കഴക്കൂട്ടം സൈനിക സ്കൂളിൽ ഭൂഗോള പ്രദക്ഷിണത്തെയും എവറസ്റ്റ് പര്യവേഷണത്തെയും കുറിച്ച് പ്രഭാഷണം സംഘടിപ്പിച്ചു

കഴക്കൂട്ടം സൈനിക സ്കൂളിൽ “ഭൂഗോള പ്രദക്ഷിണത്തെയും എവറസ്റ്റ് പര്യവേഷണത്തെയുംക്കുറിച്ചുള്ള സംഭാഷണം” എന്ന പേരിൽ പ്രചോദനാത്മകമായ ഒരു പ്രഭാഷണവും സംവേദനാത്മക സെഷനും സംഘടിപ്പിച്ചു. ധൈര്യം, പ്രതിരോധശേഷി, ദൃഢനിശ്ചയം എന്നിവയെ ഉദാഹരിക്കുന്ന ശ്രദ്ധേയമായ നേട്ടങ്ങളുള്ള വിശിഷ്ട വ്യക്തികളുമായി സംവദിക്കാനുള്ള അപൂർവ അവസരം സ്കൂൾ കേഡറ്റുകൾക്ക് ലഭിച്ചു.

ഐ.എൻ.എസ്‌.വി തരിണിയിൽ ലോകം ചുറ്റി ചരിത്രം സൃഷ്ടിച്ച ഇന്ത്യൻ നാവികസേനയിലെ ഉദ്യോഗസ്ഥരായ, ശൗര്യ ചക്ര ലഭിച്ച ലെഫ്റ്റനന്റ് കമാൻഡർ ദിൽന കെ, ലെഫ്റ്റനന്റ് കമാൻഡർ രൂപ.എ എന്നിവർ ചടങ്ങിൽ പങ്കെടുത്തു. എവറസ്റ്റ് കീഴടക്കിയ പർവതാരോഹകയായ ശ്രീമതി സുഹ്‌റ ചെറുകപ്പള്ളിയും അവരോടൊപ്പം ഉണ്ടായിരുന്നു. കേരള, ലക്ഷദ്വീപ് എൻസിസി ഡയറക്ടറേറ്റിലെ ഡയറക്ടർ കേണൽ പ്രമോദ് എം; കഴക്കൂട്ടം സൈനിക് സ്കൂൾ പ്രിൻസിപ്പൽ കേണൽ ധീരേന്ദ്ര കുമാർ; അഡ്മിനിസ്ട്രേറ്റീവ് ഓഫീസർ കമാൻഡർ എബ്രഹാം ഫിലിപ്പ്, സീനിയർ മാസ്റ്റർ, ഓൾഡ് ബോയ്‌സ് അസോസിയേഷൻ (1999 ബാച്ച്) പ്രതിനിധികൾ; ഫാക്കൽറ്റി അംഗങ്ങൾ, ജീവനക്കാർ, കേഡറ്റുകൾ എന്നിവർ ചടങ്ങിൽ പങ്കെടുത്തു.

“തിരമാലകൾ സൃഷ്ടിക്കലും ചരിത്രം സൃഷ്ടിക്കലും” എന്ന തലക്കെട്ടിൽ നടന്ന ആകർഷകമായ അവതരണത്തിൽ, ലെഫ്റ്റനന്റ് കമാൻഡർ ദിൽന കെ, ലെഫ്റ്റനന്റ് കമാൻഡർ രൂപ എ എന്നിവർ ഐഎൻഎസ്വി തരിണിയിൽ ലോക സമുദ്രങ്ങളിലൂടെയുള്ള തങ്ങളുടെ അവിസ്മരണീയമായ യാത്രയെ കുറിച്ച് വിവരിച്ചു. ചരിത്രപരമായ പര്യവേഷണത്തിനിടെ അവർ നേരിട്ട വെല്ലുവിളികൾ ഫോട്ടോ, വീഡിയോ എന്നിവയിലൂടെ അവതരിപ്പിച്ച് കൊണ്ട് പങ്കുവെച്ചു. ടീം വർക്ക്, അച്ചടക്കം, സ്ഥിരോത്സാഹം, സൂക്ഷ്മമായ ആസൂത്രണം, മാനസിക പ്രതിരോധം എന്നിവയുടെ പ്രാധാന്യം എടുത്തുകാണിച്ചു. അവരുടെ പ്രചോദനാത്മകമായ വിവരണം കാഡറ്റുകളെ നിർഭയമായി സ്വപ്നം കാണാനും, വെല്ലുവിളികളെ സ്വീകരിക്കാനും, മികവ് തേടുന്നതിൽ ഉറച്ചുനിൽക്കാനും പ്രോത്സാഹിപ്പിച്ചു.

എവറസ്റ്റ് കീഴടക്കിയതിന്റെ വിജയകരമായ കഥ ശ്രീമതി സുഹ്‌റ ചെറുകപ്പള്ളി അവതരിപ്പിച്ചു. ലോകത്തിലെ ഏറ്റവും ഉയർന്ന കൊടുമുടി കീഴടക്കാൻ ആവശ്യമായ ശാരീരിക സഹിഷ്ണുത, മാനസിക ശക്തി, അചഞ്ചലമായ ദൃഢനിശ്ചയം എന്നിവയെക്കുറിച്ച് അവർ സംസാരിച്ചു. സമർപ്പണം, ധൈര്യം, അശ്രാന്ത സ്ഥിരോത്സാഹം എന്നിവയില്ലാതെ ഒരു ലക്ഷ്യവും കൈവരിക്കാനാവില്ല എന്ന സന്ദേശത്തെ അവരുടെ പ്രസംഗം ശക്തിപ്പെടുത്തി.

ആത്മവിശ്വാസത്തോടെയും, സ്ഥിരോത്സാഹത്തോടെയും, സത്യസന്ധതയോടെയും എല്ലാ വെല്ലുവിളികളെയും നേരിടാൻ ഈ പരിപാടി കേഡറ്റുകളെ പ്രചോദിപ്പിച്ചു. ജീവിതത്തിന്റെ എല്ലാ മേഖലകളിലും മികവ് പുലർത്താനും അവരുടെ പൂർണ്ണമായ കഴിവുകൾ തിരിച്ചറിയാനും അവർക്ക് പ്രചോദനം നൽകി.