കേരളത്തിന്റെ നന്മയ്ക്ക് സിപിഐ എൽ ഡി എഫ് വിട്ട് വരണമെന്ന് ആർ എസ് പി

കേരളത്തിന്റെ നന്മയ്ക്ക് സിപിഐ എൽ ഡി എഫ് വിട്ട് വരണമെന്ന് ആർ എസ് പി സംസ്ഥാന സെക്രട്ടറി ഷിബു ബേബി ജോൺ പറഞ്ഞു.

എൻ.ശ്രീകണ്ഠൻ നായർ 40-ാം ചരമവാർഷികത്തിന്റെ ഭാഗമായി വഴുതക്കാട് ടി.കെ. സ്മാരക ഹാളിൽ നടന്ന അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.

ആട്ടും തുപ്പുമേറ്റ് എൽ ഡി എഫിൽ സി പി ഐ നിൽക്കുന്നത് ശരിയല്ല. പ്രതീക്ഷാനിർഭരവും അവകാശ ബോധത്തിൽ അധിഷ്ഠിതവുമായ കരുത്തും രാഷ്ട്രീയ തൊഴിലാളി വർഗ്ഗത്തിനുണ്ടാക്കി കൊടുത്ത അഗ്രഗണ്യനായ നേതാവായിരുന്നു എൻ .ശ്രീകണ്ഠൻ നായർ. അദ്ദേഹത്തിന്റെ പൊതു പ്രവർത്തനം എക്കാലത്തും സ്മരിക്കപ്പെടുമെന്ന് ഷിബു ബേബി ജോൺ പറഞ്ഞു.

ആർ എസ് പി കേന്ദ്ര സെക്രട്ടറിയേറ്റ് അംഗം എ.എ.അസീസ് അദ്ധ്യക്ഷനായി. സി.ദിവാകരൻ, തോമസ് ജേക്കബ്ബ്, ജോർജ്ജ് ഓണക്കൂർ , ബാബു ദിവാകരൻ, കെ.എസ്. സനൽകുമാർ , കെ.ജയകുമാർ , ഇറവൂർ പ്രസന്നകുമാർ , വിഷ്ണു മോഹൻ , മുഹമ്മദ് അമീൻ എന്നിവർ സംസാരിച്ചു.

നവീകരിച്ച ആർ എസ് പി സംസ്ഥാന കമ്മിറ്റി ഓഫീസി ( എൻ. ശ്രീകണ്ഠൻ നായർ സ്മാരകം ) ൽ ആർ എസ് പി കേന്ദ്ര സെക്രട്ടറിയേറ്റ് അംഗം എ.എ.അസീസ് പതാക ഉയർത്തി. എൻ . ശ്രീകണ്ഠൻ നായർ സ്മാരകത്തിന്റെ ഉദ്ഘാടനം ആർ എസ് പി സംസ്ഥാന സെക്രട്ടറി ഷിബു ബേബി ജോണും
എൻ.ശ്രീകണ്ഠൻ നായരുടെ ഫോട്ടോ അനാച്ഛാദനം ആർ എസ് പി കേന്ദ്ര സെക്രട്ടറിയേറ്റ് അംഗം എൻ.കെ.പ്രേമചന്ദ്രൻ എം പി യും ബേബി ജോൺ മെമ്മോറിയൽ ഹാളിന്റെ ഉദ്ഘാടനം ആർ എസ് പി കേന്ദ്ര സെക്രട്ടറിയേറ്റ് അംഗം ബാബു ദിവാകരനും നിർവഹിച്ചു.