ചക്രായുധത്തിന്റെ അരങ്ങിൽ പി ജെ ആന്റണി നിറഞ്ഞു.

ഭാരത് ഭവനിൽ കഴിഞ്ഞ രണ്ടു ദിവസങ്ങളിലായി നടന്ന പി ജെ ആന്റണി ജന്മശതാബ്ദി ആഘോഷങ്ങൾ ചക്രായുധം നാടകാവതരണത്തോടെ സമാപിച്ചു. കേന്ദ്ര സാഹിത്യ അക്കാദമി, ഭാരത് ഭവൻ, നാട്യഗൃഹം എന്നിവയുടെ സംയുക്ത സഹകരണത്തിൽ രണ്ടു ദിവസങ്ങളിലായി ഒരുക്കിയ മലയാള – നാടക ചലച്ചിത്ര രംഗത്തെ അതുല്യ പ്രതിഭയുടെ  ജന്മശതാബ്ദി ആഘോഷങ്ങൾക്ക് കാമ്പുറ്റ പ്രഭാഷണങ്ങളാലും ഡോ.പ്രമോദ് പയ്യന്നൂർ സംവിധാനം നിർവ്വഹിച്ച  ഡോക്യുമെന്ററി പ്രദർശനങ്ങളാലും പ്രബുദ്ധമായി.
രണ്ടാം ദിനമായ ഇന്നലെ (ഒക്ടോബർ 12 ഞായറാഴ്ച) ‘പി. ജെ ആന്റണിയുടെ എഴുത്ത് / ചലച്ചിത്ര ലോകം’  എന്ന വിഷത്തിൽ വിജയകൃഷ്ണന്റെ അധ്യക്ഷതയിൽ ശ്രീജ ആറങ്ങോട്ടുകര, ഹരി ചങ്ങമ്പുഴ സന്തോഷ് വള്ളിക്കാവ്, പത്മനാഭൻ കാവുമ്പായി എന്നിവർ പ്രബന്ധം അവതരിപ്പിച്ചു. ശേഷം ‘പി ജെ ആന്റണി – വ്യക്തി , എഴുത്ത് , കലാപ്രവർത്തനം’  എന്ന വിഷയത്തിൽ പി. സോമന്റെ അധ്യക്ഷതയിൽ ഷാജു പുതൂർ, ജേക്കബ് എബ്രഹാം എന്നിവരും പ്രബന്ധം അവതരിപ്പിച്ചു. വൈകുന്നേരം 4 മണിക്ക് സാബു കോട്ടുക്കലിന്റെ അധ്യക്ഷതയിൽ നടന്ന സമാപന സമ്മേളനത്തിൽ പ്രൊഫ.അലിയാർ സമാപന പ്രഭാഷണവും, ഡോ.പ്രമോദ് പയ്യന്നൂർ,പി. വി. ശിവൻ, വിജു വർമ്മ, സുധിദേവയാനി, നിരീക്ഷ എന്നിവർ ആശംസാ പ്രഭാഷണവും, ശ്രീകല പ്രസാദ് കൃതതജ്ഞതയും രേഖപ്പെടുത്തി. തുടർന്ന് പി. ജെ ആന്റണി രചന നിർവ്വഹിച്ച ‘ചക്രായുധം’  നാടകത്തിന്റെ അവതരണവും നടന്നു. 
——————————————————————–