നേപ്പാൾ പ്രളയം: കേരളീയർക്ക് അടിയന്തര സഹായവുമായി നോർക്ക ഹെൽപ്പ് ഡെസ്ക്; ഹെൽപ്പ് ലൈൻ നമ്പറുകൾ പുറത്ത്

തിരുവനന്തപുരം: നേപ്പാളിലുണ്ടായ മിന്നൽ പ്രളയത്തിന്റെ പശ്ചാത്തലത്തിൽ ദുരിതത്തിലായ കേരളീയർക്ക് അടിയന്തര സഹായവും സേവനങ്ങളും വിവരങ്ങളും ലഭ്യമാക്കുന്നതിനായി നോർക്ക റൂട്ട്സ് ഹെൽപ്പ് ഡെസ്ക് ആരംഭിച്ചു. മുഖ്യമന്ത്രിയുടെ ഓഫീസിന്റെ നിർദേശപ്രകാരമാണ് ഹെൽപ്പ് ഡെസ്ക് ആരംഭിച്ചതെന്ന് നോർക്ക റൂട്ട്സ് ചീഫ് എക്സിക്യൂട്ടീവ് ഓഫീസർ രാജേഷ് മാധവൻ അറിയിച്ചു.

നേപ്പാളിലെ ദുരന്തബാധിത പ്രദേശങ്ങളിൽ കുടുങ്ങിക്കിടക്കുന്ന മലയാളികൾക്ക് ആവശ്യമായ സഹായം ലഭ്യമാക്കുന്നതിനും വിവരങ്ങൾ കൈമാറുന്നതിനുമായി നോർക്ക ഗ്ലോബൽ കോൺടാക്ട് സെന്ററിന്റെ ഹെൽപ്പ് ലൈൻ നമ്പറുകളിൽ ബന്ധപ്പെടാം.

നോർക്ക ഹെൽപ്പ് ലൈൻ:

1800 425 3939 – ടോൾ ഫ്രീ
+91 88020 12345 – വിദേശത്തുനിന്ന് മിസ്ഡ് കോൾ സേവനം

നേപ്പാളിലെ രക്ഷാപ്രവർത്തനങ്ങളും സഹായ നടപടികളും ഏകോപിപ്പിക്കുന്നതിനായി ഡൽഹിയിലെ എൻ.ആർ.കെ ഡെവലപ്മെന്റ് ഓഫീസറെയും ചുമതലപ്പെടുത്തിയിട്ടുണ്ട്.

ഇന്ത്യൻ എംബസിയും ഹെൽപ്പ് ലൈൻ തുറന്നു

നേപ്പാളിലെ പ്രളയത്തിൽ അപകടത്തിൽപ്പെട്ട ഇന്ത്യൻ പൗരന്മാരെ എത്രയും വേഗം സുരക്ഷിതമായി പുറത്തെത്തിക്കുന്നതിനും രക്ഷാപ്രവർത്തനങ്ങൾ ഏകോപിപ്പിക്കുന്നതിനുമായി നേപ്പാൾ സർക്കാരുമായി നിരന്തരം ബന്ധപ്പെടുന്നുണ്ടെന്ന് ഇന്ത്യൻ എംബസി അറിയിച്ചു.

പ്രളയബാധിതരായ ഇന്ത്യൻ പൗരന്മാർക്ക് അടിയന്തര സഹായം ലഭ്യമാക്കുന്നതിനായി ഇന്ത്യൻ എംബസി പ്രത്യേക ഹെൽപ്പ് ലൈൻ നമ്പറുകളും ആരംഭിച്ചിട്ടുണ്ട്.

ഇന്ത്യൻ എംബസി ഹെൽപ്പ് ലൈൻ:

+977 985 131 6807
+977 970 910 7500

നേപ്പാളിലെ ദുരന്തബാധിത പ്രദേശങ്ങളിൽ കുടുങ്ങിയ ഇന്ത്യക്കാരും മലയാളികളും അടിയന്തര സാഹചര്യങ്ങളിൽ ബന്ധപ്പെട്ട ഹെൽപ്പ് ലൈൻ നമ്പറുകളിൽ ബന്ധപ്പെടണമെന്ന് അധികൃതർ അറിയിച്ചു.