ജില്ലാ ഇൻഫർമേഷൻ ഓഫീസ് വായനാമാസാചരണം സംഘടിപ്പിച്ചു

തിരുവനന്തപുരം ജില്ലാ ഇൻഫർമേഷൻ ഓഫീസിന്റെയും പി.എൻ പണിക്കർ ഫൗണ്ടേഷന്റെയും ആഭിമുഖ്യത്തിൽ അരുവിക്കര മൈലം ഗവ. ജി.വി രാജ സ്പോർട്സ് സ്കൂളിൽ വായനമാസാചരണം സംഘടിപ്പിച്ചു. ജില്ലാ കളക്ടർ അനു കുമാരി പരിപാടി ഉദ്ഘാടനം ചെയ്തു. കുട്ടികൾ സ്ക്രീനുകൾക്ക് മുന്നിൽ ചെലവിടുന്ന സമയം കുറച്ച് വായനയുടെ പുതിയ ലോകത്തേയ്ക്ക് ചുവടുവെയ്ക്കണമെന്ന് ജില്ലാ കളക്ടർ പറഞ്ഞു. വായനയ്ക്ക് നമ്മുടെ ജീവിതത്തിലും വ്യക്തിത്വത്തിലും വലിയ മാറ്റങ്ങൾകൊണ്ടുവരാൻ കഴിയുമെന്നും വായിക്കാനും എഴുതാനും സമയം കണ്ടെത്തണമെന്നും അവർ പറ‍ഞ്ഞു.

വായനാ മാസാചരണത്തോടനുബന്ധിച്ച് സ്കൂളിൽ സംഘടിപ്പിച്ച വായനാ മത്സരങ്ങളിൽ വിജയികളായവർക്ക് ജില്ലാ കളക്ടർ സമ്മാനങ്ങൾ വിതരണം ചെയ്തു.

“വായനയും കരുത്തും” എന്ന വിഷയത്തിൽ കേരള കൗമുദി സ്പോർട്സ് എഡിറ്റർ അൻസാർ എസ് രാജ് കുട്ടികളുമായി സംവദിച്ചു. ചിന്തകളുടെ ശാന്തതയ്ക്ക് മികച്ച പോംവഴി വായനയാണെന്നും കായികപരിശീലനത്തിലും ജിവിതത്തിലും വായനയ്ക്ക് വലിയ പങ്കുണ്ടെന്നും അൻസാർ എസ് രാജ് കുട്ടികളോട് പറഞ്ഞു.

സ്കൂൾ പ്രിൻസിപ്പാൾ സുരേന്ദ്രൻ എം.കെ ചടങ്ങിൽ അധ്യക്ഷത വഹിച്ചു. ഐ.പി.ആർ.ഡി റീജണൽ ഡെപ്യൂട്ടി ഡയറക്ടർ എസ്.ആർ പ്രവീൺ, പി.എൻ പണിക്കർ ഫൗണ്ടഷൻ ജില്ലാ സെക്രട്ടറി തോംസൺ ലോറൻസ്, ജി. വി രാജ സ്പോർട്സ് സ്കൂൾ ഹൈ പെർഫോർമൻസ് മാനേജർ പി.ടി ജോസഫ്, ഹെഡ്മിസ്ട്രെസ് രാഹുലാദേവി ഒ.വി, ജില്ലാ ഇൻഫർമേഷൻ ഓഫീസ് അസിസ്റ്റന്റ് എഡിറ്റർ അഞ്ജലി ബി വിമൽ, അസിസ്റ്റന്റ് ഇൻഫർമേഷൻ ഓഫീസർ രമ്യ രാജൻ തുടങ്ങിയവർ പങ്കെടുത്തു.