തിരുവനന്തപുരം : വയനാട്ടിലെ ദുരിത ബാധിതരുമായി കൂടിക്കാഴ്ച നടത്തുന്നതിന് വെൽഫെയർ പാർട്ടി സംസ്ഥാന പ്രസിഡന്റ് റസാഖ് പാലേരി ഇന്നും നാളെയും വയനാട്ടിൽ പര്യടനം നടത്തുമെന്ന് സംസ്ഥാന ജനറൽ സെക്രട്ടറി ജബീന ഇർഷാദ് പറഞ്ഞു. പുനരധിവാസ പദ്ധതികൾ വൈകുന്ന പശ്ചാത്തലത്തിൽ പുനരധിവാസ പ്രവർത്തനങ്ങളുടെ പുരോഗതി വിലയിരുത്തുന്നതിനും ജനങ്ങളുടെ പ്രശ്നങ്ങൾ നേരിട്ട് കേൾക്കുന്നതിനുമാണ് പര്യടനം നടത്തുന്നത് . ജനങ്ങളിൽനിന്ന് ലഭ്യമാകുന്ന വിവരങ്ങളുടെ അടിസ്ഥാനത്തിൽ പുനരധിവാസ പ്രവർത്തനങ്ങൾ വേഗത്തിലാക്കുന്നതിന് ആവശ്യമായ ഇടപെടൽ പാർട്ടി നടത്തും.
കേരള ചരിത്രത്തിലെ ഏറ്റവും വലിയ ദുരന്തമായിട്ട് പോലും സംസ്ഥാനത്തിന് അർഹതപ്പെട്ട സാമ്പത്തിക സഹായം നൽകാൻ കേന്ദ്രസർക്കാർ തയ്യാറായിട്ടില്ല. ഇതിനെതിരെ ശക്തമായ ജനരോഷം ഉയർന്നു വരേണ്ടതുണ്ട് . തങ്ങൾ ഭരിക്കാത്ത സംസ്ഥാനങ്ങൾക്ക് ന്യായമായ സഹായം പോലും നൽകില്ല എന്ന ധിക്കാര നിലപാടാണ് ബി.ജെ.പി സ്വീകരിക്കുന്നത്. ഇതിനെതിരായി സംസ്ഥാനം ഒറ്റക്കെട്ടായി പോരാടേണ്ടതുണ്ടെന്ന് അവർ പറഞ്ഞു. സംസ്ഥാന പ്രസിഡന്റിനോടൊപ്പം ജില്ലാ ഭാരവാഹികളും പര്യടനത്തിൽ പങ്കാളികളാവും.
