കോഴിക്കോട്: ദി വൈറ്റ് സ്കൂൾ ഇന്റർനാഷണൽ വിപുലമായ ഓണാഘോഷം സംഘടിപ്പിച്ചു. പാരമ്പര്യം, ഒരുമ, സഹജീവി സ്നേഹം, സാമൂഹിക ഉത്തരവാദിത്തം എന്നിവ മുൻനിർത്തിയായിരുന്നു ആഘോഷം.
ആഘോഷത്തിലെ പ്രധാന ആകർഷണം വിദ്യാർത്ഥികളുടെ നേതൃത്വത്തിൽ ഒരുക്കിയ 10 മീറ്റർ വ്യാസമുള്ള മെഗാ പച്ചക്കറി പൂക്കളമായിരുന്നു. സ്കൂളിലെ ടെന്നിസ് കോർട്ടിൽ വിവിധ നിറങ്ങളിലും ആകൃതികളിലുമുള്ള പച്ചക്കറികൾ ഉപയോഗിച്ചാണ് പൂക്കളം ഒരുക്കിയത്.
വിദ്യാർത്ഥികൾ വീടുകളിൽ നിന്ന് കൊണ്ടുവന്ന പച്ചക്കറികളാണ് ഇതിനായി ഉപയോഗിച്ചത്. ഭക്ഷ്യവസ്തുക്കൾ പാഴാക്കാതെ ആവശ്യക്കാരിലേക്ക് എത്തിക്കുക എന്ന ആശയത്തിന്റെ ഭാഗമായാണ് ഈ രീതിയെന്ന് സ്കൂൾ അധികൃതർ അറിയിച്ചു. പൂക്കളത്തിന് ശേഷം പച്ചക്കറികൾ സ്കൂളിലെ സപ്പോർട്ട് സ്റ്റാഫ് അംഗങ്ങൾക്കും പ്രദേശത്തെ നിർധന കുടുംബങ്ങൾക്കും വിതരണം ചെയ്യും.
തിരുവാതിര, ഓണപ്പാട്ടുകൾ, നൃത്തങ്ങൾ, ഓണസദ്യ എന്നിവയും ആഘോഷത്തിന്റെ ഭാഗമായി നടന്നു.
പഠനത്തിനപ്പുറം മാനവിക മൂല്യങ്ങളും സാമൂഹിക ഉത്തരവാദിത്തവും വിദ്യാർത്ഥികളിൽ വളർത്തുകയെന്ന ലക്ഷ്യത്തോടെയാണ് വേറിട്ട ഓണാഘോഷം സംഘടിപ്പിച്ചതെന്ന് ഹൈലൈറ്റ് എഡ്യൂക്കേഷണൽ ഇനിഷ്യേറ്റീവ്സ് ഡയറക്ടറും ഹെഡ് ഓഫ് സ്കൂൾസുമായ ഡോ. പത്മ ഹരിഹരൻ പറഞ്ഞു.