ് കോഴ്സുകളിലേക്കുള്ള പ്രവേശന പരീക്ഷയുടെ റാങ്ക് ലിസ്റ്റ് അപാകം നിറഞ്ഞതാണ്; ഐക്യ മലയാള പ്രസ്ഥാനം

2024 ലെ എഞ്ചിനീയറിംഗ് കോഴ്സുകളിലേക്കുള്ള പ്രവേശന പരീക്ഷയുടെ റാങ്ക് ലിസ്റ്റ് അപാകം നിറഞ്ഞതാണ് എന്ന് ഐക്യ മലയാള പ്രസ്ഥാനം. അനീതി നിറഞ്ഞതാണ് ഈ റാങ്ക് ലിസ്റ്റ്. റാങ്ക് നിർണ്ണയത്തിൻ്റെ രീതി ഒട്ടും തന്നെ സുതാര്യമായിരുന്നില്ല. രഹസ്യാത്മകമായിരുന്നു. പ്രവേശന പരീക്ഷയുടെ മാർക്ക് ലിസ്റ്റ് പരിശോധിച്ചാൽ ആദ്യ നാലുപേർക്ക് മുഴുവൻ മാർക്കും ലഭിച്ചതായി മനസ്സിലാക്കാം. എൻട്രൻസ് കമ്മിഷണറേറ്റ് റാങ്ക് നിർണ്ണയ പട്ടിക പ്രസിദ്ധീകരിച്ചപ്പോൾ ഈ നാലുപേരിൽ മൂന്നുപേർക്ക് ആദ്യ റാങ്കു തന്നെ കിട്ടി. ശേഷിക്കുന്നയാൾക്ക് റാങ്ക് നമ്പർ 87.

എന്താണു കാരണമെന്നു തിരക്കിയപ്പോൾ മനസ്സിലായത് ആദ്യ റാങ്ക് ലഭിച്ചവർ സി ബി എസ് ഇ സ്ട്രീമിൽ പഠിച്ചവരും 87 -ാം റാങ്കു ലഭിച്ചയാൾ സംസ്ഥാന ഹയർ സെക്കൻ്ററി സിലബസിൽ പഠിച്ചയാളുമാണ് എന്നത്രേ. പ്രവേശനത്തിൻ്റെ റാങ്കു പട്ടിക ഉണ്ടാക്കുന്നത് പ്രവേശന പരീക്ഷയുടെ മാർക്കും യോഗ്യതാ പരീക്ഷയായ ഹയർ സെക്കൻ്ററിക്ക് ഫിസിക്സ് കെമിസ്ട്രി ഗണിതം എന്നീ വിഷയങ്ങൾക്കു ലഭിച്ച സ്കോറും തുല്യമായി 50:50 എന്ന അനുപാതത്തിൽ കൂട്ടിയിട്ടാണ്. ഹയർ സെക്കൻ്ററിക്ക് വിവിധ പാഠ്യപദ്ധതികളായതു കൊണ്ട് സമീകരണം അഥവാ Normalisation വേണമത്രേ.

ഈ ‘സമീകരണം എന്ന അഭ്യാസത്തിൻ്റെ ഫലമായി സി ബി എസ് ഇ ക്കാർക്ക് 8 മാർക്ക് കൂടുതൽ കൊടുത്തു എന്നു മാത്രമല്ല പൊതുവിദ്യാഭ്യാസമേഖലയിൽ പഠിച്ചവരുടെ 27 മാർക്ക് കുറയ്ക്കുകയും ചെയ്തു. പൊതുവിദ്യാഭ്യാസത്തിൻ്റെ വഴി തിരഞ്ഞെടുത്ത സാധാരണക്കാരായ വിദ്യാർത്ഥികളെ കളത്തിനു പുറത്താക്കി സി ബി എസ് ഇ തിരഞ്ഞെടുത്ത വരേണ്യ – മധ്യവർഗ്ഗക്കാരെ സഹായിക്കാനുള്ള ഗുപ്തവും ഗൂഢവുമായ സൂത്രവാക്യ പ്രയോഗമാണ് സമീകരണം. ഇത് പൊതുവിദ്യാഭ്യാസത്തെ ഇകഴ്ത്താനും തകർക്കാനുമുള്ള വളരെ ബോധപൂർവ്വമായ ശ്രമമാണ്.

ഇതിനെതിരെയുള്ള സമരമാണ് ആഗസ്റ്റ് 27 ന് ഐക്യമലയാളപ്രസ്ഥാനം ആരംഭിക്കുന്നത്. നിരന്തര സമരങ്ങൾ വേണ്ടി വന്നേക്കാം എന്ന ബോധ്യം ഞങ്ങൾക്കുണ്ട്. പൊതുവിദ്യാഭ്യാസം നിലനിൽക്കണമെന്ന് ആഗ്രഹിക്കുന്ന എല്ലാവരും ഈ സമരത്തോട് ഐക്യപ്പെടണമെന്ന് അഭ്യർത്ഥിക്കുന്നു.