മാധ്യമപ്രവർത്തകനും സീരിയൽ അഭിനേതാവുമായ രാഗീഷ് ഡി.ടി. അന്തരിച്ചു

അപൂർവ നാഡീവ്യൂഹ രോഗത്തെ തുടർന്ന് വെന്റിലേറ്ററിൽ ചികിത്സയിലായിരുന്നു; പുലർച്ചെ ഹൃദയാഘാതത്തെ തുടർന്ന് അന്ത്യം.

തിരുവനന്തപുരം: അപൂർവവും ഗുരുതരവുമായ നാഡീവ്യൂഹ രോഗമായ ‘അമാൻ’ ബാധിച്ച് വെന്റിലേറ്ററിൽ ചികിത്സയിലായിരുന്ന പ്രാദേശിക മാധ്യമപ്രവർത്തകനും സീരിയൽ അഭിനേതാവുമായ രാഗീഷ് ഡി.ടി. (48) അന്തരിച്ചു. ഹൃദയാഘാതത്തെ തുടർന്ന് ഇന്ന് പുലർച്ചെ തിരുവനന്തപുരത്തെ കിംസ് ആശുപത്രിയിലായിരുന്നു അന്ത്യം.

കാട്ടാക്കട സ്വദേശിയായ രാഗീഷ് വിവിധ പത്ര-ദൃശ്യ മാധ്യമങ്ങളുടെ പ്രാദേശിക ലേഖകനായി പ്രവർത്തിച്ചുവരികയായിരുന്നു. മാധ്യമപ്രവർത്തനത്തിനൊപ്പം ഏഷ്യാനെറ്റ്, ഫ്ലവേഴ്സ്, സീ കേരളം തുടങ്ങിയ ചാനലുകളിലെ സീരിയലുകളിലും അദ്ദേഹം സജീവ സാന്നിധ്യമായിരുന്നു.

പ്രാദേശിക ലേഖകരുടെ ഉന്നമനത്തിനായി സജീവമായി പ്രവർത്തിച്ചിരുന്ന രാഗീഷ് കേരള റിപ്പോർട്ടേഴ്സ് ആൻഡ് മീഡിയ പേഴ്സൺസ് യൂണിയൻ സംസ്ഥാന ട്രഷറർ സ്ഥാനവും വഹിച്ചുവരികയായിരുന്നു.

രോഗബാധിതനായി ആശുപത്രിയിൽ ചികിത്സയിൽ കഴിയുന്നതിനിടെ അദ്ദേഹത്തിന്റെ ആരോഗ്യനില വഷളായിരുന്നു. രാഗീഷിന്റെ ജീവിതത്തിനായി സുഹൃത്തുക്കളും സഹപ്രവർത്തകരും കുടുംബാംഗങ്ങളും നടത്തിയ പ്രാർഥനകൾക്കൊടുവിലാണ് ദുഃഖവാർത്തയെത്തിയത്.

രാവിലെ 9 മണിയോടെ മൃതദേഹം വീട്ടിലെത്തിക്കും. തുടർന്ന് ഉച്ചയ്ക്ക് 1 മണിയോടെ സംസ്കാരം നടത്തും.

ഭാര്യ റാണി. മക്കൾ ദേവകൃഷ്ണ, യുക്താപാർവതി.

രാഗീഷിന്റെ വിയോഗം മാധ്യമപ്രവർത്തകർക്കും കലാരംഗത്തുള്ളവർക്കും പ്രത്യേകിച്ച് പ്രാദേശിക മാധ്യമപ്രവർത്തകർക്കും തീരാനഷ്ടമാണ്.

അനന്തപുരി ഓണ്‍ലൈന്‍ ന്യൂസിന്റെ ആദരാഞ്ജലികള്‍