ജല ജീവൻ മിഷന്റെ ഒഴുക്ക് അവസാനിക്കുമോ ?

കേരളത്തിലെ ലക്ഷക്കണക്കിന് കുടുംബങ്ങളിലേയ്ക്ക് കുടിവെള്ളമെത്തിയ്ക്കുന്ന ജല ജീവൻ മിഷന്റെ പ്രവർത്തനങ്ങളുടെ ഒരു പ്രധാന ഘടകമാണ് നിർവ്വഹണ സഹായ ഏജൻസികൾ എന്ന ISAകൾ. കേരളത്തിലെ ഓരോ ഗ്രാമപഞ്ചായത്തിലും ISAകൾ നടത്തുന്ന സർവ്വേകളിലൂടെയാണ് ഇനിയും ടാപ്പ് കണക്ഷൻ ലഭിക്കാത്ത ഗുണഭോക്താക്കളെ കണ്ടെത്തി KWA യ്ക്ക് റിപ്പോർട്ട് ചെയ്യുന്നതും അവർ കണക്ഷൻ ലഭ്യമാക്കുന്നതും. കൂടാതെ ഓരോ ഗ്രാമപഞ്ചായത്തുകളിലേയും അംഗൻവാടി, സ്ക്കൂളുകൾ, മറ്റ് സർക്കാർ പൊതുജന സേവന കേന്ദ്രങ്ങൾ എന്നിവയേയും പ്രസ്തുത സർവ്വേകളിലൂടെ കണ്ടെത്തി ടാപ്പ് കണക്ഷനുകൾ ലഭ്യമാക്കുംവിധമുള്ള പ്രവർത്തനങ്ങൾ നടത്തുന്നു. ഒപ്പം ഗ്രാമപഞ്ചായത്തുകളിലെ പൊതുകിണറുകൾ, ജലാശയങ്ങൾ, മറ്റ് കുടിവെള്ള സ്രോതസ്സുകൾ എന്നിവ കണ്ടെത്തി പട്ടിക തയ്യാറാക്കുക, അംഗൻവാടികളിലും സ്കൂളുകളിലും മറ്റും ശുദ്ധജല ലഭ്യത ഉറപ്പാക്കുംവിധം വാട്ടർ ഡിസ്പെൻസറുകളും മഴവെള്ള സംഭരണത്തിനായുള്ള വിവിധ ടാങ്കുകളും മറ്റും ലഭ്യമാക്കുക തുടങ്ങി 50ലധികം ജനശാക്തീകരണ-സാമൂഹ്യസേവന പ്രവർത്തനങ്ങളാണ് ISA കൾ നടപ്പിലാക്കുന്നത്.

എന്നാൽ കഴിഞ്ഞ രണ്ട് മാസത്തിലധികമായി ISAകളുടെ പ്രവർത്തനം നിലച്ചിരിക്കുകയാണ്. ഓരോ ഗ്രാമപഞ്ചായത്തുകളിലും ‘ഹർ ഘർ ജൽ’ (എല്ലാ വീടുകളിലും ശുദ്ധജല ലഭ്യത ഉറപ്പാക്കുക) പ്രഖ്യാപിയ്ക്കുന്നത് വരെ ISAകളുടെ പ്രവർത്തനം ഉണ്ടായിരിക്കണം എന്ന നാഷണൽ ജല ജീവൻ മിഷന്റെ മാർഗ്ഗ നിർദ്ദേശം നിലവിലുണ്ടായിട്ടും കേരളത്തിലെ ISAകളുടെ പ്രവർത്തന കാലാവധി ദീർഘിയ്പ്പിക്കാൻ ബന്ധപ്പെട്ട ജലനിധി, വാട്ടർ അതോറിറ്റി, ജലവിഭവ വകുപ്പ് എന്നിവയുടെ അധികൃതർ തയ്യാറാകുന്നില്ല. ശ്രീ സത്യസായി ഓർഫനേജ് ട്രസ്റ്റ് അടക്കം വിവിധ നിർവ്വഹണ സഹായ ഏജൻസികളായ NGOകൾ പലവട്ടം മേൽപ്പറഞ്ഞ ഘടകങ്ങളിലും ജലവിഭവ വകുപ്പ് മന്ത്രിക്കും നിവേദനം നൽകിയിട്ടും തീരുമാനമാകാതെ നീളുകയാണ്.

മേൽപ്പറഞ്ഞ വിഷയങ്ങളെക്കുറിച്ച് നാഷണൽ NGO’s കോൺഫെഡറേഷന്റെ ചെയർമാൻ ശ്രീ.കെ. എൻ. ആനന്ദകുമാർ ജലവിഭവ വകുപ്പ് മന്ത്രി ശ്രീ.റോഷി അഗസ്റ്റിനുമായി സംസാരിക്കുകയും രേഖാമൂലം കത്ത് നൽകുകയുമുണ്ടായി. അതിന്റെ അടിസ്ഥാനത്തിൽ എത്രയും വേഗം ഇക്കാര്യത്തിൽ നടപടി സ്വീകരിക്കാമെന്ന് മന്ത്രി ഉറപ്പ് തന്നിട്ടുണ്ട്. അതുകൊണ്ട് തന്നെ അടിയന്തിരമായി ISAകളുടെ പ്രവർത്തന കാലാവധി ദീർഘിപ്പിച്ച് കൊണ്ടുള്ള ഉത്തരവ് ബന്ധപ്പെട്ട അധികൃതരിൽ നിന്നും എത്രയും വേഗം ഉണ്ടാകണമെന്ന് താല്പര്യപ്പെടുന്നു.