ബിസിനസ് ക്ലാസ്സ്‌ ബസ് ഉടൻ: മന്ത്രി ഗണേഷ് കുമാർ

പാൻട്രിയും ടോയ്‌ലെറ്റും അടക്കം ആധുനിക സൗകര്യങ്ങളുള്ള  വോൾവോ ലക്ഷ്വറി ബസുകൾ  ഉടൻ നിരത്തിലിറക്കുമെന്ന്  ഗതാഗത മന്ത്രി മന്ത്രി ബി ഗണേഷ് കുമാർ.
ബസിൽ കണ്ടക്ടർക്ക് പകരം പരിശീലനം സിദ്ധിച്ച ബസ് ഹോസ്റ്റസുമാരായിരിക്കും.

രാജ്യത്ത് ഇറങ്ങുന്നതിൽ വച്ച് ഏറ്റവും സൗകര്യം കൂടിയ വോൾവോ ബസുകളായിരിക്കും
ഇതിനായി  ഉപയോഗിക്കുകയെന്നും മന്ത്രി പറഞ്ഞു

കെഎസ്ആർടിസി നെടുമങ്ങാട് യൂണിറ്റിലെ ഡ്രൈവിംഗ് സ്കൂൾ, നവീകരിച്ച ഡിപ്പോ യാർഡ്, പ്രവേശന കവാടത്തിൻ്റെയും, നെടുമങ്ങാട് – പറശ്ശിനിക്കടവ്, നെടുമങ്ങാട് – മാനന്തവാടി എന്നീ ബസ് സർവീസുകളുടെയും  ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.

വിപണിയിൽ ലഭിക്കുന്നതിനേക്കാൾ കുറഞ്ഞ നിരക്കിൽ കെഎസ്ആർടിസി യാത്രക്കാർക്ക് കുടിവെള്ളം ലഭ്യമാക്കുമെന്നും വിപണനം ചെയ്യുന്ന  കണ്ടക്ടമർക്കും
ഡ്രൈവർമാർക്കും ഇതിന്റെ ആനുകൂല്യം നൽകുമെന്നും മന്ത്രി പറഞ്ഞു

കെഎസ്ആർടിസി ഡ്രൈവിംഗ് സ്കൂളുകളിൽ ഹെവി മോട്ടോർ വാഹന പരിശീലനത്തിനും ലൈറ്റ് മോട്ടോർ വാഹന പരിശീലനത്തിനും 9000  രൂപയും, ഇരു ചക്ര വാഹന പരിശീലനത്തിന് 3500 രൂപയും, ഇരു ചക്ര വാഹനത്തിന്റെയും ലൈറ്റ് മോട്ടോർ വാഹനത്തിന്റെയും ഒന്നിച്ചുള്ള പരിശീലനത്തിന് 11000 രൂപയുമാണ് ഫീസ്.
എസ് സി/എസ് ടി വിഭാഗകാർക്കും ട്രാൻസ്ജെൻഡർ വിഭാഗത്തിനും 20%
ഫീസിളവും കെ.എസ്.ആർ.റ്റി.സി ജീവനക്കാർക്ക് അഞ്ച് ശതമാനവും ഫീസിളവ് അനുവദിച്ചിട്ടുണ്ട്.
ഒരു ബാച്ചിൽ 16 പേർക്കാണ് പ്രവേശനം നൽകുന്നത്. ഒരു മാസത്തെ പാഠ്യപരിശീലന പരിപാടിയിൽ 28 ദിവസം ഡ്രൈവിംഗ് പരിശീലനവും രണ്ട്‌ ദിവസം തിയറി ക്ലാസുകളുമാണ് സജ്ജീകരിക്കുന്നത്.

പൊതു ഗതാഗത നിലവാരം ഉയർത്താനും സൗകര്യങ്ങൾ മെച്ചപ്പെടുത്താനും എംഎൽഎ എന്ന നിലയിൽ എത്ര തുക വേണമെങ്കിലും മുടക്കാൻ തയാറാണെന്ന് ചടങ്ങിന് അധ്യക്ഷത വഹിച്ച ഭക്ഷ്യ സിവിൽ സപ്ലൈസ് വകുപ്പ് മന്ത്രി ജി. ആർ. അനിൽ പറഞ്ഞു. കെഎസ്ആർടിസി ഡ്രൈവിംഗ് സ്കൂൾ മികവുറ്റ ഒരു പുതിയ ഡ്രൈവിംഗ് സംസ്കാരം നിരത്തുകളിൽ കൊണ്ട് വരും എന്നും അദ്ദേഹം കൂട്ടിച്ചേർത്തു. മിതമായ നിരക്കിൽ ആധുനിക രീതിയിൽ അപകട രഹിതവും മികവുറ്റതുമായ ഡ്രൈവിംഗ് പരിശീലനം ഇവിടെ നിന്നും ലഭിക്കും. സർക്കാരിൻ്റെ ഏത് നല്ല പദ്ധതിയും പൂർത്തിയാക്കുന്നതിന് മുൻപ് കുപ്രചരണങ്ങൾ പരത്തുന്ന തെറ്റായ രീതി അടുത്തിടെയായി കൂടി വരുന്നതായും അദ്ദേഹം കൂട്ടി ചേർത്തു.

നെടുമങ്ങാട് കെഎസ്ആർടിസി ടെർമിനലിൽവെച്ചു നടന്ന ചടങ്ങിൽ നെടുമങ്ങാട് മുൻസിപാലിറ്റി ചെയർപേഴ്സൺ ആർ ജയദേവൻ,  വൈസ് ചെയർപേഴ്സൺ  ലക്ഷ്മി സുരാജ്  തുടങ്ങിയവർ ചടങ്ങിൽ പങ്കെടുത്തു.