വനിതാ ശിശുവികസന വകുപ്പിന്റെ ബേട്ടി ബച്ചാവോ ബേട്ടി പഠാവോ ക്യാമ്പയിന്റെ ഭാഗമായി ജില്ലാ ഭരണകൂടത്തിന്റെ സഹായത്തോടെ, കനൽ ഇന്നോവേഷൻസ് ചാരിറ്റബിൾ ട്രസ്റ്റ് കളക്ടേഴ്സ് സൂപ്പർ 100 പരിപാടി സംഘടിപ്പിക്കുന്നു. ജൂലൈ 22ന് രാവിലെ 10:30ന് മഹാത്മാ അയ്യങ്കാളി ഹാളിൽ വച്ച് തൊഴിൽ, വനിതാ-ശിശു വികസന ക്ഷീരവികസന, മൃഗസംരക്ഷണ വകുപ്പ് മന്ത്രി ബിന്ദു കൃഷ്ണ പരിപാടിയുടെ ഉദ്ഘാടനം നിർവഹിക്കും. ജില്ലാ കളക്ടർ അനു കുമാരി അധ്യക്ഷത വഹിക്കും.
പുതിയ അധ്യയന വർഷത്തിലെ വിദ്യാർത്ഥിനികളെ സ്വാഗതം ചെയ്യുന്നതിനോടൊപ്പം കളക്ടേഴ്സ് സൂപ്പർ 100 പദ്ധതിയുടെ പൂർവവിദ്യാർത്ഥിനികളെയും പദ്ധതിയുടെ വിജയത്തിന് നിർണായക പങ്കുവഹിച്ച സന്നദ്ധപ്രവർത്തകരെയും ചടങ്ങിൽ ആദരിക്കും.
വനിതാ-ശിശു വികസന വകുപ്പ് ഡയറക്ടർ വി. വിഘ്നേശ്വരി, സബ് കളക്ടർ ആൽഫ്രഡ് ഒ വി, അസിസ്റ്റന്റ് കളക്ടർ വിഷ്ണോയ് ദിനേശ് ഹപുരം, വനിതാ-ശിശു വികസന വകുപ്പ് ജില്ലാ ഓഫീസർ, ഷിംന, ഫിഷറീസ് വകുപ്പ് ഡെപ്യൂട്ടി ഡയറക്ടർ ഷീജ മേരി എ.പി, ജില്ലാ പട്ടികജാതി വികസന ഓഫീസർ സരിൻ എസ്. എസ്, ഡെപ്യൂട്ടി ഡയറക്ടർ ഓഫ് എഡ്യൂക്കേഷൻ ബിജു ആർ, ട്രെൻസർ ടെക്നോളജി സൊല്യൂഷൻസ് എച്ച്.ആർ. മാനേജർ ശാലിനി ലക്ഷ്മി തുടങ്ങിയവർ പങ്കെടുക്കും.
സാമൂഹികമായും സാമ്പത്തികമായും പിന്നാക്കം നിൽക്കുന്ന പെൺകുട്ടികൾക്ക് ഗുണമേന്മയുള്ള വിദ്യാഭ്യാസവും ശാസ്ത്ര-സാങ്കേതിക മേഖലകളിൽ മികച്ച അവസരങ്ങളും ഉറപ്പുവരുത്തുക എന്ന ലക്ഷ്യത്തോടെയാണ് പദ്ധതി രൂപകൽപ്പന ചെയ്തിരിക്കുന്നത്.
