നേപ്പാൾ പ്രളയം: 53 കേരളീയരെ കണ്ടെത്താൻ ഏകോപിത ശ്രമം; ചുമതല ചീഫ് സെക്രട്ടറിയുടെ ഓഫീസിന്

തിരുവനന്തപുരം: നേപ്പാളിലുണ്ടായ മിന്നൽ പ്രളയത്തിന്റെ പശ്ചാത്തലത്തിൽ അവിടെ കഴിയുന്ന 53 കേരളീയരെ കണ്ടെത്താനും അവരുടെ സുരക്ഷ ഉറപ്പാക്കാനും സംസ്ഥാന സർക്കാർ ഏകോപിതമായ നടപടികൾ ആരംഭിച്ചു. വിവിധ ഹെൽപ്പ് ലൈനുകളിൽ ലഭിച്ച വിവരങ്ങൾ ക്രോഡീകരിച്ചാണ് 53 കേരളീയരെ തിരിച്ചറിഞ്ഞതെന്ന് നോർക്ക റൂട്ട്സ് ചീഫ് എക്സിക്യൂട്ടീവ് ഓഫീസർ രാജേഷ് മാധവൻ അറിയിച്ചു.

മുഖ്യമന്ത്രിയുടെ ഓഫീസിലെ ഹെൽപ്പ് ലൈൻ, ചീഫ് സെക്രട്ടറിയുടെ ഓഫീസ്, കേരള സംസ്ഥാന ദുരന്ത നിവാരണ അതോറിറ്റിയുടെ ഹെൽപ്പ് ലൈൻ, നോർക്ക റൂട്ട്സ് ഹെൽപ്പ് ലൈൻ എന്നിവിടങ്ങളിൽ ലഭിച്ച വിവരങ്ങളാണ് ഇതിനായി ഏകോപിപ്പിച്ചത്.

തിരിച്ചറിഞ്ഞ 53 പേരിൽ മുതിർന്നവരും കുട്ടികളും കുടുംബാംഗങ്ങളും ഉൾപ്പെടുന്നു. ചിലർ കുടുംബത്തോടൊപ്പവും മറ്റുചിലർ വിവിധ സംഘങ്ങളായുമാണ് നേപ്പാളിലെത്തിയത്. അവധിക്കാല യാത്ര, തീർത്ഥാടനം, ട്രക്കിങ് തുടങ്ങിയ ആവശ്യങ്ങൾക്കായാണ് ഇവർ നേപ്പാളിൽ എത്തിയതെന്നാണ് ലഭിച്ചിരിക്കുന്ന വിവരം.

പ്രാഥമിക വിലയിരുത്തൽ: എല്ലാവരും സുരക്ഷിതർ

നിലവിൽ ലഭിക്കുന്ന വിവരങ്ങളുടെ അടിസ്ഥാനത്തിൽ 53 പേരും സുരക്ഷിതരാണെന്നാണ് പ്രാഥമിക വിലയിരുത്തൽ. ഭൂരിഭാഗം പേരുടെയും ഫോൺ നമ്പറുകൾ ശേഖരിച്ചിട്ടുണ്ടെങ്കിലും നേപ്പാളിലെ നെറ്റ്‌വർക്ക് തടസ്സം മൂലം പലരുമായി നേരിട്ട് ബന്ധപ്പെടാൻ സാധിച്ചിട്ടില്ല.

പ്രളയത്തെ തുടർന്ന് നേപ്പാളിൽ യാത്രാ സംവിധാനങ്ങൾക്കും തടസ്സം നേരിടുന്നുണ്ട്. ഇതും രക്ഷാപ്രവർത്തനങ്ങളും നേരിട്ടുള്ള ആശയവിനിമയവും ദുഷ്കരമാക്കുന്നുണ്ട്.

ചീഫ് സെക്രട്ടറിയുടെ ഓഫീസ് പ്രധാന ഏകോപന കേന്ദ്രം

കേരള ചീഫ് സെക്രട്ടറിയുടെ ഓഫീസ് പ്രധാന ഏകോപന കേന്ദ്രമായി പ്രവർത്തിക്കുന്നുണ്ട്. കേന്ദ്ര വിദേശകാര്യ മന്ത്രാലയവുമായി നേരിട്ട് ബന്ധപ്പെട്ട് ലഭിക്കുന്ന വിവരങ്ങൾ കൈമാറുകയും പുതിയ വിവരങ്ങൾ ശേഖരിക്കുകയും ചെയ്യുന്നുണ്ട്.

നോർക്ക റൂട്ട്സിന്റെ ഡൽഹി എൻആർകെ ഡെവലപ്മെന്റ് ഓഫീസും കേരള ഹൗസ് റസിഡന്റ് കമ്മീഷണറുടെ ഓഫീസും വിദേശകാര്യ മന്ത്രാലയവുമായി ബന്ധപ്പെട്ട് പ്രവർത്തിക്കുന്നുണ്ട്.

നേപ്പാളിലുള്ളവരുടെ ബന്ധുക്കളുമായി ഇടവേളകളിൽ നിരന്തരം ആശയവിനിമയം നടത്തി പുതിയ വിവരങ്ങൾ ശേഖരിക്കുകയും ഹെൽപ്പ് ഡെസ്കിലെ വിവരങ്ങൾ പുതുക്കുകയും ചെയ്യുന്നുണ്ട്.

കാഞ്ഞങ്ങാട്, കോട്ടയം സംഘങ്ങൾ സുരക്ഷിതർ

കാഞ്ഞങ്ങാട്ടുനിന്ന് നേപ്പാളിലേക്ക് യാത്ര ചെയ്ത 36 പേരടങ്ങുന്ന സംഘവും കോട്ടയത്തുനിന്നുള്ള 16 പേരടങ്ങുന്ന സംഘവും സുരക്ഷിതരാണെന്ന് നേരത്തെ തന്നെ സ്ഥിരീകരിച്ചതായി രാജേഷ് മാധവൻ അറിയിച്ചു. ഇവരുമായി നേരിട്ട് ബന്ധപ്പെടാനും കഴിഞ്ഞിട്ടുണ്ട്.

അതേസമയം, ഈ രണ്ട് സംഘങ്ങളും നിലവിൽ തിരിച്ചറിഞ്ഞ 53 കേരളീയരുടെ പട്ടികയിൽ ഉൾപ്പെടുന്നതല്ലെന്നും നോർക്ക റൂട്ട്സ് വ്യക്തമാക്കി.

നേപ്പാളിലെ സ്ഥിതിഗതികൾ വിലയിരുത്തുന്നതിനൊപ്പം കേരളത്തിൽ നിന്നുള്ളവരുടെ സുരക്ഷ സംബന്ധിച്ച വിവരങ്ങൾ ശേഖരിച്ച് ആവശ്യമായ ഇടപെടലുകൾ ഏകോപിപ്പിച്ചുവരികയാണ് സംസ്ഥാന സർക്കാർ.