കാർഷിക കോളേജ് ഗ്രാമസഹവാസ പരിപാടി കാട്ടാക്കടയിൽ തുടങ്ങി

വെള്ളായണി കാർഷിക കോളേജ്, കാട്ടാക്കട ഗ്രാമ പഞ്ചായത്ത്, കൃഷി ഭവൻ തുടങ്ങിയവയുടെ സംയുക്താഭിമുഖ്യത്തിൽ എട്ടു ദിവസം നീണ്ടുനിൽക്കുന്ന ഗ്രാമസഹവാസ പരിപാടി പ്രശസ്ത കവിയും ഗാനരചയിതാവുമായ മുരുകൻ കാട്ടാക്കട ഉദ്ഘാടനം ചെയ്തു.  തങ്ങളുടെ പഠനത്തിൻറെ ഭാഗമായി  അന്യസംസ്ഥാനങ്ങളിൽനിന്നുൾപ്പെടെ വെള്ളായണി കാർഷിക കോളേജിലെ 169 അവസാനവർഷ ബിരുദ വിദ്യാർത്ഥികളാണ് കാട്ടാക്കടയിലെ പ്ലാവൂർ ഗവൺമെൻറ് ഹൈസ്കൂളിൽ താമസിച്ചു കൊണ്ട് കർഷകർക്ക് ഉപകാരപ്രദമായ നൂതന കാർഷികപരിപാടികൾ ഉൾപ്പെടുത്തി ഗ്രാമോദയ – 2025 പഞ്ചായത്തിലെ വിവിധ പ്രദേശങ്ങളിലായി നടത്തുന്നത്.
പഞ്ചായത്ത് പ്രസിഡന്റ് കെ. അനിൽകുമാറിന്റെ അദ്ധ്യക്ഷതയിൽ പ്ലാവൂർ ഗവൺമെൻറ് ഹൈസ്കൂളിൽ വെച്ച് നടന്ന ഉദ്ഘാടന ചടങ്ങിൽ വെള്ളായണി കാർഷിക കോളേജ് ഡീൻ ഓഫ് ഫാക്കൾട്ടി ഡോ. റോയ് സ്റ്റീഫൻ, വിജ്ഞാന വ്യാപന വിദ്യാഭ്യാസ വിഭാഗം മേധാവി ഡോ. അലൻ തോമസ്, സഹവാസ പരിപാടി കോഡിനേറ്റർ ഡോ. അർച്ചന ആർ സത്യൻ,  വാർഡ് മെമ്പർമാരായ ഒ റാണി ചന്ദ്രിക, ശുഭ ജെ,  ദിവ്യ എ, കെ വി ശ്യാം, കാട്ടാക്കട കൃഷി ഓഫീസർ അദ്രിക ബി.വി., വിദ്യാർത്ഥി പ്രതിനിധികളായ സാറ ചിന്നു സാം, നവാഫ് വി. എന്നിവർ സംസാരിച്ചു. കാട്ടാക്കട പഞ്ചായത്തിലെ  ഇരുപതോളം കർഷകരെ പൊന്നാട  അണിയിച്ച് ആദരിച്ചു.
ഗ്രാമോദയയുടെ  ഭാഗമായി  പ്ലാവൂർ ഹൈസ്കൂളിൽ വച്ച് രാവിലെ കൂൺ കൃഷി പരിശീലനം നടത്തി. തുടർന്ന് വിദ്യാർത്ഥികളുടെ കലാപരിപാടികളും അരങ്ങേറി. മെയ് 7ന് നടക്കുന്ന സമാപന സമ്മേളനം കൃഷി മന്ത്രി പി. പ്രസാദ് ഉദ്ഘാടനം ചെയ്യും.