തിരുവനന്തപുരം SAT ആശുപത്രിയിൽ നവജാതശിശുവിനെ ക്ലോസറ്റിൽ ഉപേക്ഷിച്ചു; യുവതി കസ്റ്റഡിയിൽ

തിരുവനന്തപുരം, ഓഗസ്റ്റ് 03, 2026: തിരുവനന്തപുരം എസ്എടി ആശുപത്രിയിൽ മാസം തികയാതെ പ്രസവിച്ച കുഞ്ഞിനെ ക്ലോസറ്റിൽ ഉപേക്ഷിച്ച സംഭവത്തിൽ ഞെട്ടൽ. വണ്ടിത്തടം സ്വദേശിനിയായ ഗ്രീഷ്മ (20) എന്ന യുവതിയെ പോലീസ് കസ്റ്റഡിയിലെടുത്തു. ഗർഭം അലസിപ്പിക്കാനുള്ള മരുന്ന് കഴിച്ചതിനെ തുടർന്നാണ് യുവതി ആശുപത്രിയിൽ ചികിത്സ തേടിയെത്തിയത്.

ഞായറാഴ്ച വൈകീട്ട് ഏഴരയോടെ രക്തസ്രാവമുണ്ടെന്ന് പറഞ്ഞാണ് ഗ്രീഷ്മ ആശുപത്രിയിലെത്തിയത്. നേരത്തെ ഗർഭം അലസിപ്പിക്കാനുള്ള ഗുളിക കഴിച്ചിരുന്നതാണ് രക്തസ്രാവത്തിന് കാരണമെന്ന് ആശുപത്രി അധികൃതർ പറയുന്നു. എസ്എടി ആശുപത്രിയിലെ വെയിറ്റിങ് ഏരിയയ്ക്ക് സമീപമുള്ള ശുചിമുറിയിൽ വെച്ചാണ് ഗ്രീഷ്മ കുഞ്ഞിനെ പ്രസവിച്ചതും ക്ലോസറ്റിൽ ഉപേക്ഷിച്ചതും.

ഏകദേശം ഒരു മണിക്കൂറോളം ഗ്രീഷ്മ ശുചിമുറിയിൽ ചിലവഴിച്ചു. പുറത്തിറങ്ങിയപ്പോൾ വസ്ത്രത്തിൽ രക്തക്കറയുണ്ടായിരുന്നത് അവിടെയുണ്ടായിരുന്നവരുടെ ശ്രദ്ധയിൽപ്പെട്ടു. കൂടാതെ, ശുചിമുറിയിൽ കയറുമ്പോൾ നിറവയറുണ്ടായിരുന്ന യുവതി പുറത്തിറങ്ങിയപ്പോൾ വയറിന്റെ വലിപ്പം കുറഞ്ഞതും സംശയത്തിനിടയാക്കി. തുടർന്ന് ചോദ്യം ചെയ്തപ്പോൾ താൻ ഗർഭിണിയായിരുന്നുവെന്നും ശുചിമുറിയിൽ വെച്ച് ഗർഭം അലസിയെന്നും ഗ്രീഷ്മ പറഞ്ഞു.

വിവരമറിഞ്ഞ ആശുപത്രി അധികൃതർ പോലീസിനെയും ഫയർഫോഴ്സിനെയും അറിയിച്ചു. ശുചിമുറി പരിശോധിച്ചപ്പോൾ കുഞ്ഞ് ക്ലോസറ്റിൽ വീണതായും ഫ്ളഷ് ചെയ്യപ്പെട്ടതായും കണ്ടെത്തി. ഫയർഫോഴ്സ് സ്ഥലത്തെത്തി ടാങ്ക് പൊളിച്ച് കുഞ്ഞിനെ പുറത്തെടുത്തെങ്കിലും അപ്പോഴേക്കും കുഞ്ഞ് മരിച്ചിരുന്നു.

അവിവാഹിതയായ ഗ്രീഷ്മ ഗർഭിണിയായതിലുള്ള അഭിമാനക്ഷതം ഭയന്നാണ് ഈ ക്രൂരകൃത്യം ചെയ്തതെന്നാണ് പോലീസിന്റെ പ്രാഥമിക നിഗമനം. ഗ്രീഷ്മയുടെ കൂടെ മറ്റാരെങ്കിലും ഉണ്ടായിരുന്നോ എന്ന കാര്യത്തിൽ വ്യക്തതയില്ല. നിലവിൽ പോലീസ് കസ്റ്റഡിയിലുള്ള ഗ്രീഷ്മ രക്തസ്രാവത്തെ തുടർന്ന് ആശുപത്രിയിൽ ചികിത്സയിലാണ്.