Oracle, Salesforce തുടങ്ങിയ ആഗോള ടെക് ഭീമന്മാർക്കൊപ്പമാണ് ടെക്നോപാർക്ക് ആസ്ഥാനമായ ഫ്ളൈടെക്സ്റ്റിന്റെ നേട്ടം.
തിരുവനന്തപുരം: ടെക്നോപാർക്ക് ആസ്ഥാനമായി പ്രവർത്തിക്കുന്ന പ്രമുഖ എന്റർപ്രൈസ് എഐ സേവനദാതാക്കളായ ഫ്ളൈടെക്സ്റ്റ് ആഗോള തലത്തിൽ മികച്ച ടെലികോം എഐ സൊല്യൂഷനുകൾ നൽകുന്ന കമ്പനികളുടെ പട്ടികയിൽ ഇടം നേടി.
ആഗോള ഐടി ഗവേഷണ-ഉപദേശക സ്ഥാപനമായ ഗാർട്‌നർ പുറത്തിറക്കിയ മാജിക് ക്വാഡ്രന്റ് റിപ്പോർട്ടിലാണ് ഫ്ളൈടെക്സ്റ്റ് തുടർച്ചയായി മൂന്നാം തവണയും ഇടംപിടിച്ചത്. ടെലികോം മേഖലയ്ക്കായി എഐ അധിഷ്ഠിത മാർക്കറ്റിംഗ്, സെയിൽസ് സൊല്യൂഷനുകൾ വികസിപ്പിക്കുന്നതിലെ മികവാണ് കമ്പനിയുടെ നേട്ടത്തിന് പ്രധാനമായും കാരണമായത്.
Oracle, Salesforce ഉൾപ്പെടെയുള്ള ആഗോള ടെക് കമ്പനികൾക്കൊപ്പമാണ് ഫ്ളൈടെക്സ്റ്റും പട്ടികയിൽ ഇടം നേടിയിരിക്കുന്നത്. പുതിയ അംഗീകാരത്തോടെ ആഗോള എന്റർപ്രൈസ് എഐ മേഖലയിൽ തങ്ങളുടെ ശക്തമായ സാന്നിധ്യം വീണ്ടും ഉറപ്പിക്കുകയാണ് കമ്പനി.
തുടർച്ചയായി മൂന്നാം തവണയും ഗാർട്‌നറിന്റെ ആഗോള പട്ടികയിൽ ഇടം നേടിയത് എന്റർപ്രൈസ് എഐ രംഗത്ത് ഫ്ളൈടെക്സ്റ്റ് നടത്തുന്ന നൂതന പ്രവർത്തനങ്ങൾക്കുള്ള വലിയ അംഗീകാരമാണെന്ന് കമ്പനി സിഇഒ ഡോ. വിനോദ് വാസുദേവൻ പറഞ്ഞു.
കോ-പൈലറ്റുകൾക്കും ടാസ്ക് ഓട്ടോമേഷനുകൾക്കും അപ്പുറം, സംരംഭങ്ങൾക്കായി സ്വതന്ത്രമായി വാണിജ്യ തീരുമാനങ്ങൾ എടുക്കാനും മികച്ച ഫലങ്ങൾ സൃഷ്ടിക്കാനും ശേഷിയുള്ള എഐ എക്സ്പെർട്ട്‌ഫോഴ്സ് രൂപപ്പെടുത്തുകയാണ് കമ്പനിയുടെ ലക്ഷ്യമെന്നും അദ്ദേഹം വ്യക്തമാക്കി.
വരും വർഷങ്ങളിൽ കോർപ്പറേറ്റ് സ്ഥാപനങ്ങളുടെ തന്ത്രപരമായ തീരുമാനങ്ങളെയും പ്രവർത്തന രീതികളെയും എഐ സാങ്കേതികവിദ്യ വലിയ രീതിയിൽ മാറ്റിമറിക്കുമെന്നും അദ്ദേഹം അഭിപ്രായപ്പെട്ടു.