ഓണസമ്മാനമായി കേരളത്തിന് 100-ലധികം സ്പെഷ്യൽ ട്രെയിനുകൾ; കേന്ദ്ര സർക്കാരിന് നന്ദി: രാജീവ് ചന്ദ്രശേഖർ എംഎൽഎ

തിരുവനന്തപുരം: ഓണക്കാലത്ത് കേരളത്തിലേക്കും കേരളത്തിൽ നിന്നുമായി 100-ലധികം സ്പെഷ്യൽ ട്രെയിനുകൾ അനുവദിച്ച കേന്ദ്ര സർക്കാർ തീരുമാനത്തെ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ എംഎൽഎ സ്വാഗതം ചെയ്തു.
കേരളത്തിൽ നിന്നുള്ള അഭ്യർഥനകൾ അതിവേഗം പരിഗണിച്ച് പ്രധാനമന്ത്രി നരേന്ദ്ര മോദിയുടെയും, കേന്ദ്ര റെയിൽവേ മന്ത്രി അശ്വിനി വൈഷ്ണവിന്റെയും നേതൃത്വത്തിൽ ഈ സുപ്രധാന തീരുമാനം കൈക്കൊണ്ടത് രാജ്യത്തിന്റെ വിവിധ ഭാഗങ്ങളിൽ ജോലി ചെയ്യുകയും പഠിക്കുകയും ചെയ്യുന്ന ആയിരക്കണക്കിന് മലയാളികൾക്ക് വലിയ ആശ്വാസമാണെന്ന് അദ്ദേഹം പറഞ്ഞു.

ഓണക്കാലത്ത് കുടുംബത്തോടൊപ്പം സ്വന്തം നാട്ടിലെത്തി ആഘോഷിക്കുകയെന്നത് ഓരോ മലയാളിയുടെയും ഏറ്റവും വലിയ ആഗ്രഹമാണ്. അധിക സ്പെഷ്യൽ ട്രെയിനുകൾ അനുവദിച്ചതിലൂടെ യാത്രാക്ക്ലേശം കുറയുകയും സുരക്ഷിതവും സൗകര്യപ്രദവുമായ യാത്ര ഉറപ്പാക്കുകയും ചെയ്യും. സാധാരണക്കാരുടെ ആവശ്യങ്ങളും വികാരങ്ങളും മനസ്സിലാക്കി അതിനനുസരിച്ച് സമയോചിതമായി ഇടപെടുന്ന ജനകീയ ഭരണത്തിന്റെ മറ്റൊരു ഉദാഹരണമാണ് ഈ തീരുമാനമെന്നും അദ്ദേഹം വ്യക്തമാക്കി.

കേരളത്തിലെ ജനങ്ങളോടുള്ള പ്രധാനമന്ത്രി നരേന്ദ്ര മോദിയുടെ കരുതലിന്റെയും, പ്രതിബദ്ധതയുടെയും തെളിവാണ് ഈ നടപടി. ഈ ഓണത്തിന് മലയാളിയാത്രക്കാർക്ക് നാട്ടിലെത്തി , ഓണം കൂടുതൽ സന്തോഷകരമാക്കാൻ ഇടയാക്കിയ പ്രധാനമന്ത്രി നരേന്ദ്ര മോദിക്കും, കേന്ദ്ര റെയിൽവേ മന്ത്രി അശ്വിനി വൈഷ്ണവിനും കേരളത്തിലെ ജനങ്ങളുടെ പേരിൽ അദ്ദേഹം നന്ദി രേഖപ്പെടുത്തി.