രക്തദാനത്തെക്കുറിച്ചുള്ള തെറ്റിദ്ധാരണകൾ മാറ്റണം; സന്നദ്ധ രക്തദാനം പ്രോത്സാഹിപ്പിക്കണം: മന്ത്രി കെ. മുരളീധരൻ

തിരുവനന്തപുരം: അടിയന്തര ഘട്ടങ്ങളിൽ ആശുപത്രികളിൽ ആവശ്യത്തിന് രക്തം ലഭ്യമല്ലാത്ത സാഹചര്യം ഒഴിവാക്കാൻ സന്നദ്ധ രക്തദാനം കൂടുതൽ പ്രോത്സാഹിപ്പിക്കണമെന്ന് ആരോഗ്യ, ദേവസ്വം വകുപ്പ് മന്ത്രി കെ. മുരളീധരൻ പറഞ്ഞു.

രക്തദാനത്തെക്കുറിച്ച് പൊതുസമൂഹത്തിലുള്ള തെറ്റിദ്ധാരണകൾ മാറ്റി കൂടുതൽ പേരെ സന്നദ്ധ രക്തദാനത്തിലേക്ക് എത്തിക്കുന്നതിനായി ശക്തമായ ബോധവത്കരണവും പ്രചാരണവും നടത്തേണ്ടതുണ്ടെന്നും മന്ത്രി പറഞ്ഞു. ദേശീയ സന്നദ്ധ രക്തദാന ദിനാചരണത്തിന്റെ സംസ്ഥാനതല ഉദ്ഘാടനം തിരുവനന്തപുരത്തെ തൈക്കാട് പോലീസ് ട്രെയിനിംഗ് കോളേജ് മൈൻഡ് ഓഡിറ്റോറിയത്തിൽ നിർവഹിച്ച് സംസാരിക്കുകയായിരുന്നു മന്ത്രി.

കൃത്യമായ ഇടവേളകളിൽ രക്തം ദാനം ചെയ്യുന്നത് സംബന്ധിച്ച ശാസ്ത്രീയമായ അവബോധം പൊതുജനങ്ങളിൽ വളർത്തേണ്ടതുണ്ടെന്നും മന്ത്രി വ്യക്തമാക്കി. രക്തദാനവുമായി ബന്ധപ്പെട്ട സംശയങ്ങളും തെറ്റിദ്ധാരണകളും ദൂരീകരിച്ച് കൂടുതൽ സന്നദ്ധ രക്തദാതാക്കളെ രക്തദാന രംഗത്തേക്ക് കൊണ്ടുവരണമെന്നും അദ്ദേഹം പറഞ്ഞു.

2025 സെപ്റ്റംബർ മുതൽ 2026 ഓഗസ്റ്റ് വരെയുള്ള കാലയളവിൽ വിവിധ മേഖലകളിൽ മികവ് പുലർത്തിയ സന്നദ്ധ രക്തദാന സംഘടനകൾ, രക്തശേഖരണ കേന്ദ്രങ്ങൾ, രക്തദാന ക്യാമ്പുകൾ, ബ്ലഡ് ബാങ്ക് ട്രേസബിലിറ്റി പദ്ധതി എന്നിവയ്ക്കും പോൾ ബ്ലഡ് പ്രോജക്ടിന്റെ പ്രവർത്തന മികവിനും ചടങ്ങിൽ മന്ത്രി പ്രശംസാപത്രവും ഉപഹാരവും നൽകി.

സന്നദ്ധ രക്തദാതാക്കളെ ആദരിക്കുന്നതിനും പ്രതിഫലം വാങ്ങാതെയുള്ള പതിവായ സന്നദ്ധ രക്തദാന സംസ്കാരം പ്രോത്സാഹിപ്പിക്കുന്നതിനുമാണ് എല്ലാ വർഷവും ഒക്ടോബർ 1 ദേശീയ സന്നദ്ധ രക്തദാന ദിനമായി ആചരിക്കുന്നത്.

ചടങ്ങിൽ തിരുവനന്തപുരം മേയർ വി. വി. രാജേഷ് അധ്യക്ഷത വഹിച്ചു. വാർഡ് കൗൺസിലർ ജി. വേണുഗോപാൽ, സ്പെഷ്യൽ ആംഡ് പോലീസ് കമാൻഡന്റ് യോഗേഷ് മന്തയ്യാ, സംസ്ഥാന എയ്ഡ്സ് കൺട്രോൾ സൊസൈറ്റി പ്രോജക്ട് ഡയറക്ടർ ഡോ. പീയൂഷ് എം., പോലീസ് ട്രെയിനിംഗ് കോളേജ് പ്രിൻസിപ്പാൾ മുഹമ്മദ് ഷാഫി, ഡ്രഗ്സ് കൺട്രോളർ ഡോ. സുജിത് കുമാർ, ജില്ലാ മെഡിക്കൽ ഓഫീസർ ഡോ. ബിന്ദു മോഹൻ തുടങ്ങിയവർ പങ്കെടുത്തു.