ബഷീർ കഥാപാത്രങ്ങൾക്ക് എ.ഐ. ടച്ച് നല്‍കി വിദ്യാർത്ഥികൾ

ബഷീർ കഥാപാത്രങ്ങൾക്ക് എ.ഐ.ടച്ച്: പാഠപുസ്തകത്തിൽ പുത്തൻ പരീക്ഷണവുമായി വിദ്യാർത്ഥികൾ.

വിതുര: പത്താം ക്ലാസ്സിലെ ഇംഗ്ലീഷ് പാഠപുസ്തകത്തിൽ ഉൾപ്പെടുത്തിയിരിക്കുന്ന വൈക്കം മുഹമ്മദ് ബഷീറിന്റെ ചെറുകഥയായ ‘ദ സ്നെയ്ക് ആൻഡ്‌ ദ മിറർ‘ പൂർണ്ണമായും എ.ഐ.സാങ്കേതിക വിദ്യയിലൂടെ ചിത്രങ്ങളും വീഡിയോകളുമാക്കി പരിവർത്തനം ചെയ്തിരിക്കുകയാണ് തിരുവനന്തപുരം ജില്ലയിലെ വിതുര ഗവ.വൊക്കേഷണൽ & ഹയർ സെക്കന്ററി സ്‌കൂളിലെ പത്താം ക്ലാസ് വിദ്യാർത്ഥികൾ.ഇംഗ്ളീഷ് ഭാഷാ പഠനം കൂടുതൽ ആകർഷകവും സർഗാത്മകവുമാക്കാൻ ലക്ഷ്യമിട്ടു നടപ്പിലാക്കിയ പദ്ധതി വൻ വിജയമായ സന്തോഷത്തിലാണവർ.

പഠനത്തിൽ സർഗാത്മതയ്ക്കും ഹാൻഡ്‌സ് ഓൻ സെഷനുകൾക്കും പ്രാമുഖ്യം നൽകുന്ന STEM Education തത്വങ്ങളെ അടിസ്ഥാനമാക്കിയാണ് പ്രവർത്തനത്തിനു രൂപം നൽകിയത്.

സംസ്ഥാനത്ത് വിദ്യാർഥികളുടെ നെതൃത്വത്തിൽ ഇത്തരത്തിൽ നടക്കുന്ന ആദ്യത്തെ പ്രവർത്തനം കൂടിയാണിത്.

വിദ്യാർഥികളെ വിവിധ ഗ്രൂപ്പുകളാക്കിയ ശേഷം പാഠ ഭാഗത്തെ അർത്ഥവത്തായ വിവിധ സെഷനുകളായി തിരിച്ചാണ് പൂർണമായും എ.ഐ.സാങ്കേതിക വിദ്യയുടെ സഹായത്തോടെ ചിത്രങ്ങളും വീഡിയോകളും സൃഷ്ടിച്ചത്.ഓരോ ഗ്രൂപ്പും അവർക്കു ലഭിച്ച പാഠ ഭാഗത്തിന്റെ സത്തയും സവിശേഷതകളും ഉൾക്കൊള്ളുന്ന ഇംഗ്ലീഷ് പ്രോംറ്റുകൾ തയ്യാറാക്കിയ ശേഷമാണ് ആർട്ടിഫിഷ്യൽ ഇന്റലിജൻസിന്റെ സഹായത്തോടെ പഠന പ്രവർത്തനം പൂർത്തിയാക്കിയത്.അനുവാദിനി , മെറ്റ എ.ഐ, ജെമിനി , ബിങ്ങ് എ.ഐ തുടങ്ങിയ ആപ്പുകളാണ് വിദ്യാർത്ഥികൾ ഉപയോഗപ്പെടുത്തിയത്.

STEM Education മാതൃകയിൽ ,ഭാഷാ പഠനത്തിന് ഹാൻഡ്‌സ് ഓൻ സെഷനുകളുടെ സാധ്യത പരമാവധി ഉപയോഗപ്പെടുത്തുന്നത് ഇംഗ്ലീഷ് ഭാഷാ പഠനത്തിന് പുതിയ വഴികൾ തുറന്നിടും എന്നതിൽ സംശയമില്ല.

ഇംഗ്ലീഷ് ഭാഷാ പഠനം രസകരവും ക്രിയാത്മകവുമാക്കുന്നതിന് പുതിയ സാങ്കേതിക വിദ്യകൾ അവലംബിച്ചു കൊണ്ട് ക്ലാസ് മുറികളിലും ഐ.റ്റി.ലാബുകളിലും പരപ്രേരണ കൂടാതെ ഭാഷ കൈകാര്യം ചെയ്യാൻ വിദ്യാർഥികളെ പ്രാപ്തരാക്കുക എന്നതായിരുന്നു പ്രവർത്തനത്തിന്റെ ലക്ഷ്യമെന്ന് ഇംഗ്ലീഷ് അധ്യാപകനും കമ്മ്യൂണിറ്റി പോലീസ് ഓഫീസറുമായ കെ.അൻവർ പറഞ്ഞു.

സംസ്ഥാന ആഭ്യന്തര-പൊതു വിദ്യാഭ്യാസ വകുപ്പുകൾ സംയുക്തമായി നടപ്പിലാക്കി വരുന്ന സ്റ്റുഡന്റ് പോലീസ് കേഡറ്റ് പദ്ധതിയുടെ പരിശീലന പരിപാടിയുടെ ഭാഗമായ ഡിസൈൻ തിങ്കിങ്ങ് മാതൃകയിലാണ് ഗ്രൂപ്പ് പ്രവർത്തനങ്ങൾ വിദ്യാർഥികൾ പൂർത്തീകരിച്ചത്.

വിദ്യാർഥികൾ തയാറാക്കിയ എ.ഐ.ചിത്രങ്ങളും വീഡിയോകളും ഉൾപ്പെടുത്തി “ടെക് ടെയിൽസ് ഓഫ് ബഷീർ” എന്ന പേരിൽ പ്രദർശനവും സ്‌കൂളിൽ സംഘടിപ്പിക്കും.

സ്‌കൂളിലെ ലിറ്റിൽ കൈറ്റ്സ് യൂണിറ്റാണ് നൂതന പഠന പ്രവർത്തനങ്ങൾ മോണിറ്റർ ചെയ്യുന്നതും സാങ്കേതിക സഹായം ലഭ്യമാക്കുന്നതും.