ഐ.ഡി.എസ്.എഫ്.എഫ്.കെ 2026: ഡെലിഗേറ്റ് രജിസ്‌ട്രേഷൻ സെപ്റ്റംബർ 10 മുതൽ; വിദ്യാർത്ഥി പാസുകൾ ഇരട്ടിയാക്കി

തിരുവനന്തപുരം: കേരള സംസ്ഥാന ചലച്ചിത്ര അക്കാദമി സംഘടിപ്പിക്കുന്ന 18-ാമത് രാജ്യാന്തര ഡോക്യുമെന്ററി, ഹ്രസ്വചിത്രമേള (ഐ.ഡി.എസ്.എഫ്.എഫ്.കെ) 2026-ൽ പങ്കെടുക്കുന്നതിനുള്ള ഡെലിഗേറ്റ് രജിസ്‌ട്രേഷൻ സെപ്റ്റംബർ 10ന് രാവിലെ 10 മണി മുതൽ ആരംഭിക്കും. സെപ്റ്റംബർ 25 മുതൽ 30 വരെ തിരുവനന്തപുരം കൈരളി, ശ്രീ, നിള തിയേറ്ററുകളിലാണ് മേള നടക്കുന്നത്.

ഓൺലൈൻ ഡെലിഗേറ്റ് രജിസ്‌ട്രേഷൻ registration.iffk.in എന്ന വെബ്‌സൈറ്റ് വഴി നടത്താം. പൊതുവിഭാഗത്തിന് ജി.എസ്.ടി ഉൾപ്പെടെ 590 രൂപയും വിദ്യാർത്ഥികൾക്ക് 354 രൂപയുമാണ് ഡെലിഗേറ്റ് ഫീസ്.

രാവിലെ 10 മണി മുതൽ കൈരളി തിയേറ്ററിൽ സജ്ജീകരിച്ചിരിക്കുന്ന ഡെലിഗേറ്റ് സെൽ വഴിയും ഓഫ്‌ലൈൻ രജിസ്‌ട്രേഷൻ നടത്താം. മാധ്യമപ്രവർത്തകർക്ക് അവരുടെ തിരിച്ചറിയൽ കാർഡ് മുഖേനയായിരിക്കും മേളയിൽ പ്രവേശനം അനുവദിക്കുക.

വിദ്യാർത്ഥി ഡെലിഗേറ്റ് പാസുകൾ 500 ആയി ഉയർത്തും

വിദ്യാർത്ഥികളുടെ പങ്കാളിത്തം വർധിപ്പിക്കുന്നതിന്റെ ഭാഗമായി ഇത്തവണ വിദ്യാർത്ഥി വിഭാഗത്തിന് കൂടുതൽ പ്രാതിനിധ്യം നൽകും. മുൻപ് 250 വിദ്യാർത്ഥി ഡെലിഗേറ്റ് പാസുകളാണ് അനുവദിച്ചിരുന്നതെങ്കിൽ, ഈ വർഷം മുതൽ അത് 500 ആയി ഉയർത്തും.

മേളയിൽ വിദ്യാർത്ഥികളുടെ പങ്കാളിത്തം കൂടുതൽ ശക്തമാക്കുന്നതിന്റെ ഭാഗമായാണ് ഡെലിഗേറ്റ് പാസുകളുടെ എണ്ണം ഇരട്ടിയാക്കുന്നത്.

300-ലേറെ ചിത്രങ്ങൾ പ്രദർശിപ്പിക്കും

ആറു ദിവസങ്ങളിലായി നടക്കുന്ന മേളയിൽ ഡോക്യുമെന്ററി, ഹ്രസ്വചിത്ര വിഭാഗങ്ങളിലായി 300-ലേറെ ചിത്രങ്ങൾ പ്രദർശിപ്പിക്കും. മത്സര, മത്സരേതര വിഭാഗങ്ങളിലായി ഡോക്യുമെന്ററികൾ, ഹ്രസ്വചിത്രങ്ങൾ, അനിമേഷൻ, മ്യൂസിക് വീഡിയോകൾ, ക്യാമ്പസ് ഫിലിംസ്, ഇന്റർനാഷണൽ ഫിലിംസ്, റെട്രോസ്‌പെക്റ്റീവ്, ജൂറി ഫിലിംസ് തുടങ്ങി മുപ്പതോളം വിഭാഗങ്ങളിലാണ് പ്രദർശനങ്ങൾ ഒരുക്കിയിരിക്കുന്നത്.

സമീപകാലത്ത് അന്തരിച്ച ചലച്ചിത്രപ്രവർത്തകർക്ക് ആദരാഞ്ജലിയർപ്പിക്കുന്ന ഹോമേജ് വിഭാഗവും മേളയുടെ ഭാഗമായി ഉണ്ടായിരിക്കും.

സംവിധായകരുമായി സംവദിക്കാം

മേളയിൽ പ്രദർശിപ്പിക്കുന്ന സിനിമകളുടെ സംവിധായകരുമായി ഡെലിഗേറ്റുകൾക്ക് നേരിട്ട് സംവദിക്കാനുള്ള അവസരവും ഒരുക്കിയിട്ടുണ്ട്. മീറ്റ് ദ ഡയറക്ടർ, ഫേസ് ടു ഫേസ്, ഇൻ കോൺവെർസേഷൻ, മാസ്റ്റർക്ലാസ് തുടങ്ങിയ പരിപാടികൾക്കൊപ്പം കലാ-സാംസ്‌കാരിക പരിപാടികളും മേളയുടെ ഭാഗമായി സംഘടിപ്പിക്കും.

ഡോക്യുമെന്ററി, ഹ്രസ്വചിത്ര മേഖലകളിലെ പുതിയ പ്രവണതകൾ പരിചയപ്പെടാനും ചലച്ചിത്രപ്രവർത്തകരുമായി ആശയവിനിമയം നടത്താനും അവസരം ഒരുക്കുന്ന ഐ.ഡി.എസ്.എഫ്.എഫ്.കെ 2026-ന് ഇത്തവണ കൂടുതൽ വിദ്യാർത്ഥി പങ്കാളിത്തവും പ്രതീക്ഷിക്കപ്പെടുന്നു.