തിരുവനന്തപുരം ജില്ലാ പഞ്ചായത്തിന്റെ വാര്ഷിക പദ്ധതിയില് ഉള്പ്പെടുത്തി നിര്മ്മിച്ച വിതുര താലൂക്ക് ആശുപത്രി കെട്ടിടത്തിന്റെയും ഡയാലിസിസ് യൂണിറ്റിന്റെയും ഉദ്ഘാടനം ആരോഗ്യ വനിതാ ശിശു വികസന വകുപ്പ് മന്ത്രി വീണാ ജോര്ജ്ജ് ഓണ്ലൈനായി നിര്വഹിച്ചു.
പിന്നോക്ക ജനവിഭാഗങ്ങള് കൂടുതലായി അധിവസിക്കുന്ന മലയോരമേഖലയായ വിതുരയ്ക്ക് ഏറെ ഗുണകരമാകുന്നതാണ് താലൂക്ക് ആശുപത്രിയുടെ അടിസ്ഥാന സൗകര്യവികസനമെന്ന് വീണാ ജോര്ജ്ജ് അഭിപ്രായപ്പെട്ടു. അരുവിക്കര മണ്ഡലത്തിലെ ആയുര്വേദ ആശുപത്രിയുടെ പുതിയ ഒ.പി കെട്ടിടത്തിന്റെ നിർമ്മാണോദ്ഘാടനം നടത്തിയിരുന്നു. അരുവിക്കര മണ്ഡലത്തിലെ തന്നെ കോട്ടൂരിൽ പരമ്പരാഗത വൈദ്യ ഗവേഷണ കേന്ദ്രം ആരംഭിക്കുന്നതിനുള്ള പ്രവര്ത്തനങ്ങള് നടന്നുവരികയാണെന്നും മന്ത്രി പറഞ്ഞു.
ജി.സ്റ്റീഫന് എംഎല്എ ചടങ്ങില് അധ്യക്ഷത വഹിച്ചു. ആരോഗ്യമേഖലക്ക് വളരെയേറെ പ്രാധാന്യമാണ് നമ്മുടെ സര്ക്കാര് നല്കുന്നതെന്നും ലക്ഷക്കണക്കിന് പാവപ്പെട്ട രോഗികള്ക്ക് സൗജന്യചികിത്സയും മരുന്നും സര്ക്കാര് ആശുപത്രികള് വഴി നല്കുന്നുണ്ടെന്നും എംഎല്എ പറഞ്ഞു.
2,96,79,715 രൂപ ചെലവഴിച്ചാണ് ആശുപത്രി കെട്ടിടവും ഡയാലിസിസ് യൂണിറ്റും നിര്മ്മിച്ചത്.
ജില്ലാ പഞ്ചായത്ത് പ്രസിഡന്റ് ഡി.സുരേഷ് കുമാര്, വിതുര ഗ്രാമപഞ്ചായത്ത് പ്രസിഡന്റ് മഞ്ജുഷ ജി ആനന്ദ്, വെള്ളനാട് ബ്ലോക്ക് പഞ്ചായത്ത് വൈസ് പ്രസിഡന്റ് എസ്.കൃഷ്ണകുമാരി, ഡിഎംഒ ഡോ.ബിന്ദു മോഹന്, മെഡിക്കല് ഓഫീസര് ഇന് ചാര്ജ്ജ് ഡോ.കണ്ണന്, സ്റ്റാന്റിംഗ് കമ്മിറ്റി ചെയര്പേഴ്സണ്മാര്, ത്രിതലപഞ്ചായത്ത് അംഗങ്ങള് തുടങ്ങിയവര് പങ്കെടുത്തു.