റിപ്പോർട്ടർ ടി വി ന്യൂസ് ഡസ്‌കിലെ പോലീസ് അതിക്രമത്തിൽ പ്രതിഷേധം

തിരുവനന്തപുരം: റിപ്പോർട്ടർ ടി വിയുടെ എറണാകുളത്തെ സെൻട്രൽ ന്യൂസ് ഡസ്‌കിൽ പോലീസ് അതിക്രമിച്ചു കയറിയ സംഭവത്തിൽ ശക്തമായ പ്രതിഷേധവുമായി തിരുവനന്തപുരം പ്രസ് ക്ലബ്. ന്യൂസ് ഡസ്‌കിലേക്ക് പോലീസ് അതിക്രമിച്ചു കയറിയത് നീതീകരിക്കാനാവില്ലെന്നും മാധ്യമ വേട്ടയിൽ ശക്തമായി പ്രതിഷേധിക്കുന്നതായും തിരുവനന്തപുരം പ്രസ് ക്ലബ് വ്യക്തമാക്കി.
കേസന്വേഷണവുമായി ബന്ധപ്പെട്ട് റിപ്പോർട്ടർ ടി വിയുടെ ന്യൂസ് ഡസ്‌കിലേക്ക് പോലീസ് അതിക്രമിച്ചു കയറേണ്ട സാഹചര്യമുണ്ടായിരുന്നില്ലെന്ന് പ്രസ് ക്ലബ് ചൂണ്ടിക്കാട്ടി. വാർത്താ സംപ്രേഷണം പോലും തടസ്സപ്പെടുത്തിയ പോലീസ് ഇടപെടൽ ആശങ്കാജനകമാണെന്നും പ്രസ് ക്ലബ് വ്യക്തമാക്കി.

മാധ്യമ സ്വാതന്ത്ര്യത്തെ ബാധിക്കുന്ന ഇത്തരം നടപടികൾ അംഗീകരിക്കാനാവില്ലെന്നും സംഭവത്തിൽ സർക്കാർ അടിയന്തരമായി ഇടപെടണമെന്നും തിരുവനന്തപുരം പ്രസ് ക്ലബ് ആവശ്യപ്പെട്ടു.

ന്യൂസ് ഡസ്‌കിൽ കടന്നുകയറി മാധ്യമ പ്രവർത്തനത്തെ തടസ്സപ്പെടുത്താൻ ശ്രമിച്ചവർക്കെതിരെ ശക്തമായ നടപടി സ്വീകരിക്കാൻ സർക്കാർ തയ്യാറാകണമെന്ന് പ്രസ് ക്ലബ് പ്രസിഡന്റ് എസ്. ശ്രീകേഷും സെക്രട്ടറി പി. ആർ. പ്രവീണും ആവശ്യപ്പെട്ടു.
മാധ്യമ സ്ഥാപനങ്ങളിൽ നിയമാനുസൃതമായ അന്വേഷണ നടപടികൾ മാത്രമേ ഉണ്ടാകാവൂ എന്നും മാധ്യമ പ്രവർത്തനത്തിന്റെ സ്വാതന്ത്ര്യവും ന്യൂസ് ഡസ്‌കുകളുടെ പ്രവർത്തന സ്വാതന്ത്ര്യവും സംരക്ഷിക്കപ്പെടേണ്ടതുണ്ടെന്നും പ്രസ് ക്ലബ് അഭിപ്രായപ്പെട്ടു.