ബ്ലാക്ക് മാർച്ച് യൂത്ത് കോൺഗ്രസ് ക്ലിഫ് ഹൗസ് മാർച്ചിൽ സംഘർഷം: ജലപീരങ്കി, ഗ്രനേഡ്, ലാത്തിചാർജ്

നികുതി ഭീകരതക്കെതിരെ സമരം ചെയ്യുന്ന യൂത്ത് കോൺഗ്രസ് പ്രവർത്തകരെ ക്രൂരമായി തല്ലിചതച്ചതിൽ പ്രതിഷേധിച്ചും, യൂത്ത് കോൺഗ്രസ്സ് സംസ്ഥാന പ്രസിഡന്റ് ഷാഫി പറമ്പിലിനെ പോലീസ് കയ്യേറ്റം ചെയ്യാൻ ശ്രമിച്ചതിനെതിരെയും യൂത്ത് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ ക്ലിഫ് ഹൗസിലേക്ക് ബ്ലാക്ക് മാർച്ച് നടത്തി. ഉച്ചക്ക് 1 മണിയോടെ രാജ്ഭവന് മുന്നിൽ നിന്നും ആരംഭിച്ച സമരത്തിൽ പങ്കെടുത്തവർ കറുത്ത വസ്ത്രം ധരിച്ചാണ് മാർച്ചിൽ പങ്കെടുത്തത്. മുഖ്യമന്ത്രിക്കെതിരെയുള്ള പ്രതിഷേധം കണക്കിലെടുത്ത് കറുപ്പിന് വിലക്കേർപ്പെടുത്തിയ സാഹചര്യത്തിലാണ് മുഖ്യമന്ത്രിയുടെ വസതിയിലേക്ക് യൂത്ത് കോൺഗ്രസ് പ്രവർത്തകർ കറുത്ത വസ്ത്രം ധരിച്ച് കരിങ്കൊടിയുമായി സമരം ചെയ്തത്.

പ്രകടനമായി എത്തിയ പ്രവർത്തകർ വന്നയുടൻ തന്നെ ബാരിക്കേഡ് മറികടക്കാൻ ശ്രമിച്ചതിനെ
തുടർന്ന് മൂന്ന് റൗണ്ട് ജലപീരങ്കി പ്രയോഗിച്ചു. എന്നിട്ടും പിരിഞ്ഞ് പോകാത്ത പ്രവർത്തകർക്കെതിരെ നിരവധി തവണ ടിയർ ഗ്യാസും, ഗ്രനേഡും പോലീസ് പ്രയോഗിച്ചു. ഗ്രനേഡ് പ്രയോഗത്തിനിടയിൽ യൂത്ത് കോൺഗ്രസ് പ്രവർത്തകൻ ലിജിത് പാറശാലയുടെ കണ്ണിന് ഗുരുതര പരിക്കേറ്റു. ഇതിൽ പ്രതിഷേധിച്ച് യൂത്ത് കോൺഗ്രസ് പ്രവർത്തകരും, പോലീസും തമ്മിൽ ഉന്തും, തള്ളും വാക്കേറ്റവും രൂക്ഷമായതോടെ പോലീസ് പ്രവർത്തകർക്ക് നേരെ ലാത്തി വീശി. ചിതറി ഓടിയ പ്രവർത്തകരെ പോലീസ് വളഞ്ഞിട്ട് തല്ലി. പിരിഞ്ഞ് പോയ പ്രവർത്തകർ വീണ്ടും സംഘടിച്ചെത്തി ബാരിക്കേഡിനടുത്ത് നിലയുറപ്പിച്ച് മുദ്രാവാക്യം വിളിക്കുകയും പൊലീസ് മർദ്ദനത്തിൽ പ്രതിഷേധിക്കുകയും ചെയ്തു.

നികുതി വർദ്ദധനവിനെതിരെയുള്ള സമരത്തെ പോലീസ് ക്രിമിനലുകളെ
ഇറക്കി അടിച്ചമർത്താനുള്ള ശ്രമത്തെ യൂത്ത് കോൺഗ്രസ് ശക്തമായി പ്രതിരോധിക്കുമെന്നും , പോലീസ് മര്യാദയോടെ പെരുമാറാൻ പഠിക്കണം. യൂത്ത് കോൺഗ്രസ് സമരം ശക്തമാക്കുമെന്നും യൂത്ത് കോൺഗ്രസ് ജില്ലാ പ്രസിഡന്റ് സുധീർഷാ പാലോട് പറഞ്ഞു.

സമരത്തിന് യൂത്ത് കോൺഗ്രസ്സ് ജില്ലാ പ്രസിഡൻ്റ് സുധീർഷാ പാലോട്, സംസ്ഥാന ഭാരവാഹികളായ ഷജീർ നേമം, ജെ.എസ് അഖിൽ, അനൂപ് ബി. എസ്, ശരത് എ.ജി, അരുൺ എസ്.പി, വീണ എസ് നായർ, കെ.എഫ് ഫെബിൻ, അരുൺ സി.എസ്, അജയ് കുര്യാത്തി, രജിത് രവീന്ദ്രൻ, ജില്ലാ ഭാരവാഹികളായ ഷാജി മലയിൻകീഴ്, ഹാഷിം റഷീദ്, അബീഷ് എസ്, പ്രതീഷ് മുരളി, അനൂപ് പാലിയോട് , പ്രമോദ് എസ്, മൈക്കിൾ രാജ് ഋഷി കൃഷ്ണൻ, അക്രം അർഷാദ്, മാഹീൻ പഴഞ്ചിറ, അച്ചു ഘോഷ്, അഭിജിത് എസ്.കെ, ഫൈസൽ, ഷമീർഷാ , ബിനോയ് ചന്ദ്രൻ, വിപിൻ ലാൽ, ഡാനിയൽ, അനസ് ആറ്റിങ്ങൽ, ജോയ് ശശിധരൻ തുടങ്ങിയവർ നേതൃത്വം നൽകി.