‘ഏക് ഭാരത് ശ്രേഷ്ഠ ഭാരത്‘ സംരംഭത്തിന്റെ ഭാഗമായി രാജ്ഭവനിൽ ഗോവ സ്ഥാപക ദിനം ആഘോഷിച്ചു. ബഹുമാനപ്പെട്ട ഗവർണർ ശ്രീ രാജേന്ദ്ര വിശ്വനാഥ് അർലേക്കർ ഗോവയിൽ നിന്നുള്ള ക്ഷണിക്കപ്പെട്ട അതിഥികളുമായി സംവദിക്കുകയും സംസ്ഥാനത്തിന്റെ സമ്പന്നമായ പൈതൃകം പ്രകടമാക്കുന്ന ഊർജ്ജസ്വലമായ സാംസ്കാരിക പ്രകടനങ്ങളെ അഭിനന്ദിക്കുകയും ചെയ്തു. ചടങ്ങിൽ ഗോവ ഗവർണ്ണർ ബഹുമാനപ്പെട്ട ശ്രീ പി എസ് ശ്രീധരൻ പിള്ളയുടെ വീഡിയോ സന്ദേശം കാണിച്ചിരുന്നു.
ഗവർണ്ണറുടെ സെക്രട്ടറി ആർ കെ മധു സ്വാഗതം പറഞ്ഞ ചടങ്ങില്‍ ഗവർണർ ശ്രീ രാജേന്ദ്ര വിശ്വനാഥ് അർലേക്കർ കൊങ്കണി ഭാഷയിലായിരുന്നു പ്രസംഗിച്ചത്. ഗോവയും കേരളവും തമ്മിലുള്ള സൌഹൃദ ബന്ധത്തെ കുറിച്ച് ഗവര്‍ണ്ണര്‍ സംസാരിച്ചു. പോര്‍ച്ചുഗീസുകാരെ തുരത്തുവാന്‍ ധൈര്യം കാണിച്ച അന്നത്തെ ഗോവന്‍ പടയാളികളെ സ്മരിക്കുകയും ചെയ്തു. കേരളത്തില്‍ ഗോവയുമായി ബന്ധമുള്ളവര്‍ തീര്‍ച്ചയായും പരസ്പരം കാണുമ്പോള്‍ ഗോവയുടെ ഔദ്യോഗിക ഭാഷയായ കൊങ്കണിയില്‍ തന്നെ സംസാരിക്കണമെന്നും ഗോവന്‍ പൈതൃകം കാത്തുസൂക്ഷിക്കണമെന്നും പറഞ്ഞു.
ചടങ്ങിന്റെ ഭാഗമായി തിരുവനന്തപുരത്തെ ഗൗഡ സാരസ്വത ബ്രാഹ്മണ സമുദായ അംഗങ്ങളെയും ക്ഷണിച്ചിരുന്നു. തിരുവനന്തപുരം ഗൗഡ സാരസ്വത ബ്രാഹ്മണ മഹാസഭ പ്രസിഡന്റ് അഡ്വ. കെ ജി മോഹന്‍ദാസ്‌ പൈ കൊങ്കണി ബ്രാഹ്മണരുടെ ഗോവയുമായുള്ള ചരിത്രം വിവരിച്ചു.
ഗോവയെ പ്രതിനിധീകരിച്ചു കൊണ്ട് തയ്കൊന്‍ഡോ-വോളിബോള്‍ താരം സ്നേഹ യാദവും സ്നേഹയുടെ കോച്ച് ശ്രുതി സവരാജും ആഘോഷത്തില്‍ പങ്കുകൊണ്ടിരുന്നു.
