തിരുവനന്തപുരം, സെപ്റ്റംബർ 13, 2026: ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എജ്യുക്കേഷൻ ആൻഡ് റിസർച്ച് (IISER) തിരുവനന്തപുരത്തെ സ്കൂൾ ഓഫ് മാത്തമാറ്റിക്സിലെ അസിസ്റ്റന്റ് പ്രൊഫസർ ഡോ. ജയന്ത സാർക്കറുടെ അകാല നിര്യാണത്തിൽ ഇൻസ്റ്റിറ്റ്യൂട്ട് അതീവ ദുഃഖം രേഖപ്പെടുത്തി.
കഴിഞ്ഞ ഡിസംബറിലാണ് ഡോ. ജയന്ത സാർക്കർ IISER തിരുവനന്തപുരത്ത് അധ്യാപകനായി ചേർന്നത്. ഇന്ത്യൻ സ്റ്റാറ്റിസ്റ്റിക്കൽ ഇൻസ്റ്റിറ്റ്യൂട്ട്, കൊൽക്കത്തയിൽ നിന്ന് പി.എച്ച്.ഡി. നേടിയ അദ്ദേഹം ഹാർമോണിക് അനാലിസിസ് (Harmonic Analysis) മേഖലയിൽ ഗവേഷണം നടത്തിയിരുന്ന ഗണിതശാസ്ത്രജ്ഞനായിരുന്നു.
ഞായറാഴ്ച പുലർച്ചെയാണ് IISER തിരുവനന്തപുരം ക്യാമ്പസിലെ റോഡിൽ ഡോ. സാർക്കറെയും അദ്ദേഹത്തിന്റെ മോട്ടോർസൈക്കിളിനെയും കണ്ടെത്തിയത്. തുടർന്ന് ഉടൻ ആശുപത്രിയിലെത്തിച്ചെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു.
ഡോ. ജയന്ത സാർക്കറുടെ മരണകാരണം സംബന്ധിച്ച് പൊലീസ് അന്വേഷണം തുടരുകയാണ്.
അദ്ദേഹത്തിന്റെ അകാല വിയോഗത്തിൽ IISER തിരുവനന്തപുരം സമൂഹം കുടുംബാംഗങ്ങൾ, സുഹൃത്തുക്കൾ, സഹപ്രവർത്തകർ, വിദ്യാർത്ഥികൾ എന്നിവരോട് ഹൃദയംഗമമായ അനുശോചനം രേഖപ്പെടുത്തി.
ഡോ. ജയന്ത സാർക്കറുടെ അകാല നിര്യാണം IISER തിരുവനന്തപുരത്തിനും ഗണിതശാസ്ത്ര ഗവേഷണ മേഖലയ്ക്കും നികത്താനാകാത്ത നഷ്ടമാണെന്ന് ഇൻസ്റ്റിറ്റ്യൂട്ട് അനുശോചന സന്ദേശത്തിൽ വ്യക്തമാക്കി.