അർബൻ അഗ്രികൾച്ചർ ഹാൻഡ്‌ബുക്കിന്റെയും ഇ-കൊമേഴ്‌സ് പ്ലാറ്റ്ഫോമിന്റെയും പ്രകാശനം നടത്തി

നഗര കൃഷിയെ ശാസ്ത്രീയവും സുസ്ഥിരവുമായ രീതിയിൽ പ്രോത്സാഹിപ്പിക്കുന്നതിനായി സെന്റർ ഫോർ അഗ്രികൾച്ചറൽ ഇന്നൊവേഷൻസ് ആൻഡ് ടെക്നോളജി ട്രാൻസ്ഫർ (കൈറ്റ്), വെള്ളായണി തയ്യാറാക്കിയ ‘അർബൻ അഗ്രികൾച്ചർ ഹാൻഡ്‌ബുക്കിന്റെയും ഇ-കൊമേഴ്‌സ് പ്ലാറ്റ്ഫോമിന്റെയും പ്രകാശനം കാർഷിക സർവകലാശാല വൈസ് ചാൻസലർ ഡോ. ബി. അശോക് ഐ.എ.എസ്  നിർവ്വഹിച്ചു. ചടങ്ങിൽ കാർഷിക സർവകലാശാല ഡീൻ ഓഫ് ഫാക്കൽറ്റി ഡോ.ജേക്കബ് ജോൺ, ദക്ഷിണ മേഖല പ്രാദേശിക കാർഷിക ഗവേഷണ കേന്ദ്രം മേധാവി ഡോ. ശാലിനി പിള്ള, കൈറ്റ് മേധാവി ഡോ. ശ്രീദയ ജി എസ് എന്നിവർ സംസാരിച്ചു.

നഗരപരിസരങ്ങളിൽ കൃഷി ആരംഭിക്കാനും വികസിപ്പിക്കാനും ആഗ്രഹിക്കുന്നവർക്കായി തയ്യാറാക്കിയ ഹാൻഡ്‌ബുക്ക്, നഗര കൃഷിയുടെ അടിസ്ഥാന ആശയങ്ങൾ, പ്രധാന വിളകളുടെ കൃഷിരീതികൾ, പരിപാലന മാർഗങ്ങൾ, വിളവെടുപ്പ്, വിപണന സാധ്യതകൾ എന്നിവ ഉൾക്കൊള്ളുന്ന സമഗ്രമായ റോഡ്മാപ്പാണ്. കൂടാതെ കാർഷിക സർവകലാശാലയുടെ കീഴിലുള്ള കാർഷിക കോളേജ് വെള്ളായണിയുടെ വിവിധ വിഭാഗങ്ങളിൽ നിന്നും ലഭ്യമാകുന്ന സേവനങ്ങളുടെ പട്ടികയും ഉൾപ്പെടുത്തിയിരിക്കുന്നു.

CAITT, വെള്ളായണി രൂപകൽപ്പന ചെയ്ത അർബൻ അഗ്രികൾച്ചർ ഇ-കൊമേഴ്‌സ് പ്ലാറ്റ്ഫോം തിരുവനന്തപുരം നഗരപരിധിയിൽ ടെറസ്, വീട്ടുവളപ്പുകൾ, കൃഷിയിടങ്ങൾ എന്നിവിടങ്ങളിൽ കൃഷി ചെയ്യുന്ന കർഷകരെ പിന്തുണയ്ക്കുന്നതിനായാണ് ആരംഭിക്കുന്നത്. ഈ ഡിജിറ്റൽ പ്ലാറ്റ്ഫോമിലൂടെ കർഷകർക്ക് കൃഷിയുമായി ബന്ധപ്പെട്ട സംശയങ്ങൾ ഫോട്ടോകൾ സഹിതം അറിയിക്കാനും വിദഗ്ധ സംഘത്തിലൂടെ പരിഹാരം ലഭിക്കാനും കഴിയും. കൂടാതെ, കർഷകർക്ക് തങ്ങളുടെ അധിക വിളവുകൾ ഫോട്ടോയും വിലയും ഉൾപ്പെടുത്തി പ്രദർശിപ്പിച്ച് ഉപഭോക്താക്കളുമായി നേരിട്ട് ബന്ധപ്പെടുന്നതിനുള്ള സൗകര്യവും പ്ലാറ്റ്ഫോമിൽ ഒരുക്കിയിട്ടുണ്ട്. പ്രധാന വിളകളുടെ കൃഷി മാർഗനിർദേശങ്ങൾ, വിദഗ്ധരുടെ ഹാൻഡ്‌ഹോൾഡിംഗ് സേവനം, സംശയനിവാരണ സംവിധാനം എന്നിവയിലൂടെ നഗരകൃഷിയെ കൂടുതൽ പ്രായോഗികവും ജനസൗഹൃദവുമാക്കുകയാണ് ഇവയുടെ ലക്ഷ്യം.