ഓണം അവധിക്കാലത്ത് മാതൃകയായി വിതുരയിലെ സ്റ്റുഡന്റ് പോലീസ് കേഡറ്റുകൾ; നിർധനരായ സഹപാഠികൾക്ക് ഭക്ഷ്യക്കിറ്റുകളും പഠനോപകരണങ്ങളും

വിതുര: പഠനത്തോടൊപ്പം സാമൂഹിക സേവനത്തിന്റെയും സഹജീവി സ്നേഹത്തിന്റെയും മികച്ച മാതൃക തീർത്ത് വിതുര ഗവ. വൊക്കേഷണൽ & ഹയർ സെക്കൻഡറി സ്കൂളിലെ സ്റ്റുഡന്റ് പോലീസ് കേഡറ്റുകൾ. ഓണം അവധിക്കാലത്തെ ആഘോഷങ്ങൾക്കൊപ്പം കരുതലിന്റെയും പങ്കുവയ്ക്കലിന്റെയും സന്ദേശം പകർന്നാണ് കേഡറ്റുകൾ നിർധനരായ സഹപാഠികൾക്ക് കൈത്താങ്ങായത്.

ഫുഡ് ചലഞ്ചിലൂടെയും ആക്രി ചലഞ്ചിലൂടെയും സമാഹരിച്ച തുക ഉപയോഗിച്ചാണ് കേഡറ്റുകൾ സഹായ പ്രവർത്തനങ്ങൾ നടത്തിയത്. കേഡറ്റുകൾ തന്നെ തയ്യാറാക്കിയ പായസം, വിവിധതരം പലഹാരങ്ങൾ എന്നിവ അയൽപക്കങ്ങളിൽ എത്തിച്ച് വിൽപ്പന നടത്തിയാണ് ഫുഡ് ചലഞ്ചിലൂടെ തുക സമാഹരിച്ചത്. കുട്ടികളുടെ സംരംഭത്തിന് രക്ഷിതാക്കളുടെ പിന്തുണയും ലഭിച്ചു.

ഇതിന് പുറമെ വീടുകളിലും പരിസരങ്ങളിലും നിന്ന് ശേഖരിച്ച പാഴ് വസ്തുക്കൾ വിൽപ്പന നടത്തി ലഭിച്ച തുകയും ജീവകാരുണ്യ പ്രവർത്തനങ്ങൾക്കായി മാറ്റിവച്ചു. വിവിധ പ്രവർത്തനങ്ങളിലൂടെ സമാഹരിച്ച തുക ഉപയോഗിച്ച് രണ്ട് കുടുംബങ്ങൾക്ക് ഒരു മാസത്തേക്കുള്ള ഭക്ഷ്യക്കിറ്റുകൾ നൽകി.

പഠനോപകരണങ്ങൾ വാങ്ങാൻ ബുദ്ധിമുട്ടുന്ന സഹപാഠികൾക്കായി സ്കൂൾ ബാഗ്, നോട്ട്ബുക്കുകൾ, ഇൻസ്ട്രുമെന്റ് ബോക്സുകൾ, വാട്ടർ ബോട്ടിലുകൾ തുടങ്ങിയവയും കേഡറ്റുകൾ വാങ്ങി നൽകി. സഹപാഠികളുടെ ആവശ്യങ്ങൾ തിരിച്ചറിഞ്ഞ് അവർക്കൊപ്പം നിൽക്കുക എന്ന ലക്ഷ്യത്തോടെയായിരുന്നു പ്രവർത്തനങ്ങൾ.

ഓണം അവധിക്കാലത്തും വിവിധ പരിശീലന ക്യാമ്പുകളിൽ കേഡറ്റുകൾ സജീവമായി പങ്കെടുത്തു. അച്ചടക്കം, നേതൃത്വപാടവം, സേവന മനോഭാവം, സാമൂഹിക ഉത്തരവാദിത്തം എന്നിവ വളർത്തിയെടുക്കുന്നതിനൊപ്പം സമൂഹത്തിലെ അവശത അനുഭവിക്കുന്നവരെ ചേർത്തുപിടിക്കാനും കേഡറ്റുകൾക്ക് കഴിഞ്ഞു.

കേഡറ്റുകളുടെ പ്രവർത്തനങ്ങളെ വിതുര ഗ്രാമപഞ്ചായത്ത് പ്രസിഡന്റ് സിന്ധു അഭിനന്ദിച്ചു. ഗ്രാമപഞ്ചായത്ത് വൈസ് പ്രസിഡന്റ് ബിനുകുമാർ മുഖ്യപ്രഭാഷണം നടത്തി. ഭക്ഷ്യക്കിറ്റുകളും പഠനോപകരണങ്ങളും സ്കൂളിനുവേണ്ടി ഹെഡ്മിസ്ട്രസ് ഷീജ വി. എസ്., പി.ടി.എ. പ്രസിഡന്റ് അശോകൻ എന്നിവർ ചേർന്ന് ഏറ്റുവാങ്ങി.

കമ്മ്യൂണിറ്റി പോലീസ് ഓഫീസർമാരായ പ്രിയ ഐ. വി. നായർ, അൻവർ കെ., പോലീസ് ഉദ്യോഗസ്ഥരായ ശശികുമാർ, അനീസ എന്നിവരും ചടങ്ങിൽ പങ്കെടുത്തു.

ഓണത്തിന്റെ സന്തോഷം സ്വന്തം വീടുകളിൽ മാത്രം ഒതുക്കാതെ സഹപാഠികളിലേക്കും സമൂഹത്തിലേക്കും പകർന്ന് നൽകിയ വിതുരയിലെ സ്റ്റുഡന്റ് പോലീസ് കേഡറ്റുകളുടെ പ്രവർത്തനം കുട്ടികളിൽ വളർത്തേണ്ട സാമൂഹിക പ്രതിബദ്ധതയുടെയും മനുഷ്യസ്നേഹത്തിന്റെയും മികച്ച മാതൃകയായി മാറുകയാണ്.