ജില്ലയിലെ സര്‍ക്കാര്‍ ആയുര്‍വേദ – ഹോമിയോപ്പതി സ്ഥാപനങ്ങള്‍ ദേശീയ നിലവാരത്തിലേക്ക്

ഭാരതീയ ചികിത്സാവകുപ്പിന്റെയും ഹോമിയോപ്പതി വകുപ്പിന്റെയും തെരഞ്ഞെടുക്കപ്പെട്ട പത്ത് ആയുഷ് ആരോഗ്യസ്വാസ്ഥ്യ കേന്ദ്രങ്ങള്‍ ദേശീയ ആയുഷ് മിഷന്റെ സഹകരണത്തോടെ എന്‍.എ.ബി.എച്ച്. നിലവാരത്തിലേക്ക് ഉയര്‍ത്തുന്നു. സംസ്ഥാനത്താകെ 150 ആയുഷ് കേന്ദ്രങ്ങളാണ് ഇത്തരത്തില്‍ മികവ് വര്‍ദ്ധിപ്പിക്കാനൊരുങ്ങുന്നത്. ഇതാദ്യമായാണ് സംസ്ഥാനത്തെ സര്‍ക്കാര്‍ മേഖലയില്‍ ഇത്രയധികം ആരോഗ്യസ്ഥാപനങ്ങള്‍ എന്‍.എ.ബി.എച്ച്. മാനദണ്ഡങ്ങള്‍ പാലിച്ച് വിലയിരുത്തല്‍ പ്രക്രിയയിലേക്ക് കടക്കുന്നത്. തിരുവനന്തപുരം ജില്ലയില്‍നിന്നും കോര്‍പ്പറേഷനിലെ നേമം വാര്‍ഡും കാട്ടാക്കട, വിതുര, ഒറ്റശേഖരമംഗലം, അരുവിപ്പുറം, പുല്ലമ്പാറ, കഠിനംകുളം ഗ്രാമപഞ്ചായത്തുകളിലെ ആയുര്‍വേദ കേന്ദ്രങ്ങളും വിളവൂര്‍ക്കല്‍, പള്ളിച്ചല്‍, ആനാട് ഗ്രാമപഞ്ചായത്തുകളിലെ ഹോമിയോപ്പതി കേന്ദ്രങ്ങളുമാണ് ആദ്യഘട്ടത്തില്‍ മികച്ച നിലവാരത്തിലേക്ക് ഉയര്‍ത്തപ്പെടുന്നവ.അടിസ്ഥാന സൗകര്യ വികസനം, രോഗീസൗഹൃദം, രോഗീസുരക്ഷ, ഔഷധഗുണമേന്മ, അണുബാധാനിയന്ത്രണം എന്നിവയുള്‍പ്പടെയുള്ള സേവന മാനദണ്ഡങ്ങള്‍ പരിഗണിച്ചാണ് എന്‍.എ.ബി.എച്ച്. അംഗീകാരം നല്‍കുന്നത്. എന്‍.എ.ബി.എച്ച്. നിലവാരത്തിലേക്ക് ഉയര്‍ത്തപ്പെടുന്ന കേന്ദ്രങ്ങളിലൂടെ ആയുഷ് കേന്ദ്രങ്ങളിലെ ഒ.പി.സേവനങ്ങള്‍, യോഗാപരിശീലനം, ജീവിതശൈലി രോഗ നിയന്ത്രണവും ചികിത്സയും, ഗര്‍ഭകാല-പ്രസവാനന്തര ആരോഗ്യ പരിരക്ഷ, ശിശുക്ഷേമ ആരോഗ്യ പരിരക്ഷ, കൗമാരക്കാര്‍ക്കുള്ള ബോധവത്കരണം, കൗണ്‍സലിങ്, വയോജന പരിപാലനം, മാനസികാരോഗ്യ പരിപാലനം തുടങ്ങിയ സേവനങ്ങള്‍ കൂടുതല്‍ മികവുറ്റ രീതിയില്‍ പൊതുജനങ്ങള്‍ക്ക് ലഭിക്കും. ആശാ വർക്കർമാരുടെ സേവനം കൂടി ഉറപ്പുവരുത്തിയാണ് പ്രവർത്തനങ്ങൾ നടത്തുന്നത്.