ആഴ്ചയിലൊരിക്കൽ ഡ്രൈ ഡേ ആചരിക്കണം

ജില്ലയിൽ ഇടവിട്ട് മഴ തുടരുന്ന സാഹചര്യത്തിൽ ഡെങ്കിപ്പനിക്ക് കാരണമാകുന്ന ഈഡിസ് കൊതുകുകൾ പെരുകുവാൻ സാധ്യതയുള്ളതിനാൽ ആഴ്ചയിലൊരിക്കൽ ഡ്രൈ ഡേ ആചരിക്കണമെന്ന് ജില്ലാ മെഡിക്കൽ ഓഫീസർ. കൊതുകിന്റെ ഉറവിട നശീകരണ പ്രവർത്തനമായ ഡ്രൈ ഡേ വിദ്യാഭ്യാസ സ്ഥാപനങ്ങൾ വെള്ളിയാഴ്ചകളിലും, കടകളും സ്ഥാപനങ്ങളും ശനിയാഴ്ചകളിലും. വീടുകളിൽ ഞായറാഴ്ചകളിലും ആചരിക്കണമെന്നാണ് നിർദേശം.

ഉപയോഗശൂന്യമായ പാത്രം, ചിരട്ട, മുട്ടത്തോട്, കുപ്പി, ടയർ തുടങ്ങി അലക്ഷ്യമായി കിടക്കുന്ന വസ്തുക്കൾ ആഴ്ചയിലൊരിക്കൽ നീക്കം ചെയ്യണം. ഇവയിൽ വെള്ളം വീഴാതെ സൂക്ഷിക്കണം.

ഉപയോഗിക്കാതെ കിടക്കുന്ന കുപ്പി, ആട്ടുകല്ല്, ഉരൽ, ക്ലോസെറ്റ്, വാഷ്‌ബേസിനുകൾ എന്നിവയിൽ വെള്ളം കെട്ടി നിൽക്കുന്നില്ലെന്ന് ഉറപ്പാക്കണം.

ജലസംഭരണികൾ കൊതുക് കടക്കാത്ത രീതിയിൽ വലയോ, തുണിയോ ഉപയോഗിച്ച് പൂർണമായും മൂടിവയ്ക്കണം.

ടെറസ്,സൺഷൈഡ്, റൂഫിന്റെ പാത്തി എന്നിവിടങ്ങളിൽ വെള്ളം കെട്ടിനിൽക്കുന്നില്ലെന്ന് സ്ഥാപനമേധാവികളും വീട്ടുടമസ്ഥരും ഉറപ്പുവരുത്തണം.

കമുകിൻ തോട്ടത്തിൽ കമുകിൻ പോളകൾ, കൊക്കോ തോട്ടത്തിൽ കൊക്കോത്തോട് എന്നിവയിൽ വെള്ളം കെട്ടി നിൽക്കാതെ സൂക്ഷിക്കണം.

മത്സ്യതൊഴിലാളികൾ ഉപയോഗിക്കാതെ കിടക്കുന്ന വള്ളങ്ങൾ, ബോട്ടുകൾ എന്നിവയിൽ വെള്ളം കെട്ടിനിൽക്കുന്നില്ലെന്ന് ഉറപ്പുവരുത്തണം. ഡ്രൈ ഡേ ആചരണത്തിൽ പൊതുജനങ്ങൾ സജീവമായി പങ്കെടുക്കണമെന്നും ജില്ലാ മെഡിക്കൽ ഓഫീസർ നിർദേശിച്ചു.