രോഹൻ കുന്നുമ്മലിന്റെ വെടിക്കെട്ട് ബാറ്റിങ്; കൊച്ചി ബ്ലൂ ടൈഗേഴ്സിനെതിരെ കാലിക്കറ്റ് ഗ്ലോബ്സ്റ്റാർസിന് 8 വിക്കറ്റ് ജയം

തിരുവനന്തപുരം: കേരള ക്രിക്കറ്റ് ലീഗിൽ (KCL) കൊച്ചി ബ്ലൂ ടൈഗേഴ്സിനെതിരെ അനായാസ വിജയവുമായി കാലിക്കറ്റ് ഗ്ലോബ്സ്റ്റാർസ്. എട്ട് വിക്കറ്റിനാണ് കാലിക്കറ്റ് കൊച്ചിയെ കീഴടക്കിയത്. ആദ്യം ബാറ്റ് ചെയ്ത കൊച്ചി ബ്ലൂ ടൈഗേഴ്സ് 20 ഓവറിൽ എട്ട് വിക്കറ്റ് നഷ്ടത്തിൽ 150 റൺസെടുത്തു. മറുപടിയായി കാലിക്കറ്റ് ഗ്ലോബ്സ്റ്റാർസ് 16 ഓവറിൽ രണ്ട് വിക്കറ്റ് നഷ്ടത്തിൽ 151 റൺസെടുത്ത് വിജയം സ്വന്തമാക്കി.

39 പന്തിൽ നാല് ഫോറും ഏഴ് സിക്സും ഉൾപ്പെടെ 78 റൺസെടുത്ത രോഹൻ കുന്നുമ്മലാണ് കാലിക്കറ്റിന്റെ വിജയശിൽപി. മികച്ച പ്രകടനത്തിന് രോഹനെ പ്ലെയർ ഓഫ് ദി മാച്ചായി തിരഞ്ഞെടുത്തു.

കൊച്ചിക്ക് 150 റൺസ്

മുൻനിര ബാറ്റർമാർക്ക് കാര്യമായ സംഭാവന നൽകാനാകാതെ പോയ മത്സരത്തിൽ മധ്യനിരയിലെ മനുകൃഷ്ണന്റെയും സച്ചിൻ സുരേഷിന്റെയും പ്രകടനമാണ് കൊച്ചിയെ ഭേദപ്പെട്ട സ്കോറിലെത്തിച്ചത്.

17 റൺസെടുത്ത ഓപ്പണർ വിപുൽ ശക്തിയാണ് ആദ്യം പുറത്തായത്. പിന്നാലെ മൊഹമ്മദ് ഷാനു അക്കൗണ്ട് തുറക്കാതെ മടങ്ങി. വിനൂപ് മനോഹരൻ 13 റൺസെടുത്ത് പുറത്തായതോടെ കൊച്ചി മൂന്ന് വിക്കറ്റ് നഷ്ടത്തിൽ 42 റൺസെന്ന നിലയിലായി. ക്യാപ്റ്റൻ സാലി സാംസനും 15 റൺസിൽ മടങ്ങി.

നാലാമനായി എത്തിയ മനുകൃഷ്ണൻ 26 പന്തിൽ 30 റൺസെടുത്ത് ഇന്നിങ്സിനെ തകർച്ചയിൽ നിന്ന് കരകയറ്റി. തുടർന്ന് സച്ചിൻ സുരേഷ് നടത്തിയ മികച്ച പോരാട്ടമാണ് കൊച്ചിയുടെ സ്കോർ 150ൽ എത്തിച്ചത്. 27 പന്തിൽ 42 റൺസുമായി സച്ചിൻ പുറത്താകാതെ നിന്നു.

കാലിക്കറ്റിനായി അഖിൻ സത്താറും അബ്ദുൾ ബാസിതും രണ്ട് വിക്കറ്റ് വീതം വീഴ്ത്തി.

രോഹൻ കുന്നുമ്മലിന്റെ വെടിക്കെട്ട്

151 റൺസ് വിജയലക്ഷ്യവുമായി ഇറങ്ങിയ കാലിക്കറ്റിന് തുടക്കത്തിൽ തന്നെ വരുൺ നായനാരുടെ വിക്കറ്റ് നഷ്ടമായി. ഏഴ് റൺസായിരുന്നു വരുൺ നേടിയത്.

എന്നാൽ രണ്ടാം വിക്കറ്റിൽ ഒന്നിച്ച രോഹൻ കുന്നുമ്മലും കെ.എസ്. അരവിന്ദും ചേർന്ന് കാലിക്കറ്റിന്റെ ഇന്നിങ്സ് അനായാസം മുന്നോട്ടുകൊണ്ടുപോയി. പതിവ് ആക്രമണ ശൈലിയിൽ ബാറ്റ് വീശിയ രോഹൻ കൊച്ചി ബൗളർമാരെ സമ്മർദത്തിലാക്കി.

39 പന്തിൽ നാല് ഫോറും ഏഴ് സിക്സും സഹിതം 78 റൺസെടുത്ത രോഹൻ വിജയത്തിന് തൊട്ടരികിലാണ് പുറത്തായത്. കെ.എസ്. അരവിന്ദ് 44 റൺസുമായി പുറത്താകാതെ നിന്നപ്പോൾ അഖിൽ സ്കറിയ 17 റൺസുമായി പുറത്താകാതെ നിന്നു.

കൊച്ചി ബ്ലൂ ടൈഗേഴ്സ് – 150/8 (20 ഓവർ)
കാലിക്കറ്റ് ഗ്ലോബ്സ്റ്റാർസ് – 151/2 (16 ഓവർ)

ഫലം: കാലിക്കറ്റ് ഗ്ലോബ്സ്റ്റാർസിന് 8 വിക്കറ്റ് ജയം.
പ്ലെയർ ഓഫ് ദി മാച്ച്: രോഹൻ കുന്നുമ്മൽ – 78 റൺസ്