കാവ്യ ജീവിതത്തിന്റെയും അധ്യാപന ജീവിതത്തിന്റെയും അമ്പതാം വർഷത്തിൽ കവി മുട്ടപ്പലം വിജയകുമാറിനെ അഴൂർ പൗരാവലി ആദരിച്ചു. വിവിധ രാഷ്ട്രീയ സാമൂഹിക സാംസ്കാരിക സംഘടനകളും പൂർവ്വവിദ്യാർത്ഥി സംഘടനകളും ചേർന്ന് അഴൂർ സാഹിത്യ വേദിയുടെ സഹകരണത്തോടെയാണ് അഴൂർ പൗരാവലിയുടെ നേതൃത്വത്തിൽ ആദരിച്ചത്.അഴൂർ പഞ്ചായത്ത് കമ്മ്യൂണിറ്റി ഹാളിൽ നടന്ന സാംസ്കാരിക സമ്മേളനം വി ശശി എംഎൽഎ ഉദ്ഘാടനം ചെയ്തു മുട്ടപ്പലം വിജയകുമാറിന്റെ പുതിയ പുലരിയിലെ സാമ സംഗീതം എന്ന കവിതാ സമാഹാരം കവി പ്രൊഫ. വി മധുസൂദനൻ നായർ കവിയും നിരൂപകനുമായ ഡോ. ബി ഭുവനേന്ദ്രന് നൽകി പ്രകാശനം ചെയ്തു.അഡ്വ. എസ് വി അനിലാലിന്റെ അധ്യക്ഷതയിൽ കൂടിയ സാംസ്കാരിക സമ്മേളനത്തിൽ ജില്ലാ ലൈബ്രറി കൗൺസിൽ എക്സിക്യൂട്ടീവ് അംഗം അഡ്വ. എൻ സായികുമാർ,രാജീവ് ഗാന്ധി കൾച്ചറൽ ഫൗണ്ടേഷൻ പ്രസിഡന്റ് അഡ്വ. എസ് കൃഷ്ണകുമാർ,കവയിത്രി ശുഭ ജയരാജൻ, സ്വാഗതസംഘം വൈസ് ചെയർമാൻ വി പ്രജോധനൻ,മൈത്രി ബുക്സ് പ്രസാധകൻ കെ ലാൽസലാം എന്നിവർ സംസാരിച്ചു. വിജുശങ്കർ സ്വാഗതവും എസ് എ ഷാനവാസ് നന്ദിയും രേഖപ്പെടുത്തി.
