തിരുവനന്തപുരം: യൂട്യൂബിൽ തരംഗമായി ‘മഴവിൽക്കനവുകൾ’ എന്ന ചിത്രത്തിലെ “രാവുറങ്ങാതെ…” എന്ന് തുടങ്ങുന്ന ഗാനം. റിലീസ് ചെയ്ത് വെറും 72 മണിക്കൂറിനുള്ളിൽ ഒരു ലക്ഷത്തിലധികം കാഴ്ചക്കാരാണ് ഗാനം സ്വന്തമാക്കിയത്. ഫിലിം ക്ലബ്ബ് യൂട്യൂബ് ചാനലിലൂടെയാണ് ഗാനം പുറത്തിറങ്ങിയത്.
പ്രശസ്ത സംഗീതസംവിധായകനും ഗായകനുമായ ശരത്തിന്റെ വേറിട്ട ശബ്ദത്തിലുള്ള ആലാപനമാണ് ഗാനത്തെ ചുരുങ്ങിയ സമയത്തിനുള്ളിൽ പ്രേക്ഷകശ്രദ്ധ നേടാൻ പ്രധാന കാരണമായത്. ആലാപനത്തിലെ വേഗതയും ഭാവസാന്ദ്രതയും ഗാനത്തിന് വേറിട്ട അനുഭവം നൽകുന്നു.
എസ്. എസ്. ജിഷ്ണു ദേവ് സംവിധാനം ചെയ്യുന്ന ചിത്രമാണ് മഴവിൽക്കനവുകൾ. ബീന കാവേരി പുഷ്കാസ് പ്രൊഡക്ഷൻസിന്റെ ബാനറിൽ ചിത്രം നിർമ്മിക്കുന്നു. സബീഷ് ബാലയാണ് സംഗീതസംവിധാനം നിർവഹിച്ചിരിക്കുന്നത്. ഗാനത്തിന് വരികൾ ഒരുക്കിയിരിക്കുന്നത് ദീപു ആർ. എസ്. ചടയമംഗലം ആണ്.
വരികൾക്കും സംഗീതത്തിനും അനുയോജ്യമായ മനോഹരമായ ദൃശ്യാവിഷ്കാരമാണ് ഗാനത്തിനായി സംവിധായകൻ ഒരുക്കിയിരിക്കുന്നത്.
ജീവിതത്തിലെ പ്രതിസന്ധികളോട് പൊരുതി വിജയിക്കുന്ന ഒരു സ്ത്രീയുടെ അതിജീവനത്തിന്റെ കഥയാണ് ‘മഴവിൽക്കനവുകൾ’ പറയുന്നത്. ചിത്രത്തിലെ ഗാനവും അതിന്റെ ദൃശ്യാവിഷ്കാരവും ഇതിനകം പ്രേക്ഷകശ്രദ്ധ നേടിക്കഴിഞ്ഞു.
ബീന കാവേരി, നിവേദിത, അഭിഷേക് ശ്രീകുമാർ, പ്രിൻസ് ജോൺസൻ, ജലതാ ഭാസ്കരൻ, ടി. സുനിൽ പുന്നക്കാട്, ശ്രേയസ്, അരുൺ കുമാർ എസ്. എസ്. എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
ചിത്രത്തിന്റെ പബ്ലിസിറ്റി ഡിസൈൻ പ്രജിൻ ഡിസൈൻസും, പി.ആർ.ഒ ചുമതലകൾ അജയ് തുണ്ടത്തിലുമാണ് നിർവഹിക്കുന്നത്.
ചിത്രത്തിന്റെ അണിയറപ്രവർത്തകർ
- ചിത്രം: മഴവിൽക്കനവുകൾ
- സംവിധാനം: എസ്. എസ്. ജിഷ്ണു ദേവ്
- നിർമ്മാണം: ബീന കാവേരി — പുഷ്കാസ് പ്രൊഡക്ഷൻസ്
- ആലാപനം: ശരത്
- സംഗീതം: സബീഷ് ബാല
- രചന: ദീപു ആർ. എസ്. ചടയമംഗലം
- പബ്ലിസിറ്റി ഡിസൈൻ: പ്രജിൻ ഡിസൈൻസ്
- പി.ആർ.ഒ: അജയ് തുണ്ടത്തിൽ