കുട്ടികളുടെ സമഗ്രമായ ആദ്യകാല വളർച്ച: യുണിസെഫുമായി ചേർന്ന് മാധ്യമ ശിൽപശാല സംഘടിപ്പിച്ച് പി. ഐ. ബി.

തിരുവനന്തപുരം: കുട്ടികളുടെ സമഗ്രമായ ആദ്യകാല വളർച്ച, വികസന കാലതാമസങ്ങൾ, വൈകല്യങ്ങൾ എന്നിവ നേരത്തേ തിരിച്ചറിയുന്നതിനും ആവശ്യമായ പരിചരണവും പിന്തുണയും ഉറപ്പാക്കുന്നതിനുമായി പ്രസ് ഇൻഫർമേഷൻ ബ്യൂറോ (പി.ഐ.ബി) തിരുവനന്തപുരവും യുണിസെഫും സംയുക്തമായി മാധ്യമപ്രവർത്തകർക്കായി ഏകദിന ശിൽപശാല സംഘടിപ്പിച്ചു. ‘കുട്ടികളുടെ സമഗ്രമായ ആദ്യകാല വളർച്ച’ എന്ന വിഷയത്തെ ആസ്പദമാക്കിയായിരുന്നു പരിപാടി.

യുണിസെഫ് കമ്മ്യൂണിക്കേഷൻസ് സ്പെഷ്യലിസ്റ്റ് ശ്യാം സുധീർ ബണ്ടി ആമുഖ പ്രഭാഷണം നടത്തി. ആരോഗ്യപ്രശ്നങ്ങൾ കുടുംബങ്ങൾക്ക് വലിയ സാമ്പത്തിക ബാധ്യത സൃഷ്ടിക്കുന്നതായി അദ്ദേഹം ചൂണ്ടിക്കാട്ടി. ഈ ബാധ്യത കുറയ്ക്കുന്നതിനായി സർക്കാരുകൾ ഫലപ്രദമായ ഇടപെടലുകൾ നടത്തണമെന്നും അദ്ദേഹം ആവശ്യപ്പെട്ടു. വൈകല്യങ്ങളുമായി ബന്ധപ്പെട്ട വാർത്തകൾ തയ്യാറാക്കുമ്പോൾ മാധ്യമപ്രവർത്തകർ സാങ്കേതികവിദ്യ ഫലപ്രദമായി പ്രയോജനപ്പെടുത്തണമെന്നും അദ്ദേഹം അഭിപ്രായപ്പെട്ടു.

സമൂഹത്തിൽ പാർശ്വവൽക്കരിക്കപ്പെടുന്ന വിഭാഗങ്ങളെ തിരിച്ചറിയുന്നതിനും അവരുടെ പ്രശ്നങ്ങളിൽ ഫലപ്രദമായി ഇടപെടുന്നതിനും മാധ്യമങ്ങൾക്ക് നിർണായക പങ്കുണ്ടെന്ന് പി.ഐ.ബി അഡീഷണൽ ഡയറക്ടർ ജനറൽ വി. പളനിച്ചാമി ഐ.ഐ.എസ് പറഞ്ഞു. സമൂഹത്തിൽ സഹാനുഭൂതിയും അവബോധവും വളർത്തുന്നതിലും മാധ്യമങ്ങൾക്ക് വലിയ സംഭാവന നൽകാനാകുമെന്ന് അദ്ദേഹം വ്യക്തമാക്കി.

ഗൂഗിൾ ന്യൂസ് ഇനിഷ്യേറ്റീവ് ഇന്ത്യ നെറ്റ്‌വർക്ക് പരിശീലകനും നിർമിതബുദ്ധി (എ.ഐ.) വിദഗ്ധനുമായ മുരളീകൃഷ്ണ ചിന്നദുരൈ, ഫലപ്രദമായ കഥാഖ്യാനത്തിന് നിർമിതബുദ്ധി ഉപയോഗിക്കുന്നതിനെക്കുറിച്ച് ക്ലാസ് നയിച്ചു.

യുണിസെഫ് ഇന്ത്യയിലെ ആരോഗ്യ വിഭാഗം മേധാവിയും കമ്മ്യൂണിക്കേഷൻസ് സ്പെഷ്യലിസ്റ്റുമായ ഡോ. വിവേക് വീരേന്ദ്ര സിങ് കുട്ടികളുടെ സമഗ്രമായ ആദ്യകാല വളർച്ചയെക്കുറിച്ച് വിശദീകരിച്ചു. സ്പെക്ട്രം വൈകല്യങ്ങളുള്ള കുട്ടികളുടെ രക്ഷാകർതൃത്വത്തെക്കുറിച്ച് തിരുവനന്തപുരം ചൈൽഡ് ഡെവലപ്‌മെന്റ് സെന്റർ ഡയറക്ടർ ഡോ. ദീപ ഭാസ്‌കരൻ സംസാരിച്ചു.

എല്ലാവരെയും ഉൾക്കൊള്ളുന്ന ആരോഗ്യസംവിധാനം കെട്ടിപ്പടുക്കുന്നതിനെക്കുറിച്ച് കേരള സർക്കാരിന്റെ ദേശീയ ആരോഗ്യ ദൗത്യം സംസ്ഥാന നോഡൽ ഓഫീസർ ഡോ. അമർ എസ്. ഫെറ്റിൽ ആശയവിനിമയം നടത്തി. പി.ഐ.ബി ഡയറക്ടർ പാർവതി വി. ഐ.ഐ.എസ് നന്ദി രേഖപ്പെടുത്തി.

കുട്ടികളുടെ ആദ്യകാല വളർച്ചയെക്കുറിച്ച് പൊതുസമൂഹത്തിൽ അവബോധം സൃഷ്ടിക്കുക, വളർച്ചയിലുണ്ടാകുന്ന കാലതാമസങ്ങളും വൈകല്യങ്ങളും നേരത്തേ കണ്ടെത്തുക, കുട്ടികൾക്കും കുടുംബങ്ങൾക്കും ആവശ്യമായ പരിചരണവും പിന്തുണയും ലഭ്യമാക്കുന്നതിൽ മാധ്യമങ്ങളുടെ പങ്ക് ശക്തിപ്പെടുത്തുക എന്നിവയായിരുന്നു ശിൽപശാലയുടെ പ്രധാന ലക്ഷ്യങ്ങൾ.