ഇന്ത്യൻ വ്യോമസേനയിൽ അഗ്നിവീർവായു (മ്യൂസിഷ്യൻ) നിയമനം; അപേക്ഷ ക്ഷണിച്ചു

ഇന്ത്യൻ വ്യോമസേനയുടെ അഗ്നിവീർവായു (മ്യൂസിഷ്യൻ) ഇൻടേക്ക് 01/2027 നിയമനത്തിനായി രാജ്യത്തെ അവിവാഹിതരായ യുവതിയുവാക്കളിൽ നിന്നും ഓൺലൈൻ അപേക്ഷ ക്ഷണിച്ചു. ഇന്ത്യയിലെ എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും എല്ലാ ജില്ലകളിലെയും യോഗ്യരായ ഉദ്യോഗാർത്ഥികൾക്ക് അപേക്ഷിക്കാം.

ഓൺലൈൻ രജിസ്ട്രേഷൻ 2026 ജൂലൈ 20 മുതൽ ആരംഭിച്ചിട്ടുണ്ടെന്നും ഓഗസ്റ്റ് 2 രാത്രി 11 മണിവരെ അപേക്ഷ സമർപ്പിക്കാമെന്നും അധികൃതർ അറിയിച്ചു. രജിസ്റ്റർ ചെയ്ത് പ്രൊവിഷണൽ അഡ്മിറ്റ് കാർഡ് ലഭിക്കുന്ന ഉദ്യോഗാർത്ഥികൾക്കു മാത്രമേ റിക്രൂട്ട്മെന്റ് റാലിയിൽ പങ്കെടുക്കാൻ കഴിയൂ.

റിക്രൂട്ട്മെന്റ് റാലി 2026 ഓഗസ്റ്റ് 31 മുതൽ സെപ്റ്റംബർ 9 വരെ ന്യൂഡൽഹിയിലും ബെംഗളൂരുവിലുമായി നടക്കും. ശാരീരികക്ഷമതാ പരീക്ഷ, ഇംഗ്ലീഷ് എഴുത്തുപരീക്ഷ, സംഗീത പ്രാവീണ്യ പരീക്ഷ, മെഡിക്കൽ പരിശോധന എന്നിവ തിരഞ്ഞെടുപ്പ് നടപടികളുടെ ഭാഗമാണ്.

യോഗ്യത: അപേക്ഷകർ 2005 ജനുവരി 1-നും 2009 ജൂലൈ 1-നും ഇടയിൽ ജനിച്ച അവിവാഹിതരായ ഇന്ത്യൻ പൗരന്മാരായിരിക്കണം. എസ്.എസ്.എൽ.സി/പത്താം ക്ലാസ് വിജയിച്ചിരിക്കണം. സംഗീതത്തിൽ പ്രാവീണ്യവും അംഗീകൃത സ്ഥാപനങ്ങളിൽ നിന്നുള്ള സംഗീത യോഗ്യതാ സർട്ടിഫിക്കറ്റോ തത്തുല്യ സംഗീതാനുഭവമോ ഉണ്ടായിരിക്കണം.

തിരഞ്ഞെടുക്കപ്പെടുന്നവർക്ക് നാല് വർഷത്തെ സേവനകാലം, ആകർഷകമായ ശമ്പളം, വിവിധ അലവൻസുകൾ, മെഡിക്കൽ-ഇൻഷുറൻസ് പരിരക്ഷ, സേവനാവസാനത്തിൽ ‘സേവാ നിധി’ ആനുകൂല്യം എന്നിവ ലഭിക്കും. മികച്ച പ്രകടനം കാഴ്ചവയ്ക്കുന്നവർക്ക് ഇന്ത്യൻ വ്യോമസേനയുടെ സ്ഥിരം കേഡറിലേക്ക് തിരഞ്ഞെടുക്കപ്പെടാനുള്ള അവസരവുമുണ്ട്.

താൽപര്യമുള്ള ഉദ്യോഗാർത്ഥികൾ യോഗ്യത, മെഡിക്കൽ മാനദണ്ഡങ്ങൾ, ആവശ്യമായ രേഖകൾ, അപേക്ഷാ നടപടിക്രമം എന്നിവ വിശദമായി പരിശോധിച്ച് നിശ്ചിത സമയപരിധിക്കകം ഓൺലൈനായി അപേക്ഷ സമർപ്പിക്കണം. ഓൺലൈൻ വിവരങ്ങൾക്ക് https://iafrecruitment.edcil.co.in