തിരുവനന്തപുരം: തമിഴ്നാട്ടിലെ ഉപതെരഞ്ഞെടുപ്പിൽ ടിവികെ (തമിഴക വെട്രി കഴകം) സ്ഥാനാർഥികൾ നേടിയ വിജയത്തിന്റെ ആവേശം കേരളത്തിലും. തിരുവനന്തപുരവും എറണാകുളവും ഉൾപ്പെടെ കേരളത്തിലെ പ്രധാന നഗരങ്ങളിൽ മധുരം വിതരണം ചെയ്താണ് പാർട്ടി പ്രവർത്തകർ വിജയം ആഘോഷിച്ചത്.
തിരുവനന്തപുരത്ത് നടന്ന ആഘോഷ പരിപാടിക്ക് ടിവികെ സംസ്ഥാന നേതാക്കളായ ഡോ. സുലൈമാൻ ബഷീറും ഡോ. ബിജു രമേശും നേതൃത്വം നൽകി. പരിപാടി ഡോ. ബിജു രമേശ് ഉദ്ഘാടനം ചെയ്തു. പ്രവർത്തകർ പരസ്പരം മധുരം വിതരണം ചെയ്തും വിജയാഹ്ലാദം പങ്കുവെച്ചും ആഘോഷത്തിൽ പങ്കെടുത്തു.
എറണാകുളത്തും ടിവികെ പ്രവർത്തകർ മധുരം വിതരണം ചെയ്ത് വിജയം ആഘോഷിച്ചു. തമിഴ്നാട്ടിലെ താരാപുരം, മധുരാന്തകം മണ്ഡലങ്ങളിൽ ടിവികെ സ്ഥാനാർഥികളായ സത്യഭാമയും കെ. എം. കുമാരവേലും വൻ ഭൂരിപക്ഷത്തോടെയാണ് വിജയിച്ചതെന്ന് പാർട്ടി പ്രവർത്തകർ അറിയിച്ചു.
തമിഴ്നാട്ടിലെ വിജയത്തിന്റെ ആവേശം കേരളത്തിലെ പാർട്ടി പ്രവർത്തകർക്കിടയിലും പ്രകടമായതോടെ വിവിധ കേന്ദ്രങ്ങളിൽ ആഘോഷ പരിപാടികൾ സംഘടിപ്പിച്ചു.