വെള്ളിയാഴ്ച രാവിലെയാണ് ചിത്രത്തിന്റെ അഡ്വാൻസ് ബുക്കിങ് ആരംഭിച്ചത്.
മോഹന്ലാല്- പൃഥ്വിരാജ് ചിത്രമായ എംപുരാനായി ആവേശത്തോടെ കാത്തിരിക്കുകയാണ് ലോകമെമ്പാടുമുള്ള സിനിമാ പ്രേമികള്. കഴിഞ്ഞദിവസം പുറത്തിറങ്ങിയ ചിത്രത്തിന്റെ ട്രെയ്ലര് ആരാധകര്ക്കിടയില് വൻ തരംഗമായിരുന്നു. ഇപ്പോഴിതാ വിവിധ ഓണ്ലൈന് സൈറ്റുകളില് സിനിമയുടെ ടിക്കറ്റ് ബുക്കിങ് ആരംഭിച്ചു കഴിഞ്ഞു. ബുക്കിങ് ആരംഭിച്ചതിന് പിന്നാലെ ടിക്കറ്റ് തേടി സൈറ്റുകളിലെല്ലാം ആരാധകപ്രവാഹമാണെന്നാണ് റിപ്പോര്ട്ടുകള്.
വെള്ളിയാഴ്ച രാവിലെ തന്നെ ചിത്രത്തിന്റെ അഡ്വാൻസ് ബുക്കിങ് ആരംഭിച്ചു. കുറഞ്ഞ സമയത്തിനുള്ളിൽ തന്നെ ടിക്കറ്റ് ബുക്കിങ് സൈറ്റായ ബുക്ക് മൈ ഷോയിൽ റെക്കോഡ് ബുക്കിങ് ആണ് നടന്നത്. ബുക്ക് മൈ ഷോയിൽ ആദ്യ ഒരു മണിക്കൂറില് ഏറ്റവുമധികം ടിക്കറ്റുകൾ ബുക്ക് ചെയ്യപ്പെട്ട ആദ്യ ഇന്ത്യൻ ചിത്രമായി എംപുരാൻ. വിജയ്യുടെ ലിയോ, അല്ലു അർജുന്റെ പുഷ്പ 2 എന്നിവയുടെ റെക്കോഡ് ആണ് എംപുരാൻ നിമിഷങ്ങൾകൊണ്ട് തകർത്തു കളഞ്ഞത്.
മണിക്കൂറിൽ 96,140 ടിക്കറ്റുകളാണ് ബുക്ക് മൈ ഷോയിൽ വിറ്റഴിച്ചത്. ഇതിനിടെ ബുക്ക് മൈ ഷോയുടെ സെര്വര് തകര്ന്നതായും രാവിലെ റിപ്പോർട്ടുകൾ വന്നു. ഒട്ടുമിക്ക ടിക്കറ്റ് ബുക്കിങ് പ്ലാറ്റ്ഫോമുകളിലും എംപുരാന്റെ ടിക്കറ്റിനായി ആരാധകരുടെ ഓട്ടമാണ്. ടിക്കറ്റുകളെല്ലാം അതിവേഗമാണ് വിറ്റഴിക്കപ്പെടുന്നത്. ആദ്യദിവസത്തെ ആദ്യ ഷോയുടെ ടിക്കറ്റുകള് ഒട്ടുമിക്ക തിയറ്ററുകളിലും വിറ്റു തീര്ന്നുകഴിഞ്ഞു.
ആരാധകര് വന് പ്രതീക്ഷയോടെ കാത്തിരിക്കുന്ന ചിത്രം കളക്ഷന് റെക്കോഡുകള് തകര്ത്തെറിയുമെന്നാണ് പലരും വിലയിരുത്തുന്നത്. എംപുരാന്റെ ലോകമെമ്പാടുമുള്ള അഡ്വാൻസ് ബുക്കിങുകൾ ഇതിനോടകം 12 കോടി രൂപ കടന്നു. മലയാള സിനിമാ ചരിത്രത്തിലെ ഏറ്റവും വലിയ ഓപ്പണിങ് ചിത്രം കൂടിയാണിത്. ലോകമെമ്പാടുമായി 40-50 കോടി രൂപ ഇതിനോടകം ചിത്രം ഗ്രോസ് നേടി കഴിഞ്ഞു.
ഇത് മോഹൻലാലിന്റെ തന്നെ മരക്കാർ: അറബിക്കടലിന്റെ സിംഹം (20 കോടി രൂപ) നേടിയ നിലവിലെ റെക്കോർഡിന്റെ ഇരട്ടിയിലധികം വരും. മാർച്ച് 27-ന് രാവിലെ ആറു മണിക്കാണ് ഇന്ത്യയിലും ആഗോളതലത്തിലും ചിത്രം പ്രദര്ശനം ആരംഭിക്കുന്നത്. കേരളത്തിന് പുറമേ പാന് ഇന്ത്യന് തലത്തിലും വമ്പന് കമ്പനികളാണ് ചിത്രം റിലീസ് ചെയ്യുക. തമിഴ്നാട്ടില് ശ്രീഗോകുലം മൂവീസാണ് ചിത്രം റിലീസ് ചെയ്യുന്നത് ദില് രാജുവിന്റെ ഉടമസ്ഥതയിലുള്ള ശ്രീ വെങ്കടേശ്വര ക്രിയേഷന്സ് ചിത്രം ആന്ധ്രാ- തെലങ്കാന സംസ്ഥാനങ്ങളില് വിതരണം ചെയ്യുമ്പോള്, അനില് തഡാനി നേതൃത്വം നല്കുന്ന എഎ ഫിലിംസ് ആണ് ചിത്രം ഉത്തരേന്ത്യയില് എത്തിക്കുന്നത്. കര്ണാടകയിലെ ഡിസ്ട്രിബ്യൂഷന് പാര്ട്ണര് കന്നഡയിലെ വമ്പന് സിനിമാ നിര്മാണ വിതരണ കമ്പനിയായ ഹോംബാലേ ഫിലിംസ് ആണ്. എംപുരാൻ എക്കാലത്തെയും ഏറ്റവും കൂടുതൽ കളക്ഷൻ നേടുന്ന മലയാള ചിത്രമായി മാറുമോ എന്നാണ് സിനിമാ പ്രേക്ഷകർ ഒന്നടങ്കം ഉറ്റുനോക്കുന്നത്.