സെഖോൺ ഇന്ത്യൻ എയർഫോഴ്‌സ് മാരത്തൺ 2026 തിരുവനന്തപുരത്ത് ഒക്ടോബർ 4ന്; രജിസ്ട്രേഷൻ ആരംഭിച്ചു

തിരുവനന്തപുരം: ഇന്ത്യൻ വ്യോമസേനയുടെ ധീര സൈനികനായ ഫ്ലൈയിംഗ് ഓഫീസർ നിർമൽ ജിത് സിംഗ് സെഖോണിന്റെ (PVC) പരമത്യാഗവും വീര്യവും അനുസ്മരിച്ച് ദക്ഷിണ വ്യോമ കമാൻഡ് സംഘടിപ്പിക്കുന്ന സെഖോൺ ഇന്ത്യൻ എയർഫോഴ്‌സ് മാരത്തൺ 2026-ന്റെ രണ്ടാം പതിപ്പിലേക്ക് രജിസ്ട്രേഷൻ ആരംഭിച്ചു.

2026 ഒക്ടോബർ 4ന് ഞായറാഴ്ച തിരുവനന്തപുരത്ത് ആക്കുളത്തുള്ള ലുലു മാളിൽ നിന്നാണ് മാരത്തൺ ആരംഭിക്കുന്നത്. മൂന്ന് വിഭാഗങ്ങളിലായാണ് മത്സരം സംഘടിപ്പിക്കുന്നത്.

മൂന്ന് വിഭാഗങ്ങളിലായി മാരത്തൺ

• 21.1 കിലോമീറ്റർ – ഹാഫ് മാരത്തൺ
• 10 കിലോമീറ്റർ – ഓട്ടം
• 5 കിലോമീറ്റർ – ഫൺ റൺ

ദേശസ്നേഹം, അച്ചടക്കം, കായികക്ഷമത, ആരോഗ്യകരമായ ജീവിതശൈലി, യുവാക്കളിലും സമൂഹത്തിലും സേവനമനോഭാവം എന്നിവ പ്രോത്സാഹിപ്പിക്കുകയാണ് മാരത്തണിന്റെ പ്രധാന ലക്ഷ്യങ്ങൾ. രാജ്യത്തിനായി ജീവൻ ത്യജിച്ച നിർമൽ ജിത് സിംഗ് സെഖോണിന്റെ ധീരമായ പാരമ്പര്യത്തെ ആദരിക്കാനും പരിപാടി ലക്ഷ്യമിടുന്നു.

പൊതുജനങ്ങൾക്കായി സംഘടിപ്പിക്കുന്ന മാരത്തണിൽ എല്ലാ പ്രായത്തിലുമുള്ള ആളുകൾക്ക് പങ്കെടുക്കാം. ദേശീയ സേവനത്തെ ആഘോഷിക്കുന്നതിനൊപ്പം യുവജനങ്ങൾക്ക് പ്രതിരോധ സേനയിൽ ചേരുന്നതിനുള്ള പ്രചോദനം നൽകാനും മാരത്തൺ വേദിയാകും.

3,000 പേർ പങ്കെടുക്കുമെന്ന് പ്രതീക്ഷ

ഈ വർഷം ഏകദേശം 3,000 പേർ മാരത്തണിൽ പങ്കെടുക്കുമെന്നാണ് പ്രതീക്ഷിക്കുന്നത്. കായികക്ഷമതയും ദേശസ്നേഹവും ഒരുമിപ്പിക്കുന്ന പരിപാടിയിൽ പങ്കാളികളാകാൻ പൊതുജനങ്ങളോട് ഇന്ത്യൻ വ്യോമസേന ആഹ്വാനം ചെയ്തു.

“അഭിമാനത്തോടെ ഓടുക, രാജ്യത്തിനായി ഓടുക” എന്ന സന്ദേശത്തോടെയാണ് ദേശീയ നായകനായ സെഖോണിനുള്ള ആദരാഞ്ജലിയിൽ പങ്കാളികളാകാൻ സേന ക്ഷണിക്കുന്നത്.

രജിസ്ട്രേഷൻ എങ്ങനെ?

സെഖോൺ ഇന്ത്യൻ എയർഫോഴ്‌സ് മാരത്തൺ 2026-ൽ പങ്കെടുക്കാൻ താൽപര്യമുള്ളവർക്ക് ഓൺലൈനായി രജിസ്റ്റർ ചെയ്യാം.

രജിസ്റ്റർ ചെയ്യാൻ, സന്ദർശിക്കുക: https://www.townscript.com/e/sekhon-indian-air-force-marathon

ബന്ധപ്പെടേണ്ട നമ്പര്‍: 2026-424333

രജിസ്ട്രേഷൻ: Townscript – Sekhon Indian Air Force Marathon 2026

തീയതി: 2026 ഒക്ടോബർ 4, ഞായറാഴ്ച
വേദി: ലുലു മാൾ, ആക്കുളം, തിരുവനന്തപുരം
വിഭാഗങ്ങൾ: 21.1 KM ഹാഫ് മാരത്തൺ, 10 KM റൺ, 5 KM ഫൺ റൺ