ലോക ഹെഡ് & നെക്ക് അർബുദ ദിനം: ശബ്ദം, ശ്വാസനാളം എന്നിവയ്ക്ക് അത്യാധുനിക പരിചരണത്തിനായി ‘ആവാസ്’ സെന്ററുമായി ആസ്റ്റർ മെഡ്‌സിറ്റി

അർബുദ അതിജീവിതരുടെ ‘ഉയരെ’ സംഗമവും ചിത്രപ്രദർശനവും നടന്നു

കൊച്ചി, 29 ജൂലൈ 2026: ലോക ഹെഡ് & നെക്ക് അർബുദ ദിനാചരണത്തിന്റെ ഭാഗമായി കൊച്ചി ആസ്റ്റർ മെഡ്‌സിറ്റിയിലെ സെന്റർ ഓഫ് എക്സലൻസ് ഇൻ ഹെഡ് & നെക്ക് സർജറി ആൻഡ് ഓങ്കോളജി വിഭാഗം ‘ഉയരെ’ എന്ന പേരിൽ പ്രത്യേക സംഗമവും ചിത്രപ്രദർശനവും സംഘടിപ്പിച്ചു. ‘ഒന്നിച്ച് ഒന്നായി ഉയരാം’ (Together We Rise) എന്ന സന്ദേശത്തോടെ ആസ്റ്റർ മെഡ്‌സിറ്റി നോളജ് ഹബ്ബിൽ നടന്ന ചടങ്ങിൽ ടി. ജെ. വിനോദ് എംഎൽഎ, പ്രശസ്ത സംഗീത സംവിധായകൻ ജേക്സ് ബിജോയ് എന്നിവർ വിശിഷ്ടാതിഥികളായി പങ്കെടുത്തു.

നാക്കിലെ അർബുദത്തെ അതിജീവിച്ച ശിവൻജി എന്ന കലാകാരന്റെ ചിത്രപ്രദർശനവും പരിപാടിയിൽ ശ്രദ്ധേയമായി. ശസ്ത്രക്രിയയ്ക്ക് ശേഷം രോഗമുക്തനായ അദ്ദേഹം സംസാരിക്കാനുള്ള പ്രയാസങ്ങളെ മറികടന്ന് വരകളിലൂടെ പങ്കുവെക്കുന്ന തന്റെ വികാരങ്ങളും ആത്മവിശ്വാസവും എടുത്തുകാട്ടുന്നതായിരുന്നു പ്രദർശനം. ശബ്ദം, ശ്വാസനാളം, വിഴുങ്ങൽ എന്നിവയുമായി ബന്ധപ്പെട്ട പ്രശ്നങ്ങൾക്ക് അത്യാധുനിക പരിചരണം നൽകുന്ന ‘ആവാസ്’ (അഡ്വാൻസ്ഡ് സെന്റർ ഫോർ എയർവേ, വോയിസ് ആൻഡ് സ്വാളോവിങ്) എന്ന പുതിയ വിഭാഗത്തിന്റെ ഔദ്യോഗിക ലോഞ്ചും ചടങ്ങിൽ നിർവ്വഹിച്ചു.

തലയിലെയും കഴുത്തിലെയും അർബുദത്തെ അതിജീവിച്ചവരുടെ പോരാട്ടവീര്യത്തെയും ആത്മവിശ്വാസത്തെയും ആദരിക്കാനും, രോഗത്തെക്കുറിച്ചുള്ള ബോധവൽക്കരണം സമൂഹത്തിലേക്ക് എത്തിക്കാനുമാണ് സംഗമം സംഘടിപ്പിച്ചതെന്ന് ആസ്റ്റർ മെഡ്‌സിറ്റി കേരള ക്ലസ്റ്റർ ഹെഡ് ആൻഡ് നെക്ക് ഓങ്കോളജി നെറ്റ്‌വർക്കിന്റെ സീനിയർ കൺസൾട്ടന്റും പ്രോഗ്രാം ഡയറക്ടറുമായ ഡോ. ഷോൺ ടി. ജോസഫ് പറഞ്ഞു. ആസ്റ്റർ മെഡ്‌സിറ്റി സിഇഒ ഡോ. നളന്ദ ജയദേവ്, സിഒഒ ഡോ. ഷുഹൈബ് കാദർ, മറ്റ് മുതിർന്ന ഡോക്ടർമാരും മാനേജ്‌മെന്റ് പ്രതിനിധികളും ജീവനക്കാരും പരിപാടിയുടെ ഭാഗമായി.