ശ്രീ സുധീന്ദ്ര തീർത്ഥ സ്വാമികളുടെ സ്വർണ്ണ പാദുകത്തിന് വേദ ഘോഷങ്ങളോടെ വൻ സ്വീകരണം

വാരണാസി കാശി മഠത്തിന്റെ മഠാധിപതിയായിരുന്ന ശ്രീമദ് സുധീന്ദ്ര തീർത്ഥ സ്വാമികളുടെ ജന്മശതാബ്ദി ആഘോഷങ്ങളുടെ ഭാഗമായി ഹരിദ്വാറിൽ നിന്നും ആരംഭിച്ച പാദുക രഥ ഘോഷയാത്ര ഇന്നു വൈകുന്നേരം 6 മണിയോടുകൂടി രാമേശ്വരത്തു നിന്നും കേരള പ്രയാണത്തിനായി തിരുവനന്തപുരത്ത് എത്തിച്ചേർന്നു.

ഗൗഡ സാരസ്വത ബ്രാഹ്മണരുടെ ആത്മീയ ആചാര്യൻ ആയിരുന്ന സ്വാമികളുടെ പാദുകയാത്രക്ക് ശിഷ്യരും സമുദായ നേതാക്കളും എംജി റോഡിൽ നിന്നും വൈഎംസിഎ ഭാഗത്തുള്ള ഗൗഡ സാരസ്വത ബ്രാഹ്മണ മഹാസഭയുടെ മന്ദിരത്തിലേക്ക് വേദ വാദ്യ നൃത്ത ഭജന ശോഭാ യാത്ര യോടു കൂടി ആനയിച്ചു.

മന്ദിരത്തിലെത്തിയ ദിവ്യപാദുകങ്ങളെ വേദപൂജയോടെ ഭക്തിയോടെ ആനയി ച്ചിരുത്തി. പാദുകങ്ങൾ ദർശനത്തിനും പൂജയ്ക്കുമായി രണ്ടുദിവസം ഉണ്ടാകും. ഞായറാഴ്ച ഉച്ചയോടെ പാദുക രഥ ഘോഷയാത്രയായി കൊല്ലത്തേക്ക് പുറപ്പെടും. സ്വീകരണത്തിന് പ്രസിഡന്റ് അഡ്വക്കേറ്റ് കെ ജി മോഹൻദാസ് പൈ, സെക്രട്ടറി സോമനാഥ പ്രഭു, തുടങ്ങിയവർ നേതൃത്വം നൽകി.