വിഴിഞ്ഞം പദ്ധതിയുടെ ട്രയൽ റൺ ഉദ്ഘാടന വേദിയിൽ പ്രതിപക്ഷ നേതാവിനെ ഒഴിവാക്കിയതും, മുഖ്യമന്ത്രിയുടെ ഉദ്ഘാടന പ്രസംഗത്തിൽ ഉമ്മൻ ചാണ്ടിയുടെ പേര് തമസ്കരിക്കാൻ ശ്രമിച്ചതും നിലവാരം കുറഞ്ഞ നടപടിയാണെന്ന് പാലോട് രവി കുറ്റപ്പെടുത്തി. മുൻമുഖ്യമന്ത്രി ഉമ്മൻ ചാണ്ടിയുടെ സ്മരണകൾക്ക് അഭിവാദ്യം അർപ്പിച്ച് UDF പ്രവർത്തകർ രക്തസാക്ഷി മണ്ഡപത്തിൽ നിന്നും സെക്രട്ടേറിയേറ്റിലേയ്ക്ക് നടത്തിയ പ്രകടനം ഉദ്ഘാടനം നടത്തി പ്രസംഗിക്കുകയായിരുന്നു ഡി സി സി പ്രസിഡൻ്റ് പാലോട് രവി.
വിഴിഞ്ഞം തുറമുഖം പ്രവർത്തനക്ഷമമാകുന്ന ഇന്ന് ജീവിച്ചിരുന്നുവെങ്കിൽ ഏറ്റവും കൂടുതൽ സന്തോഷിക്കുക ഉമ്മൻ ചാണ്ടി ആയിരിക്കുമായിരുന്നു. പദ്ധതിയ്ക്ക് ആവശ്യമായ മുഴുവൻ സ്ഥലവും ഏറ്റടുക്കുകയും, കാലാവസ്ഥാവ്യതിയാന പഠനവും സാമൂഹിക ആഘാത പഠനവും ഉൾപെടെ എല്ലാ പഠനങ്ങളും പൂർത്തിയാക്കുകയും, പബ്ലിക് ഹിയറിങ്ങ് നടത്തി ആ സമയത്ത് ഉയർന്നുവന്ന എല്ലാ ആശങ്കകളും പരിഹരിക്കുകയും, ഗ്രീൻ ട്രിബ്യൂണൽ മുമ്പാകെ വന്ന കേസ്സുകൾ തീർപ്പാക്കുകയും, മൽസ്യതൊഴിലാളികൾക്കായി 450 കോടി രൂപയുടെ പുനരധിവാസ പാക്കേജ് അംഗീകരിക്കുകയും ചെയ്തു കൊണ്ടാണ് ഉമ്മൻ ചാണ്ടി പദ്ധതി ടെണ്ടർ നടപടികൾ പൂർത്തിയാക്കിയതും നിർമ്മാണ പ്രവർത്തനങ്ങളുടെ ഉദ്ഘാടനം നിർവ്വഹിച്ചതും. വിഴിഞ്ഞം പദ്ധതിയുടെ പേരിൽ ഒട്ടനവധി ആരോപണങ്ങളും വിജിലൻസ് ജുഡീഷ്യൽ അന്വേഷണങ്ങളും നേരിടേണ്ടി വന്ന ഉമ്മൻ ചാണ്ടിയുടെ നിശ്ചയദാർഢ്യം മാണ് വിഴിഞ്ഞം പദ്ധതിയാഥാർത്യമാക്കിയതെന്നും എം.വിൻസെൻ്റ് എം.എൽ എ പറഞ്ഞു.
UDF ജില്ലാ ചെയർമാൻ പി.കെ. വേണു ഗോപാലിൻ്റെ അദ്ധ്യക്ഷതയിൽ നടന്ന യോഗത്തിൽ ബീമാപള്ളി റഷീദ്,ശരത്ചന്ദ്രപ്രസാദ്, വർക്കല കഹാർ, എം.എ. വാഹിദ്, ഇറവൂർ പ്രസന്നകുമാർ, എം ആർ മനോജ്,ജോണി ചെക്കിട്ട ,കരുമം സുന്ദരേശൻ, കമ്പറനാരായണൻ, ചെമ്പഴന്തി അനിൽ, തേക്കട അനിൽ, ആറ്റിങ്ങൽ ഉണ്ണികൃഷ്ണൻ എം. ശ്രീകണ്ഠൻ നായർ, എം എ പത്മകുമാർ, കൊഞ്ചിറവിള വിനോദ്, സേവ്യർ ലോപ്പസ്, ഡി. സുദർശനൻ വി കെ രാജു, എം മുനീർ, നേമം സജീർ ,ഗോപു നെയ്യാർ,സെയ്താലി കൈപ്പാടി’ നരുവാമൂട് ജോയി എന്നാവർ പ്രസംഗിച്ചു.
