ആസ്റ്റർ മെഡ്‌സിറ്റി ‘ഗ്രോത്ത് ഫോറം’ പത്താം പതിപ്പ് മന്ത്രി ഒ. ജെ. ജെനീഷ് ഉദ്ഘാടനം ചെയ്തു; ‘ബാക്ക് ടു സ്കൂൾ’ പദ്ധതിക്കും തുടക്കം

കൊച്ചി, 25 മെയ് 2026: ആസ്റ്റർ മെഡ്‌സിറ്റിയുടെ ബിസിനസ് ഡെവലപ്‌മെന്റ് ഇനിഷ്യേറ്റീവായ ‘ഗ്രോത്ത് ഫോറം‘ പത്താം പതിപ്പ് കായിക-യുവജനകാര്യ വകുപ്പ് മന്ത്രി അഡ്വ. ഒ. ജെ. ജനീഷ് ഉദ്ഘാടനം ചെയ്തു. മെഡ്‌സിറ്റി നോളഡ്ജ് ഹബ്ബിൽ നടന്ന ചടങ്ങിൽ പുത്തുപ്പള്ളി എം.എൽ.എ അഡ്വ. ചാണ്ടി ഉമ്മൻ, ആസ്റ്റർ മെഡ്‌സിറ്റിയുടെ സാമൂഹിക പ്രതിബദ്ധത മുൻനിർത്തിയുള്ള സംരംഭമായ ‘ബാക്ക് ടു സ്കൂൾ‘ പദ്ധതിയുടെ തുടക്കവും കുറിച്ചു.

നാളത്തെ നേതാക്കളെ വാർത്തെടുക്കുന്നതിൽ ഇത്തരം കൂട്ടായ്മകൾക്കുള്ള പങ്കിനെക്കുറിച്ച് മന്ത്രി ഒ. ജെ. ജനീഷ് ഉദ്ഘാടന പ്രസംഗത്തിൽ സംസാരിച്ചു. നമ്മുടെ നാട്ടിൽ വർധിച്ചുവരുന്ന ലഹരി ഉപയോഗം കുറയ്ക്കുന്നതിന് വേണ്ടി സർക്കാർ വിവിധ ക്യാമ്പയിനുകൾക്ക് പദ്ധതിയിടുന്നുണ്ട്. അതിൽ ആസ്റ്റർ പോലെയുള്ള സ്ഥാപനങ്ങളുടെ സഹകരണം വേണമെന്ന് ചടങ്ങിൽ മന്ത്രി പറഞ്ഞു. ആസ്റ്ററിന്റെ രോഗി കേന്ദ്രീകൃത സമീപനത്തിനെ പ്രത്യേകം അഭിനന്ദിച്ച അദ്ദേഹം, ചികിത്സ തേടുമ്പോൾ ഒരു രോഗി നോക്കുന്ന ഏറ്റവും പ്രധാന കാര്യവും അത്തരം സമർപ്പിത പരിചരണമാണെന്നും കൂട്ടിച്ചേർത്തു.

സാമ്പത്തികമായി പിന്നോക്കം നിൽക്കുന്ന കുടുംബങ്ങളിലെ കുട്ടികൾക്ക് പഠനോപകരണങ്ങൾ നൽകുന്ന ആസ്റ്ററിന്റെ പദ്ധതിയായ ബാക്ക് ടു സ്കൂളിന്റെ മൂന്നാം പതിപ്പിന് ആസ്റ്ററിലെ ശുചീകരണ വിഭാഗം ജീവനക്കാരുടെ കുടുംബങ്ങളിലെ കുട്ടികൾക്ക് നൽകിക്കൊണ്ടാണ് എം.എൽ.എ അഡ്വ. ചാണ്ടി ഉമ്മൻ തുടക്കം കുറിച്ചത്. കാരുണ്യത്തിലും സഹാനുഭൂതിയിലും ഊന്നിയുള്ള പ്രവർത്തനങ്ങളുടെ ആവശ്യകതയെക്കുറിച്ച് അദ്ദേഹം സംസാരിച്ചു. മറ്റുള്ളവരെകൂടി പരിപാലിക്കുന്ന സമീപനങ്ങളാണ് വ്യക്തിപരമായ നേട്ടങ്ങളുടെ മാറ്റ് കൂട്ടുകയെന്നും സഹാനുഭൂതിയുള്ള നേതാക്കളും നിയമങ്ങളുമാണ് നാടിന് ആവശ്യമെന്നും പദ്ധതിക്ക് തുടക്കം കുറിച്ചുകൊണ്ട് എം.എൽ.എ കൂട്ടിച്ചേർത്തു.

നന്ദിലത്ത് ജി-മാർട്ട് മാനേജിംഗ് ഡയറക്ടറും സംരംഭകയുമായ ഐശ്വര്യ നന്ദിലത്ത് ബിസിനസ്സ് രംഗത്തെ പുതിയ കാലഘട്ടത്തിലെ നേതൃത്വപാടവങ്ങളെയും വെല്ലുവിളികളെയും ആസ്പദമാക്കി ചടങ്ങിൽ സംസാരിച്ചു.

വിവിധ ഡോക്ടർമാരും ബിസിനസ് രംഗത്തെ പ്രമുഖരും പങ്കെടുത്ത ചടങ്ങിൽ, പുതിയ കാലത്തെ ബിസിനസ്സ് വളർച്ചാ സാധ്യതകളെക്കുറിച്ചും ലീഡർഷിപ്പ് ട്രെൻഡുകളെക്കുറിച്ചുമുള്ള ചർച്ചകൾ നടന്നു. ആസ്റ്റർ മെഡ്‌സിറ്റിയുടെ ചീഫ് ഓപ്പറേറ്റിംഗ് ഓഫീസർ ഡോ. ഷുഹൈബ് കാദർ, ആസ്റ്ററിലെ മറ്റ് ഡോക്ടർമാർ, ജീവനക്കാർ എന്നുവരും ചടങ്ങിന് സാക്ഷ്യം വഹിച്ചു.