പോത്തൻകോട് മിനി സിവിൽ സ്റ്റേഷനിൽ ഹോമിയോ ആശുപത്രി പ്രവർത്തനം തുടങ്ങി

പോത്തൻകോട് ഗ്രാമപഞ്ചായത്തിലെ ഹോമിയോ ആശുപത്രിയുടെയും കണിയാപുരം ഉപ ജില്ലാ വിദ്യാഭ്യാസ ഓഫീസറുടെ കാര്യാലയത്തിന്റെയും ഉദ്ഘാടനവും ഭക്ഷ്യ പൊതുവിതരണവകുപ്പ് മന്ത്രി ജി. ആർ അനിൽ നിർവഹിച്ചു.

വിവിധ ആവശ്യങ്ങൾക്കായി എത്തുന്നവർക്ക് അവയെല്ലാം ഒരു സ്ഥലത്ത് തന്നെ പരിഹരിക്കാൻ കഴിയുന്ന രീതിയിലാണ് മിനി സിവിൽ സ്റ്റേഷൻ നിർമിച്ചിരിക്കുന്നതെന്നും സമയബന്ധിതമായി ബാക്കി ഓഫീസുകളുടെ പണി പൂർത്തിയാക്കി, മികച്ച അടിസ്ഥാന സൗകര്യങ്ങൾ ഉറപ്പാക്കുമെന്നും മന്ത്രി പറഞ്ഞു.

പോത്തൻകോട് പഞ്ചായത്തിലെ എല്ലാ വീടുകളിലും കുടിവെള്ളമെത്തിക്കുന്ന ബൃഹത്പദ്ധതി സർക്കാർ പരിഗണനയിലാണെന്നും പോത്തൻകോട് മാർക്കറ്റിന്റെ ശോചനീയാവസ്ഥയ്ക്ക് മാറ്റം വരുത്തേണ്ടതുണ്ടെന്നും മന്ത്രി പറഞ്ഞു. മാർക്കറ്റിന്റെ നവീകരണ പ്രവർത്തനങ്ങൾക്കായി രണ്ട് കോടി രൂപ ബജറ്റിൽ വകയിരുത്തിയിട്ടുണ്ട്. പോത്തൻകോടിന്റ വികസന നവീകരണ പ്രവർത്തനങ്ങൾക്ക് സർക്കാരിനൊപ്പം പ്രദേശവാസികളും ഒറ്റക്കെട്ടായി നിൽക്കണമെന്നും മന്ത്രി കൂട്ടിച്ചേർത്തു.

ഗ്രാമപഞ്ചായത്തിന്റെ തനത് ഫണ്ടിൽ നിന്നും 7,50,000 രൂപ വിനിയോഗിച്ചാണ് ഹോമിയോ ആശുപത്രിയുടെ നിർമാണ പ്രവർത്തനങ്ങൾ പൂർത്തിയാക്കിയത്.

പോത്തൻകോട് ഗ്രാമപഞ്ചായത്ത് പ്രസിഡന്റ് റ്റി.ആർ അനിൽ അധ്യക്ഷത വഹിച്ചു. ത്രിതല പഞ്ചായത്ത് പ്രതിനിധികൾ, ഹോമിയോ വകുപ്പ് ഡയറക്ടർ ഡോ. എം.എൻ വിജയാംബിക, ഹോമിയോ ഡി.എം.ഒ വി.കെ പ്രിയദർശിനി, ജില്ലാ വിദ്യാഭ്യാസ വകുപ്പ് ഉദ്യോഗസ്ഥർ തുടങ്ങിയവർ ചടങ്ങിൽ പങ്കെടുത്തു.