പുതിയ അധ്യയന വർഷത്തിൽ വിദ്യാർത്ഥികൾക്ക് സുരക്ഷിതയാത്ര ഉറപ്പുവരുത്തുന്നതിന്റെ ഭാഗമായി തിരുവനന്തപുരം ജില്ലയിലെ സ്‌കൂൾ ബസ് ഡ്രൈവർമാർക്കും അറ്റൻഡർമാർക്കും മോട്ടോർവാഹന വകുപ്പിന്റെ നേതൃത്വത്തിൽ ബോധവത്കരണ ക്ലാസ് സംഘടിപ്പിക്കുന്നു. ബുധനാഴ്ച (മെയ് 31) ഉച്ചയ്ക്ക് രണ്ട് മണി മുതൽ മണക്കാട് ഗവൺമെന്റ് കാർത്തിക തിരുന്നാൾ വൊക്കേഷണൽ ഹയർ സെക്കൻഡറി സ്‌കൂൾ ഹാളിൽ നടക്കുന്ന ക്ലാസിൽ, ഗതാഗതവകുപ്പ് മന്ത്രി ആന്റണി രാജു മുഖ്യപ്രഭാഷകനാകും. പുതിയ അധ്യയന വർഷം ബോധവത്കരണ ക്ലാസുകളിൽ ഇതുവരെ പങ്കെടുക്കാത്ത മുഴുവൻ ഡ്രൈവർമാരും അറ്റൻഡർമാരും ബുധനാഴ്ച നടക്കുന്ന ക്ലാസിൽ പങ്കെടുക്കണം. ക്ലാസിൽ പങ്കെടുക്കാത്തവർക്കെതിരെ നിയമനടപടികൾ സ്വീകരിക്കുമെന്നും മലപ്പുറം എടപ്പാളുള്ള ഐ.ഡി.റ്റി.ആർ നടത്തുന്ന മൂന്ന് ദിവസത്തെ ഡ്രൈവർ പരിശീലന പരിപാടിയിൽ പങ്കെടുക്കണമെന്നും റീജിയണൽ ട്രാൻസ്‌പോർട്ട് ഓഫീസർ അറിയിച്ചു.
