കെട്ടിപ്പടുക്കാം ശോഭനമായ ഭാവി: ലഹരി വിരുദ്ധ റാലി സംഘടിപ്പിച്ച് മരിയൻ എൻജിനീയറിങ് കോളേജ്

കഴക്കൂട്ടം: മരിയൻ എൻജിനീയറിങ് കോളേജും കേരള സ്റ്റേറ്റ് എക്സൈസ് സ്റ്റാഫ് അസോസിയേഷൻ തിരുവനന്തപുരം ജില്ലാ കമ്മിറ്റിയും സംയുക്തമായി സംഘടിപ്പിച്ച ലഹരി വിരുദ്ധ റാലി ‘ഡ്രീം കേരള‘ യുടെ സമാപന സമ്മേളനം നഗര ഹൃദയമായ മാനവീയം വീഥിയിൽ ബഹു: തദ്ദേശസ്വയംഭരണ എക്സൈസ് വകുപ്പ് മന്ത്രി ശ്രീ എം. ബി. രാജേഷ് ഉദ്ഘാടനം ചെയ്തു.

മയക്കുമരുന്ന് ഉൾപ്പെടെയുള്ള ലഹരി വർജിക്കേണ്ടതിന്റെ ആവശ്യകത യുവതലമുറയിലേക്ക് എത്തിക്കുന്ന ഉത്തരവാദിത്വം ലക്ഷ്യമിട്ടു, ‘കെട്ടിപ്പടുക്കാം ശോഭനമായ ഭാവി‘ എന്ന സന്ദേശത്തോടെ നടന്ന റാലി തിരുവനന്തപുരത്തെ വിവിധ നിയോജക മണ്ഡലങ്ങളിലൂടെ കടന്നുവന്നു. മരിയൻ എൻജിനീയറിങ് കോളേജിലെയും മരിയൻ കോളേജ് ഓഫ് ആർക്കിടെക്ചറിലെയും വിദ്യാർത്ഥികൾ, ലഹരി വിരുദ്ധ സന്ദേശം പകരുന്ന കലാവിഷ്കാരങ്ങൾ അവതരിപ്പിച്ചു.

ചടങ്ങിൽ എക്സൈസ് കമ്മീഷണർ ശ്രീ. മഹിപ്പാൽ യാദവ് ഐപിഎസ്, എംഎൽഎമാരായ ശ്രീ. വി. ജോയ്, അഡ്വക്കേറ്റ് ഐ. ബി. സതീഷ്, ശ്രീ. വി. കെ. പ്രശാന്ത്, അഡ്വക്കേറ്റ് ഡി. കെ. മുരളി, മരിയൻ എൻജിനീയറിങ് കോളേജ് മാനേജർ റെവ. ഫാ. ഡോ. എ. ആർ.ജോൺ, ജില്ലാ പഞ്ചായത്ത് പ്രസിഡൻറ് അഡ്വ.ഡി. സുരേഷ് കുമാർ, വിശാഖ് എം, മരിയൻ എഞ്ചിനീയറിംഗ് കോളേജ് പി. ആർ. ഒ. അഭിജിത് ആർ. പി എന്നിവർ സന്നിഹിതരായിരുന്നു. ലഹരിക്ക് എതിരായ സന്ദേശം യുവതലമുറയിലേക്ക് എത്തിക്കാൻ സംഘടിപ്പിച്ച റാലിയെ, വേദിയെ അഭിസംബോധന ചെയ്ത എല്ലാ പ്രാസംഗികരും അനുമോദിച്ചു.